Tobiti 2 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Emiholo kyomu daala

¹ Nae nindakobola mu daala, ndaba alala neende omuhasi waange Ana, neende omwaana waange Tobbiasi. Nae hu Sidyaalo sya Pentekosti, esilaangwa siti, Esidyaalo sy'Ejuma chitaanu-na-chibiri, bali nibatekeheere ebyohulya bilai, mani ninjaaka ohulya.

² Nae nindabona endi ebyohulya byali ebiingi muno, ndaboolera omwaana waange Tobbiasi endi: “Chia okoonyeyo Omuyudaaya wasyeefwe omumanani y'onanyoole yeesi, oyo odeeba hu Omwaami, mani omuleete ano, yeeche alye alala naafwe hu sidyaalo sino. Njia ohuhuliinda okobole hu njaake ohulya.”

Omuundu yeetwa mu Ninefe

³ Ao mani Tobbiasi n'achia ohukoonya omuundu yaanaleete ango. Nae yakobola bwaangu muno n'ahuumula n'alaanga ati: “Laata, Laata! Mulala hu baandu beefwe yeeterwe mani n'asukunwa mu siito.”

⁴ Ndasiingiriraniramo nisisiiri ohuhoombaho esiindu syoosi, mani ninjia nindusayo omulaambo okwo, ningukisa mu sikaali ohwoola lu lyuuba lyakwa, hu nyale ohukusiiha.

⁵ Nae nindakobola ango, ndeeyoka mani ndaalya ebyohulya byaange ni ndi neende engisa enyiingi muno.

⁶ Ao mani ninjichulisa bi munabbi Amosi yaboola ebidiira hu baandu ba Bbeteli ati: “Ebidyaalo byeeng'we byeholera ohulira, haandi ohwehoya hweeng'we hwoosi hweholere amaliro.” Mani ninjaaka ohulira.

⁷ Nae elyuuba nilyakwa, ndaachia ndaayaba eng'ani mani nisiiha omulaambo okwo.

⁸ Abaliraanwa baange baanjeha nibaboola bati, “Ewe haba siweeka daawe? Bali nibahukiiya ohwiita olw'ohusiiha abafu. Esyahuwonia nihwo ohwiiruha. Bulaanu okoboole haandi noochaaka ohusiiha abafu.”

Tobbiti awofula

⁹ Mu siro syeene esyo, nindakobola nindula ohusiiha omufu, ndeeyoka mani ndeelabya. Nae olwohuba ndali nindeyonoonere, ndachia mani nindeyalisa makalaame mu lwaanyi. Nae olw'bubafu buungi, haba sindebwiha hu mutwe daawe.

¹⁰ Nae sindali nimanyire endi abuundu ao yaliwo obubbiichu aakulu. Mani amasirikotyo kaabwo kabalire nikaangwa mu moni olububi niludiira hu moni chaange. Ndecheemba hu balerwa baangi, nae haba sibanyala ohuundera daawe. Nae Ahikari n'aniinda bulai muno ohwoola lu ndachia mu syaalo sy'Elimaisi.

Obusoolo mu daala

¹¹ Ao mani omuhasi waange Ana n'achaaka ohunyolaanga eseende ohutula mu mirimo chae koti abahasi baandi.

¹² Abaandu bamutuungaanga eseende n'amalire ohubayirira ebiindu bi aholere. Luliwo oludaalo lu bamutuunga omusaara kwae, haandi bamuberesa neende embusi.

¹³ Nae Ana niyoola engo, embusi yaanja ohwaana. Ndamulaanga mani nimuteeba endi, “Embusi eyo yitulire yeena? Yitaba niyiri enjibe? Yikobosere omweeneyo. Olwohuba haba sisilai ohulya esiibe.”

¹⁴ Mani n'angobolamo ati: “Abaandu baholeere batuungire eseende haandi bameeda embusi yino koti ahasiimo.” Nae ese nihaya ohusifukiirira daawe, mani nimuboolera ohuyikobosera abeeneyo; nimwoolobya muno. Yangobolamo ati: “Ebilai bu waholeraanga abaandu biri yeena? Ebiholwa byao bikololofu biri yeena? Sibonehana siti omanyire buli siindu!”