Ruusi 2 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ruusi aholera emirimo mu mukuunda kwa Bboasi

¹ Naomi yali neende omwiiho wae owali n'alaangwa mbwe Bboasi, owali omuyinda, haandi owamanyihana muno, owali naali owomulwanyi lwa Elimeleki owali wamwe.

² Mani ludaalo luundi, Ruusi yeecha yaboolera Naomi ati, “Lehaho ese njieho mu mikuunda ohudooleresa emere yi bakesi baleha enyuma. Ndi omwomiifu endi ohwoola njia ohunyoolaho oyo yeesi ochia ohuunganya ati holere alala nae.” Naomi nae yaakobolamo ati, “Ewe wechiire sa, muhaanang'ene.”

³ Mani Ruusi yatula yaachia mu mikuunda, yaanyala ohukeenderaanga enyuma w'abapakasi, nadooleresaanga emitwe ky'emere kibalehaanga enyuma. Syeehola mbwe, hane yali naali mu mukuunda okwali okwa Bboasi.

⁴ Mani luunyuma hooho, Bboasi mweene yeecha yoola ao naatula mu Bbetilehemu, mani naheesa abapakasi abo. Yabaheesa ati, “Omwaami abe naang'we!” Nabo baamukobolamo bati, “Omwaami ahuberese omukisa!”

⁵ Bboasi yateeba omusaacha wali naabahulira ati, “Omuhasi muyere oyo niye naanu?”

⁶ Omusaacha oyo nae yakobolamo ati, “Niye omukeni owakobola naatula Moabbu neende Naomi.

⁷ Yaasabire ati mukanye alondeenge hu bapakasi, nadooleresa emere. Mani aholere sa atyo ohutula echuli yeene, nae bulaanu buti hu yahaleheraho ati awuluuheho esiha esidiidi mu siiniha omwo.”

⁸ Mani Bboasi yaboolera Ruusi ati, “Lehaho ese hukerakireho budiidi. Otadooleresaanga emere abuundu woosi ohutusaho mu mukuunda kuno kwoong'ene. Holera alala neende abahasi bano ano;

⁹ Tingalaanga obone eyo yoosi yi baba nibachia ohukesa, mani odoong'e sa nabo. Ese mbano malire ohulagira abasaacha baange, obutahudyaabuhira daawe. Nihaandi buli lu owulira obuluwo nibuhuluma, chichaanga mani ong'wa ohutula mu syoongo chi baba nibamalire ohwiichusa.”

¹⁰ Ruusi yakwa aasi, obweeni bwae nibwegeeng'a hu buloba, n'aboolera Bboasi ati, “Siina syeene esikera ewe niwunjuunira sa muno otyo? Siina syeene esikera niwuumbonera esisa syakiire ao ese omukeni-bukeni?”

¹¹ Bboasi nae yakobolamo ati, “Ese ndamala ohuwulira buli siindu syoosi si waholeraho masaalao, ohutula wamwo naafwa. Ese manyire koti lu waleha lataao neende maao, neende esyaalo syao syeene, haandi neende koti lu weecha wachaaka ohumenya neende abaandu botaali niwamanyanaho nabo hale.

¹² Omwaami mani ahoya yaahulweeya hulw'ebyo byoosi bi waholaanga. Ewe ohoya wanyoola omukabo ohutula eyiri Omwaami Nasaae wa Yisiraeli, yi weechaho oti ahuliinde!”

¹³ Ruusi nae yakobolamo ati, “Ewe niiwe owungwiriire esisa muno, ewe omuhuluundu. Okerere ese ndeewulira bulai muno, koti lu wunomanomeere neende obuloonga bweene, kata neende ese ni ndi otaakanaho neende kata mulala hu bapakasi bao bano.”

¹⁴ Mani esiha syohulya, Bboasi yaboolera Ruusi ati, “Ewe yicha ano obukule omugaati, okudoonge mu muunyu.” Mani yaachia yeehala neende abapakasi, Bboasi yaamugaamira emere yimamirwe neende omuliro. Ruusi yaalya ohwoola lu yeekuta, yaalehaho esisaasa.

¹⁵ Yasiingira ohuchia yemeede ohudooleresa, Bboasi yalagira abapakasi bae ati, “Eng'we mumulehe adoolerese kata ohwoolera elalira yi mikaanda kiri, mutamubooleraho esiindu syoosi ohumukaania.

¹⁶ Haandi ohumeeda ohwo, hweseenge nimumalamo emitwe kiindi eky'emere ohutula mu mikaanda kiindi nimumulehera akiinge ayire.”

¹⁷ Ruusi yadooleresa emere mu mukuunda okwo ohwoola engoloobe, niyali n'amalire ohuyihoonja bulai, yakaana ati hane yoosere aambi ekiloguraamu amahumi kabiri-na-chitaanu.

¹⁸ Yakiinga emere eyo yaayiyira mu siko mani yeekesaho masaalang'ene obuungi bw'emere yaanyalire ohudooleresa. Yaamuberesa ebyohulya by'esisaasa ebyali nibidoong'ere hu sideru sibali nibaliire esideete.

¹⁹ Naomi yaamuteeba ati, “Yena bweene yi ewe odoolereseenge emere yino yoosi leero? Mu mukuunda kwa naanu mweene ku oholereengemo leero? Nasaae ahoya yaaberesa omukisa omusaacha oyo ochaakire ohuhwekoomba!” Mani Ruusi yaboolera Naomi ati abereenge n'aholera mu mukuunda okw'omusaacha wuundi olaangwa mbwe Bboasi.

²⁰ Omwaami ahoya yaaberesa Bboasi ehabi! Naomi yawuka atyo. “Omwaami yamenyera ohwooseresaanga ebisuubise byae eyiri abalamu neende abafwa.” Haandi yemeeda ohuboola ati, “Omusaacha oyo mwiiho weefwe mweene, oli mulala hu abo abali neende obufunaanibwa bw'ohutulindaanga.”

²¹ Ruusi yaboola ati, “Haandi ohuhiraho ao, yeechere yamboolera ohwemeeda ohudooleresaanga emere alala neende abapakasi bae ohwoolera elalira lu baliswaanisira ekesa lyoosi.”

²² Naomi yaboolera Ruusi ati, “Eee, muhaanang'ene, sichia ohuhubeera esilai sihiramo, ohuholeraanga alala neende abahasi bali mu mukuunda kwa Bboasi. Olwohuba onyala wachaaka ohudyaabuhirwa nikali mbwe ochia mu mukuunda kw'omuundu wuundi.”

²³ Sakira Ruusi yachia yaholeraanga alala nabo, n'adooleresaanga ekesa ohwoolera elalira lu emere yoosi, haandi neende engaano yoosi byali nibimalire ohukeswa. Mani haandi yemeeda ohumenyaanga sa neende masaalang'ene oyo.