Sekaria 1 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Omwaami alaanga abaandu bae bamukobolere

¹ Mu mwoosi kwa hataanu-na-hadatu okw'omwaaka kwa habiri Dario naali omwaami wa Perisia, Omwaami yatusa emboosi yino niyehoonyera omunabbi Sakaria, omwaana wa Bberekia haandi omwiichuhulu wa Yido.

² Omwaami w'Obunyala bwoosi yaboolera Sakaria ohuboolera abaandu ati, “Ese, Omwaami, ndanyoolerera muno bakuuka yeeng'we,

³ nae bulaanu ndi ohubaboolera endi, ‘Mukaluhe yi ndi, mani syeesi mba njia ohukobola yi muli.

⁴ Mutaba koti bakuuka yeeng'we daawe. Hale-na-ahaandi abanabbi babaleeteraanga emboosi yaange, nibababoolera obutamenyaanga obulamu bubi daawe, nibali mu bwonooni haandi. Nae abo haba sibaambulira kata sa ohuunjisamo oluyaali.

⁵ Mani bakuuka yeeng'we alala neende abanabbi abo haba si basisiiri abalamu bulaanu buti.

⁶ Ohubitira mu banabbi baange ese ndanyala ohuberesa bakuuka yeeng'we ebilagiro neende ohulabula, nae haba si babifwaaho daawe, mani baatusamo ohusaanda ohwo. Nae beeyolobya mani beeyekesa baamanya bati, ese, Omwaami w'Obunyala, niise owali nimbasaandya koti lu bali nibahoyera, haandi koti lu ndali omweene ni maliriire ohuhola endyo.’ ”

Ohuboneherwa hw'Efaraasi ohw'Omunabbi

⁷ Mu mwaaka kwa habiri Dario naali omwaami, hu ludaalo lw'amahumi kabiri neende hane olw'omwoosi kw'ehumi neende mulala (omwoosi kwa Sebbaati), Omwaami yaanjekesa emboosi ohubitira mu hubwiihulirwa esiro.

⁸ Ese ndabona omuundu wuundi naali ohwiirusa efaraasi ya ranjaayi. Yali niyeemereho mu misaala ky'amawa mu hooho, nae enyuma wae chaliyo efaraasi chiindi, eya ranjaayi, emali neende eya dibbo.

⁹ Ese ndamuteeba endi “Omuhuluundu, efaraasi chino choosi cheekesa siina syeene?” Nae yakobolamo ati, “Ese njia omweene ohuhweekesa amahuluundu kachio.

¹⁰ Omwaami niye ochitumire ohwiichia ohulambuula esyaalo sino.”

¹¹ Nachio chachia chiabuula eyiri malaika chiti: “Efwe humalire ohuswaania esyaalo syoosi mani hunyoolere huti, esyaalo syoosi syakwa ekata haandi syafuunihwa.”

¹² Nae malaika oyo yaboola ati, “Omwaami w'Obunyala, ewe wanyoolerera muno Yerusalemu, alala neende ebiko bya Yuda ohumala embaka y'emyaaka amahumi kataanu-na-kabiri ohwoola bulaanu buti. Byahoole yeena hu ewe onyale ohubakwiira esisa?”

¹³ Omwaami nae yakobola mu malaika oyo neende emboosi chilemya omwooyo,

¹⁴ mani malaika oyo yamboolera ohulaangirira ebyo bi Omwaami w'Obunyala yali n'aboolere ati, “Ese mbulira obuheeri bw'amaani neende ohuchuunirwa hw'amaani eyiri Yerusalemu, esiko syaange syoolerefu esyo,

¹⁵ nae nyoolereere muno ebyaalo ebyo ebiri ohwehoyera mu muleembe neende obuyenjeefu. Hulw'esiha sidiidi, ese mbeere ni ndeliindire neende etima lyaange eyiri abaandu baange, ebyaalo ebyo ebyameeda ohusaandya abaandu baange.

¹⁶ Mani ese mbano malire ohukobola mu Yerusalemu ohweekesa esiko esyo esisa. Enyuumba ya Nasaae yaange yicha ohukoboswa buyaaha, haandi esiko syosi syoombahwe buyaaha.”

¹⁷ Malaika wuno yesi yamboolera ohulaangirira endi: “Omwaami w'Obunyala aboola ati, ebiko byae bichia ohuhula-hulana haandi, haandi ehabi liindi njia ohuhoonya Yerusalemu haandi ndeebale esiko syeene sino sibe esyaange hu bwaange.”

Ohuboneherwa hw'enjika

¹⁸ Mu hubwiihulirwa huundi ndabona enjika ch'endaawu chine.

¹⁹ Bulaanu ndateeba malaika wali naali ohulomalomaanga naange endi, “Enjika chino cheekesa siina syeene?” Nae yakobolamo ati, “Chino chihiihirira amaani kakabuhaane akatuka esyaalo sino akanyalaanga ohusalaaniaanga abaandu ba Yuda, Yisiraeli neende Yerusalemu.”

²⁰ Bulaanu Omwaami yanjekesa abahalaabani b'emirimo bane nibali neende enyuundo.

²¹ Ese naange ndateeba endi, “Nae bano beechere ano ohuhola siina syeene?” Nae yakobolamo ati, “Ngaandi beechere ohuteengya haandi ohukaluuhania obwaami bw'ebyaalo byali byanyuhuulira elalira esyaalo sya Yuda mani byasalaania abaandu basyo.”