Tito 1 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Ebbarwa yitula eyiri Paulo, omuhalaabani wa Nasaae haandi omutume wa Yesu Kristo. Ndadoolwa haandi ndatumwa ohuhoonya efukiirira y'abaandu ba Nasaae yadoola, neende ohubeemerera banyale ohumanya obwadyeeri bweekeswa mu diini yeefwe,

² eyeemere hu suubi ly'obulamu butaakama. Nasaae otabacha yatusuubisa hale esyaalo nisitaaloongwa obulamu butaakama buno.

³ Nae endaalo chihoyera nichoola, yatweekesa emboosi yino. Yandiisa emboosi yino, haandi njaala koti lu Nasaae Omuwonia weefwe yaanduma.

⁴ Nyandiikira Tito omwaana waange wumbulira mu fukiirira yituwambaania. Lehe Nasaae Seefwe, neende Omuwonia weefwe Yesu Kristo ahuberese embabaasi neende omuleembe.

Omulimo kwa Tito mu Kireete

⁵ Ndahuleha mu Kireete endi onyale ohukolola ebiindu byali nibisiidaha ohukololwa, haandi oteeo abeemirisi b'Abakristo mu buli siko.

⁶ Yichulisa oti, omwiimirisi yoodoola, ahoyere ohuba otaaliho esiindu syoosi si bamwekanyiirisaho, haandi ahoyere ohuba naali omusaacha w'omuhasi mulala. Haandi abaana bae bosi hahoyeere ohuba Abakristo, haandi sibahoyere ohuba abaalaba, oba abatawulira amalako.

⁷ Koti lwaali omuhalaabani wa Nasaae, omwiimirisi w'Abakristo ahoyere ohuba nataaliho esiindu simwekanyiirisaho. Haba s'ahoyere ohuba omuundu w'esuunga, oba onyoolera bwaangu, oba omumeesi, omwaalaba, oba ow'omutoolyo.

⁸ Ahoyere ohuba owaakaanira abakeni bulai, haandi owaheera ohuhola ebiindu bilai. Ahoyere ohuba omuundu weetuka omweene, omuluungifu, omwoolerefu, haandi ow'ebiima bilai.

⁹ Ahoyere ohuba omuundu womiirira hu mboosi yadyeeri koti lu yeekeswa, hwaanyale ohweekesa abaandu baandi enjekesa yadyeeri alala neende ohwakamya abo abateemaho ohuyiingania enjekesa eyo.

¹⁰ Olwohuba aliwo abayiingani baangi, ohuhirira elalira Abayudaaya beehola Abakristo mu Kristo, abajeemu haandi ababachirisa abaandu neende emboosi chibulamo obuhoonyi.

¹¹ Enjekesa yaabwe yihoyere ohwakamisibwa, olwohuba babita mu madaala k'abaandu nibeekesa ebitahoyera ohweekeswa nibachiiririra ohweyiindiyasa abeene.

¹² Mulala hu Bakireete beene, omunabbi waabwe yaboola ati, “Abaandu ba Kireete babacha muno, manani mabi, b'omutoolyo nibo haandi bakata beene.”

¹³ Sakira omuundu wuno yaboola obwadyeeri bweene. Mani sakira mubaakamisire elalira n'amaani, hu banyale ohuba neende efukiirira yadyeeri.

¹⁴ Mani haandi bahaye ohuhayira hu ngano hale ch'Abayudaaya, neende amalako k'abaandu balekeereswa.

¹⁵ Eyiri abaandu baluungifu, buli siindu syoosi siluungifu, nae eyiri abaandu b'omufuto, haandi abataali neende efukiirira, abulao esiindu siluungifu; ebibaaso byaabwe neende ohumanya hwaabwe byamala ohunyaasiha.

¹⁶ Beeyira koti abamanyire Nasaae, nae ebihole byaabwe, byeekesa biti haba sibamudaha. Basyuulana, haandi sibadaha ohuwulira amalako.