Sekaria 7 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Omwaami yoolobya ohusiiba hutaali ohwadyeeri

¹ Mu mwaaka kwa hane Dario naali omutuki, hu ludaalo lwa hane lw'omwoosi kwa hataanu-na-hane (omwoosi kwa Kisilefu), Omwaami yamberesa emboosi.

² Abaandu ba Bbeteli yali naatumire Sareseeri neende Regemu-Meleki neende abasaacha baabwe ohuchia eyiri Enyuumba ya Nasaae y'Omwaami w'Obunyala ohusaba ehabi ch'Omwaami

³ haandi neende ohuteeba abalaamisi alala neende abanabbi esiteebo sino siti: “Mani efwe huhoyere ohwemeeda ohulirikanaanga sa, mbwe koti Enyuumba ya Nasaae yasihiriswa, ni husiibaanga mu mwoosi kwa hataanu koti lu hwamenya ni huholaanga hulw'emyaaka emiingi bulaanu kose?”

⁴ Yino niyo emboosi y'Omwaami eyanjichira.

⁵ Yaboola ati, “Boolera abaandu bomu syaalo muno neende abalaamisi oti koti lu basiibaanga haandi nibalira mu mwoosi kwa hataanu haandi neende mu kwa hataanu-na-habiri ohumalaho emyoosi kino amahumi kataanu-na-kabiri emilaamba (70), haba sibyamberesaanga oluyaali daawe.

⁶ Mani koti lu balichaanga haandi bang'wa, byalichiingi sa hu hweeyikusa abeene.”

⁷ Sino nisyo esiindu si Omwaami yaboola ohubitira mu banabbi bahale, mu biha bi Yerusalemu yali ni yahulaahulana, haandi niyeechulamo abaandu, haandi abaandu baandi nibamenya ataali mu biko byebodoohania ebiko bihunuufu, nae kata neende mu bituundu by'esyaalo esyo ebiri emwaalo, haandi kata neende mu nandaalira w'ebigulu biri emuumbo.

Obutawulira, butulirimo ohwiiruhira eyale

⁸ Omwaami yaamberesa emboosi yino eyichiira Sakaria.

⁹ “Hale-na-ahaandi, ‘Ese ndaberesa abaandu baange ebilagiro, ewe ohoyere ohubona oti obwadyeeri buholwa, haandi muhoyere ohweekesa esisa neende esasaakisi eyiri buli muundu.

¹⁰ Mutafwiinyiriraanga abahasi bafwiire, abaana balehwa, abateende babamenyamo, kata sa neende buli muundu yeesi odaha obuhoonyi. Haandi mutahobanaanga.’ ”

¹¹ “Nae abaandu beehoonyera sa obutawulira mani baahaya ohutekeeresa. Benyiira sa

¹² mani boomya emyooyo kyaabwe koti olwaanda. Mani koti lu bali nibatachia ohutekeeresa enjekesa yi ndabatumira ohubitira mu banabbi bali ni bamenyao hale, ndanyoolera muno.

¹³ Mani koti lu bahaya ohutekeeresa nindali niinomanoma, syesi ndahaya ohubakobolamo nibalaama.

¹⁴ Koti esifuusye, ese ndabeeya sa ndaabamalao, baachia baamenyaanga mu byaalo biteende. Mani esyaalo silai sino syalehwa syeehola ekuunda, yaabulao oyo yeesi osimenyamo.”