Omuyaali 10 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Esiiye chifwiire nichiba mu chupa y'amafuta k'esing'aari, chikawunyisa esifuundu; mu ngeri nasilala, esy'obusiru sidiidi, simalao amakesi maangi haandi neende oluyaali.

² Sya buli ludaalo omuundu mukesi ohuhola ebiluungifu, nae omusiru ahola ebihyaamu.

³ Kata omusiru n'akeenda hu ngira, haba sadeebaangayo daawe, nae yeyekesaanga eyiri buli muundu koti lu ali omusiru.

⁴ Omuundu ohutuka n'ahuholereraanga, otalehuliraanga abuundu wao, olwohuba ohwefunaka hukera waleherwamo ebyonoono bihoongo.

⁵ Waliwo esibi simbweene hu syaalo, nisyo obudoondobanu bu abatuki bahola.

⁶ Baberesa abaandu basiru mu bunyala bw'aakulu ebihoyerwa abaandu bakesi, nae abaandu bakesi babereswa ebifwo by'aasi ebihoyerwa abaandu basiru.

⁷ Ndabona abakulwa nibeeruhira hu faraasi, nae abachweenufu nibakeesa amakulu koti abawaambe.

⁸ Oyo olima obuko anyala ohubukwaamo omweene; haandi oyo olikula esida sikofu, endemo yinyala ohumuluma.

⁹ Oyo owaata amakina, kanyala ohumunyaala; haandi neende oyo owasyaaka eehwi, chinyala ohumukwiisaho esidinyu.

¹⁰ Esyuuma nisiwaaho obwooki mani wahaya ohusyaakala, sidaha amaani maangi ohusyehoonyera; nae amakesi kakera omuundu yayiingira bwaangu.

¹¹ Enjuha niyiluma oyo oloka n'asisiiri ohuloka, buba bubulao obuhoonyi bw'omulosi.

¹² Emboosi chi muundu mukesi alomaloma chimuberesa oluyaali, nae bi musiru by'alomaloma bimusihirisa.

¹³ Muhuchaaka, emboosi chae chiba ech'obusiru, nae enjakamo y'enomanoma yae y'esifwaabi.

¹⁴ Omuundu musiru yeengiya emboosi. Abulao omanyire ebichia ohubaao, haandi abulao onyala ohutuboolera ebichia hukwaao nihumalire ohufwa.

¹⁵ Ebiindu bi musiru ahola bimujoong'a bwaangu muno, mani yahaya ohumanya engira yohubitaho naachia mu siko.

¹⁶ Chiba chakaanire esyaalo, omutuki wasyo naaba omwaana muyere, haandi abachweenufu basyo nibawuuna echuli-chuli muno mu bidyaalo.

¹⁷ Esyaalo esyo sy'ehabi muno, omutuki wasyo naaba omwimirisi mulai, haandi bachweenufu basyo bahola ebidyaalo mu biha bihoyera, abeene abeetuka haandi ataali ohumeera-bumeera.

¹⁸ Omuundu mukata, olwohuba haba s'adaha huhalaabana sikera esirama enyuumba yae nisiibira, haandi ohuba ao n'otahola esiindu sikera enyuumba niyitoonya.

¹⁹ Ebidyaalo bibaao hulw'ohwesangaasa, haandi amalwa kasangaasa obulamu, nae esituka byoosi nicho eseende.

²⁰ Otalomalomaanga bubi hu mutuki kata ayahaba mu bweekisi, haandi otalomalomaanga bubi hu muyiinda kata ayahaba mu siseenge sy'okonamo; olwohuba amayoni kabburuha mu bbanga kanyala ohumuyirira emboosi chao, mani byaamuboolere ebyo bi oboolere.