Olweembo Luhira mu Nyembo 2 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Ese ndi sa esimuli syomu siino mu Saroni, esimuli siri mu hooho ly'engulu.

Omusaacha

² Koti lu esimuli siri mu mawa Nilwo lu mukoosi waange ali mu bahasi boosi.

Omuhasi

³ Koti omupeera kwahaba akatikaati w'emisaala kyomu sichaha, nilwo lu muheerwa waange anyala ohukeraaniswa neende abasaacha baandi. Ese ndaheera muno ohwiihalaanga mu siiniha syakwo, mani esyaamo syakwo siinyunyuulira nisihoombaho.

⁴ Yandeeta mu nyuumba y'emideeho yae mani yambwiihaho ebbeendera y'obudya.

⁵ Ngobosemo amaani neende emisabbiibbu myoomu mani wunjoong'olose neende amapeera! Kambweere hulw'ohwekoomba.

⁶ Omuhono kwae mukaada kuyikiihe omutwe kwaange, nae omuhono kwae muluungi kwedinyiise sa ohumbabaasa omubiri kwoosi.

⁷ Musuubiseho mani, eng'we abahasi bomu Yerusalemu; mwechubire ebijusu by'embiro neende emboongo cheene muti haba simuchia ohudoondobania obudya bweefwe daawe.

Olweembo lwa habiri Omuhasi

⁸ Ndi ohuwulira ekono ly'omudya waange. Ali ohwiicha embiro niyeehirira engulu, yehirira engulu embiro niyeecha yi ndi.

⁹ Omudya waange ali koti esijusu, koti esurusi yiyambire. Mbao yeemere yegeeng'ere hu sida. Ali ohuleengeseraanga mu nyuumba mu dirisa haandi alengeesera mundekeyi.

¹⁰ Omudya waange alomaloma naange. Yichaano mani, omudya; omukoosi waange, yicha huweeo fweembi.

Omusaacha

¹¹ Etoocho liweere; efula yakaame;

¹² mu ngoongo ebimuli bimuliihe. Sino nisyo esiha sy'ohweemberamo; olweembo lw'amaguugu luli ohuwuliirihanira mu mikuunda.

¹³ Enduli chichaakire ohweenga; emboo yichuule esingiaari sy'emisabbiibbu kiri ohumuliha. Yichia mani, omudya; omukoosi waange, noonde huweeo fweembi

¹⁴ Ewe oli koti eguugu lyeekisaanga mu lwaafwa lw'olwaanda. Leha ndewuunjeho esiiso sy'obweeni bwao haandi mbulireho ekono lyao lai.

¹⁵ Diira amabbwe, amabbwe madiidi, nikatanyaasa omukuunda kweefwe kumuliihe.

Omuhasi

¹⁶ Omudya waange, waange syeeng'ene, haandi syesi ndi owae yeeng'ene. Yaaya ebyaayo byae mu bimuli

¹⁷ ohwoola lu emboo yomu mabwiibwi yichaake ohuwuucha mani esiro nisihamyuuhao. Ngobolere, omukoosi waange, koti emboongo, koti sa esurusi yiyambire hu ngulu cha Bbeteeri.