Sefania 1 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Yino niyo emboosi yi Omwaami yaberesa Sefania mu biha bi Yosia omwaana wa Abaamooni yali naali omutuki wa Yuda.

Oludaalo lw'Omwaami lw'ohuheengeraho emisaango

² Emboosi y'Omwaami eyeechera Sefania omwaana wa Kuusi, omwaana wa Gedalia, omwana wa Hesekia, mu ndalo cha Yosia omwaana wa Abaamooni, omutuki wa Yuda. Omwaami aboola ati, “Ese njia ohusihirisa buli siindu siri hu syaalo,

³ abaandu boosi neende ebisolo byoosi, amayoni neende eng'eeni. Ese njia ohuleetao ohukwa hw'ababi. Njia ohusihirisa buli muundu yeesi, mani abuleo oluwonamo yeesi. Ese Omwaami niise olomaloome.

⁴ “Ese njia ohusaandya abaandu ba Yerusalemu neende Yuda syoosi. Njia ohusihirisa esyadoong'ao syoosi esidiira hu hwiinamiraanga Bbaali esisisiiriwo, mani abuleo oyo yeesi olinyala ohwiichulisaho abalaamisi b'abakafiiri ababahalaabaniraanga.

⁵ Ese njia ohusihirisa oyo yeesi oniinaanga hu sirama mani achaaka ohwiinamiraanga elyuuba, omwoosi, neende eng'ining'ini. Njia haandi ohusihirisa abo abaanyinamiraanga haandi bamala beelaira ohunoonda, nae haandi beechubira mu liita lya nasaae olaangwa Moleki.

⁶ Ese njia ohusihirisa abo abanjubba omukoongo haandi abaleha ohunoondaanga, abo abahaya ohwiichaanga yi ndi, kata sa ohundekweeda mbemirireenge.”

⁷ Oludaalo luli aambi lu Omwaami achia ohwiihalira hu sisaala sy'ohuheengeraho emisaango; mani sakira wuleere chi mu moni wae. Omwaami ali ohutekeha ohuyaanayo abaandu bae mani amalire ohulaaliha abasuku hwiicha ohuseenakira Yuda.

⁸ Omwaami aboola ati, “Hu ludaalo lw'ohwiitiraho, ese njia ohusaandya abahoongo, abasyaani b'omutuki alala neende abo boosi abeekesaanga ohuhola emiduunga mikeni.

⁹ Ese njia ohusaandya abo boosi abeenamira koti abakafiiri haandi abo abeeba haandi abeeta mbwe hu beemeo banyale ohwiichusa enyuumba y'omwaami waabwe neende ebinyake.”

¹⁰ Omwaami aboola ati, “Hu ludaalo lweene olwo, nilwo lu muchia ohuwuuliriraho oluwuungu lw'ohulira nilutulira hu Siruwa sy'Eng'eeni mu Yerusalemu. Muchia ohuwulira embuungu mu bituundu biyaaha biri mu siko sino, haandi neende omufuumu muhoongo muno ena bigulu.

¹¹ Hubba wuuwi haandi olire n'owulira sino, ewe owamenya abuundu wehirira ow'esiko esyo, olwohuba abachurusi boosi bachia ohuubba wuuwi nibafwiire!

¹² “Esiha syeene esyo, ese njia ohubukula etaara mani hose mu Yerusalemu yoosi. Ese njia ohusaandya abaandu beeyikusa abeene, haandi neende abejiing'ia, abeboola mbwe ‘Omwaami haba saacha ohuholaho esiindu syoosi, mu ngira yiindi yoosi.’

¹³ Obuyiinda bwaabwe bucha ohuyaaywa, mani enyuumba chaabwe chisihiriswe. Haba sibachia ohunyala ohumenya mu nyuumba chi bali ohwoombaka, kata sa ohung'wa efiini yitula mu mikuunda ki bali ohulimaanga.”

¹⁴ Oludaalo luhunuufu lw'Omwaami luli aambi, aambi bweene, haandi lwiicha bwaangu muno! Oludaalo olwo luchia ohuba olululu, kata neende eyiri abanamaye bahiramo obululu bosi bachia ohulira bateng'eng'ale!

¹⁵ Luchia ohuba oludaalo lw'esifulu, oludaalo lw'amadinyu neende engisa, oludaalo lw'omunyaahano neende omusihiriro, oludaalo lw'esiirima neende ohung'uuta, oludaalo lumali titititi haandi olw'efuumbi,

¹⁶ oludaalo olweechulamo oluyoka lw'eturumbete ch'ebiita neende ohulira hw'ebiita ohw'abanamaye nibali ohuseeta ebiko by'engoba neende eminaara mileeyi.

¹⁷ Omwaami aboola ati, “Ese njia ohuleeta amasira kafwaana katyo hu luyia lw'abaandu kabuli muundu achia ohubabasaangaho koti omuwofu. Olwohuba abo bamala ohwonoona yi ndi, mani bulaanu amabaanga kaabwe kachia ohubbwomoolwa koti amaachi, mani emilaambo kyaabwe kikonaneho kibolere hu loba.”

¹⁸ Hu ludaalo lu Omwaami achia ohweekeseraho obwaalaba bwae, kata yibulao efeesa yaabwe yoosi, kata neende esaabbu yaabwe yoosi eyichia ohunyala ohubawonia. Esyaalo syoosi sichia ohusihiriswa neende omuliro kw'etima lyae. Achia ohutaao enjakamo, enjakamo ya bwaangu, eya buli muundu yeesi owamenya hu syaalo huno.