Sefania 2 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Omulaango kwa ohweeyolobya

¹ Eng'we esyaalo sitaalimo esoni, kaluhemo amakesi

² nimutaadumuulwa koti omuhuuchi kudumuulwa neende omuyaka, etima libira ly'Omwaami ni litaboolaho, oludaalo olwoo nilutoola lu yeekeseraho etima lyae.

³ Kaluhire Omwaami, eng'we mweesi abaandu bae baloonga abohu syaalo huno, mani mweefunake abeene mu moni w'Omwaami. Awuundi munyala mweebalula esibonereso hu ludaalo olwo lu Omwaami achia ohweekeseraho etima lyae.

Amasira k'ebyaalo byebodoohania Yisiraeli

⁴ Abulao oyo yeesi ochia ohunyala ohudoong'ao mu siko sya Gasa. Asikelooni sichia ohujwaang'wa. Abaandu ba Asidoodi bachia ohwiirusirwa mu situundu bw'oludaalo lulala haandi abaandu ba Ekironi bosi bachia ohwiiruswa batule mu siko syaabwe.

⁵ Chibaakaanire Abafilisiti eng'we abaandu bamenya hu lwaasi. Omwaami amalire ohubaheengera omusaango. Achia ohubasihirisa, mani abuleo kata mulala onyala ohudoong'ao.

⁶ Eloba lyeeng'we liri hu lwaasi lichia ohuba endalo haya echeechulamo ebikaali by'abaayi neende ebidwooli by'amakoondi.

⁷ Abaandu ba Yuda abachia ohudoong'ao nibo abachia ohumenya mu loba lyeeng'we elyo. Bachia ohwairaanga ebyaayo byaabwe mu bweene omwo, nae amakoondi mu nyuumba cha Asikelooni. Omwaami Nasaae waabwe achia ohubechaanga nabo mani abahola bayiindiyala haandi.

⁸ Omwaami w'Obunyala bwoosi aboola ati, “Ese malire ohuwulira abaandu ba Moabbu neende ab'Amooni nibanyeka haandi nibasaandya abaandu baange, haandi nibesuunga bati kata bachia ohunyala ohuwaamba esyaalo syaabwe.

⁹ Koti lu ndi Omwaami mulamu, Nasaae wa Yisiraeli, ndeechuba endi Moabbu neende Abaamooni bicha ohusihiriswa koti Sodomu neende Gomora byali. Bicha ohweehola bibe koti abuundu w'ameena k'omuunyu neende omusihiriro kutaakama, okwasiha. Hu baandu baange abachia ohunyala ohuwonamo nibo abachia ohubaseenakira mani bayire esyaalo syaabwe.”

¹⁰ Eyo niyo emera yi baandu ba Moabbu neende ab'Amooni bachia ohusaandisirwamo hulw'esuunga yaabwe neende ohudyaabuha hwaabwe haandi hulw'ohunyeka hwaabwe hw'abaandu b'Omwaami w'Obunyala bwoosi.

¹¹ Omwaami achia ohubateengusa. Achia ohuhuunyia banasaae b'esyaalo bahameo, mani buli syaalo sinyale ohumwiinamiraanga yeeng'ene, buli situla mu loba lyasyo lyeene.

¹² Omwaami haandi achia ohwiita abaandu ba Etiopia.

¹³ Omwaami achia ohwehoonyera amaani kae asihiriise Asiria. Achia ohuhola esiko sya Ninefe syehole omusihiriro kw'esiparara, esiparara sibulaho kata eliichi.

¹⁴ Yicha ohuba abuundu yi ng'oombe neende amakoondi, alala neende ebisolo bya buli mbya bicha ohuwuluuhiraanga. Amahirihiihi kachia ohumenya mu kuunda lyasyo mani keembereenge hu madirisa kasyo. Amahooho kachia ohuliriraanga hu milyaangiro kyako. Embaao ch'emiseengese ky'ebyoombahe byasyo chichia ohukiingwa chimalweo.

¹⁵ Mani esyo nisyo esichia ohukwa hu siko sy'epaahira mu maani kasyo nisibaasa siti siribaao endaalo choosi. Abaandu basyo babaasa mbwe bati esiko syaabwe esyo nisyo esihiramo obuhunuufu mu syaalo syoosi. Nga syaheehole abuundu w'esaando, abuundu yi bisolo biteende bicha ohuwuluuhiraanga! Buli muundu ochia ohubiritiraangao achia ohwehunaanga n'akoboleraho mu luteengo.