Sekaria 3 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Omunabbi aboneherwa Omulaamisi Muhuluundu

¹ Mu hubwiihulirwa huundi, Omwaami yaanjekesa Omulaamisi Muhuluundu Yosua niyeemere mu moni wa malaika w'Omwaami. Nae endulo wa Yosua Sitaani niyeemereo, niyetekeehe ohumutaaho omusaango.

² Malaika w'Omwaami oyo yaboolera Sitaani ati, “Omwaami ahoya yaahuheengera omusaango ohuhuhira ewe Sitaani! Omwaami waheera Yerusalemu ahoya yaahuheengera kwaahuhira. Omusaacha wuno ali sa koti olusaala lwasihulwa lwaatuswa mu muliro.”

³ Yosua yali niyeemere abweene ao, nafwaalire engubo mali.

⁴ Malaika oyo yaboolera abahalaabani bae bali muukulu ati, “Fwaalule omusaacha oyo engubo mali chi yefwaalire echio.” Yakaluuhanira Yosua mani yaamuboolera ati, “Ese mbao malire ohuhufwaalulaho esyonoono syao haandi njia ohuhuberesa engubo njaaha ech'ohwefwaalaanga.”

⁵ Mani yaalagira abahalaabani abo ohufwaasa Yosua enjuunga njose muno hu mutwe kwa. Bosi bahola sa batyo, mani baamufwaasa engubo njaaha, malaika w'Omwaami oyo niyeemere sa ao nateereho emoni.

⁶ Bulaanu malaika oyo yeemao yaboobera Yosua ati

⁷ Omwaami w'Obunyala bwoosi aboolere ati, “Noofunihira amalako kaange mani waahola emirimo ki hubereese kino, oba ochia ohuchiiririra obechaanga omuhoongo w'Enyuumba yaange, alala neende ebyoombahe bichiiraho byoosi, haandi mba njia ohuwuliraanga esaala yao koti sa lu mbuliraanga echia bamalaika ba ndamenya nabo.

⁸ Ewe tekeeresa mani Yosua, ewe oli Omulaamisi Muhuluundu; haandi tekeerese eng'we abalaamisi baasye, eng'we niing'we esilolero sy'obulamu bulai bwiicha. Ese njia ohutuumbula omuhalaabani waange, olaangwa Esaga!

⁹ Ese njia ohuta mu moni wa Yosua ekina lala lyoong'ene eliriho enyaande chitaanu-na-chibiri. Njia ohukasaataho obwandiike, mani mu ludaalo lulala lwoong'ene njia ohumalao esyonoono sy'esyaalo sino syoosi.

¹⁰ Mani oludaalo lweene olwo nilwahoole, buli mulala hweeng'we achia ohukeendaanga owaasye ohwiicha nimweehoyera mu muleembe neende mu buliindi bulai, nimubodohaanwe neende emikuunda ky'ebyaamo kyeeng'we haandi neende eky'enduli kyeeng'we.”