Tobiti 1 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Luno nilwo olukano ludiira hu bulamu bwa Tobbiti, omwaana wa Tobieli. Bakuuka bae nibo bano: Tobieli yali omwaana wa Ananieli, Ananieli yali omwaana wa Adweli, Adweli yali omwaana wa Gabaeli, Gabaeli yali omwaana wa Rafaeli, Rafaeli yali omwaana wa Ragweli, Ragweli yali ow'olwiibulo lwa Asieli, ow'oluya lwa Nafutaali.

² Mu biha bya Salimanesa, omutuki wa Asiria, Tobbiti yayirwa mu buwaambe ohutula mu siko sya Tisibbe, esiri emwaalo wa Kedesi mu Nafutaali mu Galilaaya emukulu wa Aseri.

Obulamu bwa Tobbiti naali omuraaga

³ Ese, Tobbiti, mu bulamu bwaange bwoosi, ndaloondakana neende obwadyeeri alala neende obuluungifu. Haandi nihola esyo si mbona endi silai. Amahabi maangi muno, ndabukulaanga hu biindu byaange mani nihoonya abasyaange neende Abayudaaya basyaange baandi, bahwachia ninabo mu buwaambe Ninefe mu syaalo sy'Abasiria.

⁴ Nae mu buraaga bwaange, ndabechaanga mu syaalo syaange syeene esya Yisiraeli. Ebiha ebyo, enono choosi mu Yisiraeli chahoyeraanga ohuyaana ebiyaanwa mu Yerusalemu. Sino nisyo esiko si Nasaae yadoolamo mu biko bya Yisiraeli byoosi, yi njia choosi chihoyere ohuyaanira ebiyaanwa haandi yi Nyuumba ya Nasaae yihoyerwe ohwoombahamwo, haandi yehole Abuundu Woolerefu endaalo choosi pe. Nae oluya lwa Nafutaali lwoosi lwaheengao ohwehalaka hu siko sya Yerusalemu esyo.

⁵ Nae koti buli muundu w'oluya luno lu yaholaanga, kata abomu daala lyeefwe lyeene, boosi-boosi bachichaanga mu siko sya Daani esiri mu ngulu ch'emukulu wa Galilaaya, ohuyaana ebiyaanwa eyiri esifwaanani sie emoosi Bbaali, esyaloongwa mu saabbu, si Yerobboamu omutuki wa Yisiraeli yataao.

Obweesikwa bwa Tobbiti mu diini yae

⁶ Nae ese syeeng'ene niise owachichaanga buli siha Yerusalemu ohuhusa endaalo huluundu ech'ediini, koti lu malako ka Musa kalagira buli muundu mu Yisiraeli ohuholaanga. Ndayiraanga ebyaamo bitaangira neende silala sy'ehumi esy'ekesa litaangira neende obwooya butaangira ohubekwa hu makoondi kaange. Ndaberesaanga ebiyaanwa bino eyiri abalaamisi ab'enono ya Arooni, ababiyanaangayo eyiri Nasaae hu alutaari.

⁷ Ndayaanaangayo silala sy'ehumi esy'ebyaamo byaange byoosi eyiri Abaleefi, ababiyaaniraanga Nasaae mu Yerusalemu. Buli mwaaka, ohumalaho omwaaka kwahataanu-na-chibiri, ku loba lyaleherwaangaho ohuwuluuha, ndakusaanga silala sy'ehumi siindi esy'ebiindu byaange, mani eseende chituliremo ndachehoonyeraanga ninjiire hu bidyaalo by'endaalo huluundu mu Yerusalemu.

⁸ Silala sy'ehumi syohudatu, ndasiberesaanga koti omulimo kwaange eyiri abahasi bafwiirwe neende bamulehwa, koti lu nguuhwa yaange Debora, ng'ina kuuka yaange Ananieli yalagira ohuholaanga, olwohuba syesi ndali ndadoong'a ni ndi mulehwa, laata yaange n'amalire ohufwa.

Obweesikwa bwa Tobbiti naali mu buwaambe

⁹ Nae nindahula, ndadeehya Ana, mulala hu b'enono yaange, hweebula omwaana musyaani, nihumukuliha eliita huti Tobbiasi.

¹⁰ Nae nindayirwa mu buwaambe mu Asiria ni ndi omuboye, sino nisyo esyakera ndaaba mu Ninefe. Nihuli eyomu Ninefe, bamwaanaama boosi neende abeeho baange boosi, balichaanga ebyahulya by'abaandu bateende.

¹¹ Nae ese ndahaya ohubirichaanga,

¹² olwohuba ndomiirira hu Nasaae waange neende omwooyo kwoosi.

¹³ Mani Nasaae w'Aakulu Muno, yakera omutuki Salimanesa yandaha, mani yaamberesa omulimo kw'ohumukuliraanga buli siindu sy'adaha.

¹⁴ Omutuki oyo n'asisiiri ohufwa, ndachichaanga amahabi maangi muno Media ohumukulirayo ebiindu. Oludaalo luundi, ndali mu siko sya Ragesi esiri mu Media, mani nimbiihisa Gabaeli, mwanaang'ina Gabburia ebituundu ehumi eby'efeesa.

¹⁵ Nae Salimanesa niyafwa, omwaana wae olaangwa ati, Senakeribbu niye owakobola mu makulu kae koti omutuki. Ao mani engira chichia mu Media nichiikalwao, ninjakama ohuchiayo.

Tobbiti asiiha abafu

¹⁶ Mu ndaalo ch'obutuki bwa Salimanesa, ndadebaanga muno hu Bayudaaya basyaange.

¹⁷ Ndaberesaanga abalumwa enjala ebyohulya, abo abataali neende esy'ohwefwaala, ndababeresaanga engubo. Haandi nindabonaanga omulaambo kw'Omuyudaaya nikusukuunwe erwaanyi w'esida sy'esiko Ninefe, ndakusihaanga bulai.

¹⁸ Nae omutuki Senakeribbu niyeetaanga omuundu yeesi owiruuhe ohutula mu Buyudaaya, ndamusihaanga bweekisi. Olwohuba mu tima lyae, yeeta abaandu baangi muno. Nae omutuki niyakoonyaanga emilaambo, haba siyakinyolaanga daawe.

¹⁹ Mani mulala hu baandu bamenya mu Ninefe naachia n'aboolera omutuki ati niise owali nisiihaanga abaandu ba yali niyeetere. Nae nindamanya endi omutuki amalire ohumanya ebindiiraho, haandi endi ali ohungiiya, ndatya mani ndeeruha ndeekisa.

²⁰ Mani ebiindu byaange byoosi nibinyakwa. Sibulao esiindu syoosi sindadoong'a nasyo, ohumalaho omuhasi waange Ana, neende omwaana waange Tobbiasi boong'ene.

Omwiiwa wa Tobbiti amwaabina

²¹ Nae endaalo amahumi kataanu haba sichabitao daawe, abaana babiri ba Senakeribbu nibamwiita, mani nibeeruhira mu ngulu cha Araraati. Mani omwaana wae olaangwa ati Esaradooni n'akobola mu makulu kae koti omutuki. Esaradooni niyalobola Ahikari, omwaana wa mwanaang'ina Asaheeli, yamuberesa omulimo kw'obuliindi mu bwaami bwae bwoosi neende mu butuki bwoosi.

²² Ahikari wuno, yandekongooyera eyiri omutuki mani ningobola Ninefe. Ahikari wuno yali omuliindi w'ebyoohung'wa haandi niye owali n'abiiha ahabonero h'omutuki, haandi niye owali n'ahulira eby'embaliirira yomu syaalo, olwohuba Esaradooni yali yamudoola ohuba omuloondakiriraho. Ahikari yali omwiiwa waange.