Tito 3 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ebiima by'Abakristo

¹ Yichulisa abaandu bao oti bahoyere ohuberesaanga abeemirisi neende ab'obunyala oluyaali, babecheenge abawulisi, haandi abeetekefu ohuhola bulai omulimo kwoosi neende obweesikwa.

² Bakerakire batalomalomaanga bubi hu muundu yeesi, bahaye ohusoolanaanga, nae babecheenge abaloonga, haandi beekeseenge eyiri abaandu boosi bati b'ebiima bilai nibo.

³ Olwohuba efwe fwesi abeene hale hwalichiingi abasiru, abajeemu, abakota. Hwalichiingi nihuli abawaambe b'obulamu bw'obwekoombi bweefwe bubi, neende ohwesaangaasa hwa buli ngeri. Hwalichiingi abeetima haandi ab'ehiinda. Abaandu bali nibatuhaya, haandi fwesi nihwahayana abeene-na-beene.

⁴ Nae obulai neende esisa sy'obuheeri bwa Nasaae Omuwonia weefwe nibyabonehana,

⁵ yeemao yaatuwonia. Haba siyatuwonia olwohuba hwali nihuholere esiindu silai mu buluungifu bweefwe, nae yatuwonia ohweema hu sisa syae syeene. Yatuwonia yaatwooka hweebulwa ehabi lyohubiri, mani hweehola abayaaha mu Mwooyo Mwoolerefu.

⁶ Nasaae yatuchuhaho Mwooyo Mwoolerefu wae mu buungi ohubitira mu Yesu Kristo Omuwonia weefwe.

⁷ Sino syeeholeha hu hunyale ohulabiswa hulw'embabaasi chae, hu hunyale ohuba abasiha b'obulamu butaakama bu husuubiramo.

⁸ Emboosi chino chadyeeri. Ndaha womiise ebiindu bino, hu abo abali Abakristo mu Nasaae banyale ohumaliirira ohuhola ebihole bilai. Ebiholwa bino bilai muno haandi bihoonya buli muundu.

⁹ Nae oteeyingisaanga mu mayiingani k'obusiru, ohuhweesana hw'obuungi bw'enjibulo, obusoolo, neende emyeero kidiira hu huhalaka amalako. Olwohuba ebiindu bino byoosi bibulamo obuhoonyi haandi by'ebihaya sa.

¹⁰ Teemaangaho ohukerakira omuundu wugoongania naakabuhania abaandu ehabi lala oba amahabi kabiri koong'ene sa, noomala otyo, lehaniraanga nae elalira.

¹¹ Manyaanga oti omuundu koti oyo yamala ohulema haandi ebihole byae bibi byeekesa biti yamala ohweheengera omusaango.

Engeraka yimaliirihayo.

¹² Niihutumira Ariteema oba Tikiku, yanguyaangaho ohwiicha yi ndi mu Nikopooli, olwohuba heengereo ohuba eyomu ndaalo ch'etoocho.

¹³ Teemaho koti lwoonyala ohuhoonya Seena omunamalako neende Apolo beetekehe ohuchaaka olukeendo lwaabwe. Haandi teemaho obone oti bali neende buli siindu si bahoyera hu lukeendo olwo.

¹⁴ Haandi yoomisira abaandu beefwe oti bahoyere ohweeka ohuholaanga ebiindu bilai, hu banyale ohuba abeetekefu ohuhoonyaanga mu bidinyu bikwaao bwaangu, bahayeenge ohubechaanga sa ao nibabula obuhoonyi bwoosi.

¹⁵ Abaandu ba ndi nabo boosi bahuheesere. Wesi heesa abaandu batuheera bali eyo, haandi ab'efukiirira ndala naafwe. Nasaae ababerese embabaasi mweesi.