Omuyaali 11 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Bi muundu mukesi ahola

¹ Bechaanga omuwaani, wanyeenge ebyohulya byao hu maachi, olwohuba endaalo nyiingi nichibitireo, wahanyoole engaanga.

² Hu biindu byao, kabiraangaho abaandu baangi, kataanu-na-babiri oba bataanu-na-badatu, olwohuba haba s'omanyire esibi siina esinyala ohuhukwaaho hu syaalo.

³ Ebireesi nibiichula, ao ni ebyeene biweera hu syaalo koti efula. Omusaala nikukwiira olwaande lw'emwaalo oba olw'emukulu, abuundu yi kukwiire niwo yi kukona.

⁴ Oyo oliinda omuyaka neende ebiha bimale ohuba ebilai, haba siyahataake daawe; haandi oyo odeeba hu bireesi, haba siyahakese daawe.

⁵ Koti lu otanyala ohumanya engeri yi bulamu buchaakiramo mu nda y'omuhasi oli aasito, olwo lwosi lu otanyala ohumanya ebyo byoosi bi Nasaae ahola.

⁶ Yanyaanga emwo yao echuli, haandi neende engoloobe yosi. Olwohuba haba s'omanyire oba y'owaanyire echuli oba engoloobe, eyiriina eyinaahule bulai, oba choombi chinaabe endai mu ngeri nasilala.

⁷ Obulafu bulai nibwo, haandi omuundu ohuba elyuuba, likera yasangaala.

⁸ Omuundu n'ayiindira emyaaka miingi, leha akisangaaliremo choosi, nae leha yechulise ati endaalo ch'esiirima chi yahabeemo n'amalire ohufwa chahabe enyiingi. Ebyo byoosi ebyaheeche, bihaya byeene.

Ohukerakira abaraaga

⁹ Ewe omuraaga, sangaaliranga mu buraaga bwao, haandi leha weheerenge n'osisiiri omuraaga. Haandi loondakanaanga neende bi mwooyo kwae kwekoomba. Nae manyaanga oti Nasaae achia ohuheengera omusaango hulw'ebiindu ebyo byoosi.

¹⁰ Mani wetuseengeho ebyo ebikera niweelalihira mu mwooyo, neende ebihuleetera obuchuuni mu mubiri; olwohuba oburaaga neende obuyere, bihaya byeene.