Tito 2 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Enjekesa yadyeeri

¹ Nae ewe, ohoyere ohweekesa ebifukiirisania neende enjekesa yadyeeri.

² Yekesa abasaacha bahuluundu bahaye ohubechaanga abameesi, nae babecheengemo amakesi, babecheenge ab'efukiirira ndai, ab'obuheeri bulai, haandi abeesimiirisi.

³ Mu ngeri nasilala eyo, yekesa abahasi bahuluundu beebiseenge koti abahasi bali neende obulamu bwoolerefu buhoyera. Bahae ohubechaanga abamoonyi oba abawaambe b'obumeesi. Bahoyere ohweekesaanga ebihole bilai,

⁴ hu banyale ohweekesa abahasi baraaga ohuheeraanga abasaacha baabwe neende abaana baabwe,

⁵ ohuba abeliinda, abataaliho esibi, haandi ohubechaanga abahasi bomu daala abalai, haandi abawulira abasaacha baabwe, hwaabuleo omuundu yeesi ochia ohulomalomaanga bubi hu Mboosi yitula eyiri Nasaae.

⁶ Mu ngeri nasilala eyo yekesa abaraaga beegeendereseenge haandi beetuka abeene.

⁷ Nae mu biindu byoosi ewe omweene ohoyere ohubechaanga esyohuboneraho sy'ebiima bilai. Bechaanga owadyeeri haandi omumaliirifu mu njekesa yao.

⁸ Wehoonyereenge emboosi ndai chitayiinganisibwa, hu basuku bao banyale ohudiirwa esoni nibahaywa ohuba neende esiindu sibi syoosi sibahatulomalomaho.

⁹ Abawaambe bahoyere ohuwuliraanga abaami baabwe, haandi ohubasaangaasaanga mu buli siindu. Sibahoyere ohukalusanianga neende abaami baabwe,

¹⁰ oba ohubeebaangaho. Nae bahoyere ohweekesanga bati balai haandi beesikwa mu buli siindu, mani mu buli siindu si bahola, abaandu banyale ohusiima enjekesa yidiira hu Nasaae Omuwonia weefwe.

¹¹ Olwohuba Nasaae yamala ohweekesa abaandu boosi embabaasi chae ech'ohubaonia.

¹² Embabaasi echo chitweekesa ohwebwaaba obulamu butatya Nasaae, neende obwekoombi bw'obulamu bwomu syaalo, mani hu hunyale ohweetuka abeene, ohuba abaluungifu, haandi abatya Nasaae mu syaalo muno,

¹³ nihuliindiriire Oludaalo lwoolerefu lu husuubira, lu luyaali luhoongo lwa Nasaae weefwe neende Omuwonia Yesu Kristo lwahabonehereho.

¹⁴ Kristo yeyaanayo hulweefwe mani yaatununula mu bibi byoosi, haandi neende ohutulabya hube abaandu bae aboolerefu beene, haandi abadaha huhola ebiindu bilai.

¹⁵ Beekese ebiindu bino byoosi, haandi wehoonyere obunyala bwao bwoosi noobagumia emyooyo haandi niwoolobya abahutekeeresa. Leha omuundu yeesi atahulekeeresaho.