Sekaria 5 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ohuboneherwa hw'Olupapula lusiriingise nilubburuuhe

¹ Haandi ndeecha ndaatingaala, nae bulaanu ehabi lino ndabona olupapula lusiriingiswe nilubburuuhe niluleraalera aakulu mu bbaanga.

² Malaika oyo yandeeba esiindu si ndali nimbweeneho. Ese naange ndakobolamo endi, “Ngaandi olupapula lusiriingise nilubburuuhe mu bbaanga; lwali niluli emiita chitaanu-na-chine obuleeyi, nae chine neende esituundu obubaambali.”

³ Malaika oyo yamboolera ati, “Mani hu bweene ohwo hwandiikirweho esibwaabo sichia ohulaanda simale esyaalo sino syoosi. Hu lwaande lulala olw'olupapula olwo, obwandiike buboola buti buli mwiibi yeesi achia ohweeywa amalwe mu syaalo muno mwoosi; nae hu lwaande luundi obwandiike buboola buti, buli muundu yeesi owechuba naabacha sa yesi achia ohweeywa amalweo.

⁴ Omwaami w'Obunyala bwoosi aboola ati achia ohutuma esibwaabo sino sisalaane, mani sinyale ohwiingiraanga mu buli nyuumba y'omwiibi yeesi, haandi neende mu nyuumba y'oyo owechuba naabacha. Sicha ohudoong'aanga mu nyuumba chaabwe mani sichileheenge nichiri amakuunda sa.”

Ohuboneherwa hw'omuhasi oli mu simweero

⁵ Haandi malaika wula yakobola ehabi liindi mani yaboola ati, “Ewe obweeneho! Esiindu siindi haandi siri ohwiichayo!”

⁶ Naange ndamuteeba endi, “Siina syeene haandi?” Nae yangobolamo ati, “Ngaandi simweero nisyo, nae syeekesa esyonoono sy'esyaalo sino syoosi.”

⁷ Esimweero sino syaliho esifuuniho syaholwa mu sibya syoomeranu. Nae koti lu ndali ni ndi ohutingaalaanga, esifuuniho esyo syafuunulwa, mani ndaabona mukati nimwiihaalwemo omuhasi!

⁸ Malaika oyo yaboola ati, “Sino syeekesa obwonooni.” Mani yaafwiinyirira omuhasi oyo mu simweero omwo yaafuunihaho esifuuniho esyo.

⁹ Ndeecha ndaatingaala aakulu mani ndaabona abahasi babiri nibali ohubburuha aakulu nibeechera yi ndi neende embaya nyaangalafu muno koti ech'awudu. Bayuulao esimweero esyo mani nibabburuha nasyo nibawaao.

¹⁰ Ndateeba malaika oyo endi “Abo bali ohusiyira yeena bweene?”

¹¹ Nae yakobolamo ati, “Ngaandi mu Bbabbilooni, yibachia ohusyoombahira enyuumba ya nasaae yasyo. Enyuumba ya nasaae eyo niyiba niyiweere esimweero esyo sichia ohuteebwamo mani siinamirweenge.”