Ruusi 1 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Elimeleki neende edaala lyae bawuuyira Moabbu

¹ Hale, mu ndaalo chi Abakayi bali nibatuka, esiminyu syakwaao mu syaalo omwo, mani omusaacha wuundi owa Bbetilehemu mu Yuda yaachia ohumenyaho mu syaalo sya Moabbu, omweene oyo neende omuhasi wae alala neende abaana bae babiri.

² Eliita ly'omusaacha oyo lyali Elimeleki, nae eliita ly'omuhasi wae lyali Naomi, nae ameeta k'abaana bae babiri abo kali Mahiloni neende Kilioni. Bano boosi bali Abaefuraate ohutula mu Bbetilehemu mu Yuda. Bachia mu syaalo sya Moabbu mani babaaho ebweene eyo.

³ Nae Elimeleki niyafwa, Naomi yadoong'a yeeng'ene neende abaana bae abo babiri,

⁴ mani badeehya abahasi Abamoabbu, Oripa neende Ruusi. Nae emyaaka aambi ehumi nikyaawa,

⁵ Mahaloni neende Kilioni boombi bafwa, mani Naomi haandi yadoong'a yeeng'ene, naabula omusaacha haandi naabula abaana bae abo.

Naomi neende Ruusi bakobolayo mu Bbetilehemu

⁶ Ebiha nibyabitao hooho, Naomi yaulira ati Omwaami yali naabereese abaandu bae ehabi, naababereese ekesa lai; yeetekeha atule mu Moabbu, alala neende bah'abaana bae boombi abo.

⁷ Boosi bachaaka olukeendo alala ohukobolayo mu Yuda, nae nibaba nibali hu ngira

⁸ Naomi yababoolera ati, “Eng'we mukoboleyo engo weeng'we, mwiihale neende bang'ineeng'we. Omwaami ahoya yaababeera omulai yi muli, koti lu eng'we mwesi mwabeere abalai yi ndi, haandi neende eyiri abo boosi abafwa.

⁹ Haandi Omwaami ahoya yaabanyalira buli mulala hu eng'we yaanyala ohudeeha haandi mani yaaba neende edaala.” Mani katyo, Naomi yaabakwichaanga mu birifu naabaseebula. Nae boombi batuunduha sa ohulira

¹⁰ nibamubolera bati, “haba! Efwe hwiicha ohuchia sa naawe eyiri abeeho bao.”

¹¹ “Eng'we muhoyere ohukobolaanga engo weeng'we, eng'we bahaana baange,” Naomi nae yabakolamo atyo. “Siina syeene esikera eng'we mwaadaha sa ohuchia naange? Eng'we mubaasa muti ese nyala haandi ndeebula abaana baandi bamunyala mwadeehera?

¹² Eng'we mukobole sa engo weeng'we, olwohuba ese ndakofula ndawaayo ohunyala ohudeeha haandi. Nae kata neende ese omweene niinjola ndabaasa endi esuubi lisiirimo, mani ndaachia ndadeeha esiro syaleero sino, mani ndaanyala ohwiibula abasyaani,

¹³ mani eng'we mwahanyala ohuliinda baahula? Mani sino syoong'ene syahabakaira ohuchia mani mwadeehera abasaacha baandi? Haba, bahaana baange, eng'we mumanyire sa muti esyo haba sisinyaliha daawe. Ese Omwaami yamala ohuungaluuhaniraho, mani ndewulira mbelalihiriire muno.”

¹⁴ Haandi beemao bachaaka ohulira sa. Orifa yeecha yaakwa mu sirifu sya masaalang'ene ohumuseebula mani niyeweerao naakobolayo engo waabwe, nae Ruusi yadoong'a sa niyomeere hu masaalang'ene oyo.

¹⁵ Mani katyo, Naome yaamuboolera ati, “Ewe Ruusi, mwaalihwaao oyo amalire ohwekobolerayo eyiri abeeho bae, haandi neende nasaae wae. Mani ewe wesi, muloondeho sa.”

¹⁶ Nae Ruusi yakobolamo ati, “Ewe otemeeda ohuusabaanga oti hutuleho! Ewe ndehe sa njie naawe. Eyo yoosi yooba noochia, ese syeesi niyo yiimba niinjia ohuchia; eyo yoosi yoochia ohumenya, ese syeesi niyo yi njia ohumenya. Abeeho bao bachia ohuba abeeho baange, haandi Nasaae wao, niye ochia ohuba Nasaae waange.

¹⁷ Eyo yoosi yoochia ohufwiira, niyo eyo yi syeesi njia ohufwiira, haandi eyo niyo yi njia ohusiihwa. Esibonereso sihiramo obubi sy'Omwaami sihoya syaaba hu ese, niinjia ndaaleha esiindu syoosi ohumalaho ohufwa hwoong'ene, syaanyala ohuungabuhania naawe!”

¹⁸ Naomi niyabona ati hane Ruusi yali naamaliriire ohuchia nae, yaalehera ao ohuboolaho esiindu siindi syoosi.

¹⁹ Mani bemeeda ohukeenda ohwoola lu boola mu Bbetilehemu. Mani niboola, esiko syoosi syesiinduha, mani abahasi abali mu bweene omwo bachaaka ohuuka nibaboola bati, “Bwadyeeri nibwo mbwe wuno niye Naomi mweene?”

²⁰ “Eng'we mutanaangaho muti Naomi,” nae yeecha yaabakobolamo atyo; “Munaange sa muti Mara olwohuba Nasaae w'Obunyala yahola obulamu bwaange bwahahaata.

²¹ Olwohuba ese koti lu ndatula ano, ndali neende ebiindu ebibitiirifu, nae Omwaami yaangobosa ano engo ni ndi omuhaya. Siina syeene esikera eng'we nimunaanga muti Naomi, Omwaami w'Obunyala niyamala ohuheengera omusaango yandeetera ebidinyu?”

²² Yino niyo engeri yi Naomi yakoboleramo engo naatula mu Moabbu alala neende Ruusi, muhoomwaana wae owali naali Omumoabbu. Niboola mu Bbetilehemu, ekesa lya emere lyali hulyahachaaka sa liti.