Yakobbo 4 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ohwaamba esyaalo obwiicha

¹ Siina syeene esileetaanga ohulwaana neende obusoolo mweeng'we? Ebiindu bino haba sibitula mu hwekoombaanga hweeng'we hubi ohubalwaanirangamo?

² Mudaha ebiindu nae haba simubinyoola. Sakira muchaaka ohwiitana; haandi mwekoomba ebiindu bi mutanyala hunyoola. Sakira musoolana haandi mwalwaana. Simunyoola ebiindu bi mudaha olwohuba haba simusabaanga Nasaae ohubibaberesa.

³ Haandi nimusaba, haba simunyoola, olwohuba muli neende esichiiririrwa sibi. Musaba ohunyoola ebiindu bimwehoonyera ohwesangaasa abeene.

⁴ Eng'we abatesikiha! Mukoterwe muti, nimuwaamba esyaalo obwiicha, muba abasuku ba Nasaae? Omuundu odaha ohwaamba esyaalo obwiicha, oyo aba adaha ohuba omusuku wa Nasaae?

⁵ Oba mubaasa muti, ebyandiiko byoolerefu bibulamo amahuluundu kaboola kati, “Omwooyo ku Nasaae yatutaamo kweechulamo ehiinda?”

⁶ Nae embabaasi chi Nasaae atweekesa, chihiramo amaani. Koti lu byandiiko byoolerefu biboola, “Nasaae ayiingania ab'esuunga, nae abaloonga ababeresa embabaasi.”

⁷ Mani mube abawulisi eyiri Nasaae. Lwaanie Sitaani mani achia ohubatulaho niyeeruha embiro.

⁸ Sude aambi neende Nasaae, mani yesi achia ohusuda aambi naang'we. Eng'we abahola-mbi, mwesaabe amahono keeng'we. Nae eng'we abakanaakana, mulabye emyooyo kyeeng'we!

⁹ Mweyendeherere neende esibeera mani mulire; ohucheha hweeng'we hweehole ohulira, haandi esangaalo lyeeng'we lyeehole ohwewunamira!

¹⁰ Mube abaloonga mu moni w'Omwaami, mani achia ohubaniinia aakulu.

Ohulabula hudiira hu huheengera owaasyo omusaango

¹¹ Basyaange, mutalomalomaanga obubi hu basyeeng'we. Oyo yeesi olomaloma obubi hu waasye, oba oheengera owaasye omusaango, aba alomaloome bubi hu malako ka Musa, haandi aba alekeeresa amalako. Nae n'olekeeresa amalako, ao sooba oli omuundu owulira amalako, nae oba omuundu olekeeresa amalako.

¹² Olwohuba omuundu wataao amalako niye omuheengi w'emisaango, ali mulala yeeng'ene. Oyo niye onyala ohuwonia oba yaasihirisa. Nae bulaanu, ewe niiwe naanu oheengera owaasyo omusaango?

Ohulabula hudiira hu hweniinia

¹³ Nae bulaanu tekeerese eng'we ababoolanga muti, “Enyaanga yino oba muchuli huchia ohuchia mu siko nabulebe, mani humaleyo omwaaka mulala nihuchurusa hunyoole engaanga”.

¹⁴ Mukoterweho koti lu bulamu bweeng'we bunaabe muchuli! Muli koti enang'oong'o eliboneha ohumala esiha sidiidi, nilikotao. Nae simumanyireho ebidiira hu muchuli.

¹⁵ Mwahaboolere muti, “Omwaami n'afukiirira, huchia ohuba abalamu, mani huhole sino oba sira.”

¹⁶ Nae bulaanu eng'we mweniinia haandi mwefumia. Ohwefumia hw'engeri eyo, hubi nihwo.

¹⁷ Sakira omuundu yeesi omanyire esiindu silai sy'ahooyerwe ohuhola, mani yaahaya ohusihola, aba yonoonere.