Olweembo Luhira mu Nyembo 8 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO1 Ndeekoomba sa niwahabeere mboocho yaange, mani maama yaaba niye owahunuunia hu lubeere lwae. Mani niimba nindahweeduuyaho hu ngira, mba ndahahuchunjuunire nae yabulao oyo yeesi owesiinduha. 2 Mba ndahuyira mu nyuumba ya mako yaange, mu wahanjekeseere obudya bweene. Mba ndahahubereese efiini enuunge efiini y'obutuunda ong'we. 3 Omuhono kwo mukaada kuli aasi w'omutwe kwaange, nae omuhono kwao muluungi kuumbabaasa. 4 Musuubise, eng'we abahasi bomu Yerusalemu, muti haba simuchia ohudoondobania obudya bweefwe. Olweembo lwa hasaasaba Abahasi 5 Wiina mweene wuno oli ohutulira mu siparara, ni yengisaaniemo amahono neende omudya wae? Mu siiniha sy'omusaala kw'olutuunda nimwo mu ndahusimusira, abuundu yi webulirwa bweene. Omuhasi 6 Yikala omwooyo kwao eyiri buli bwekoombi ohutusaho obwaange; otadiiraho omuundu yeesi mu mahono kao ohutusaho ese syeeng'ene. Obudya bw'amaani koti ohufwa; obwekoombi bwaangalafu koti ohufwa hweene. Hutubuha sa omuliro kwaaduha haandi bweereba koti omuliro kubbabbuluha. 7 Amaachi haba sikanyala ohubusimya; abulao omuhula kunyala ohubumira. Nae nabaao oyo yeesi oteemaho ohukula obudya neende omwaandu, okusinye kwoong'ene nikwo kwaaba yetekehere ohunyoola. Bamboochoong'ene Omuhasi 8 Efwe huli neende mboocho yeefwe muyere, haandi embeere chae chisisiiri endiidi. Siina syeene sihunaamuholere omusyaani naaba naachia ohwiicha ohumuserera? 9 Aba ali esida, hwahamwoombahiire omunaara kw'efeesa. Aba ali esiruwa, hwahamusitiriire neende embaao ch'omuseengese. Omuhasi 10 Ese mbano ndi esida, haandi embeere chaange nichio eminaara chasio. Omudya waange amanyire sa ati ni ndi nae nyoola omwiikuto neende omuleembe. Omusaacha 11 Solomooni ali neende omukuunda kw'ebyaamo abuundu alaangwa Bbaali Hamooni. Aliwo abalimi baandi abakupaangisaangaho buli otula atungaanga amatoongolo k'efeesa elifu ndala. 12 Solomooni asangaaliraanga amatoongolo elifu kae ako, nae abalimi nabo basaangaalira amatoongolo emia chibiri koti omukabo kwaabwe okwo; Ese naange ndi neende omukuunda kw'ebyaamo kwaange syeeng'ene! 13 Mani leha ese mweene mbulireho ekono lyao koti lu litulira mu mukuunda omwo, omudya; abasyaange bosi baliindiriire ohuwuliraho noolomaloma. Omuhasi 14 Suda yi ndi, mudya waange, koti emboongo, koti sa esurusi ndoto niyiri hu ngulu chihulaho ebiluungo. |