Ohutula 7 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Omwaami nae yaboolera Musa ati, “Bona, njia ohuhuhola obe koti Nasaae eyiri omutuki oyo, nae Arooni mwaanamaao achia ohuhulomalomera yaali koti omunabbi.

² Boolera Arooni buli siindu sihulagira, mani niye oba aboolere omutuki oyo alehe Abaisiraeli batule mu syaalo syae.

³ Nae njia ohwaangalasa omwooyo kw'omutuki, kata neende ni ndi ohwiingiya obubonero neende ebiholwa biwukisa mu syaalo sy'e Misiri,

⁴ Omutuki wa Misiri haba saachia ohuhuwulira; huunyale ohusiira omuhono kwaange hu Misiri, mani huunduse eye lyaange, abaandu baange haandi abaana basyaani ba Yisiraeli, erwaanyi w'esyaalo sy'e Misiri, nindeehoonyera ebiholwa bihunuufu by'ohubaheengera omusaango.

⁵ Abamisiri bachia ohumanyira ao bati niise Omwaami, nindahabe ni mbasiingisiireho omuhono kwaange, ni ndusire Abaisiraeli mu syaalo syaabwe.”

⁶ Musa neende Arooni bahola bi Omwaami yali n'abalagiire.

⁷ Nae ebiha bi balomalomeramo neende omutuki oyo, Musa yali neende emyaaka amahumi kataanu-na-kadatu nae Arooni yali neende emyaaka amahumi kataanu-na-kadatu neende kidatu.

Endabuhi y'Arooni

⁸ Omwaami yaboolera Musa neende Arooni ati,

⁹ “Niwiichuhana omutuki oyo yaabahada ati adaha mweyomiise muti mutumirwe ohubitira hu huhola esy'amayia, n'oboolera Arooni abukula endabuhi yae eyo ayisukuna aasi mu moni w'omutuki oyo, mani yiba yinakaluuhana yibe enjuha.”

¹⁰ Musa neende Arooni bachia eyiri omutuki oyo bahola koti lu Omwaami yali n'abalagiire. Arooni yasukuna endabuhi yae aasi mu moni w'omutuki oyo naali neende abakali bae, mani endabuhi eyo yaakaluuhana yaaba enjuha.

¹¹ Omutuki oyo niyabona atyo, yalaanga ab'amakesi bae alala neende ab'amayia bae, mani bosi nibeehoonyera obulakusi bwaabwe, banyala ohuhola batyo.

¹² Bosi basukuna aasi endabuhi chaabwe, mani buli endabuhi niyeholamo enjuha. Nae enjuha yali niyeholere mu ndabuhi y'Arooni, yamira enjuha chiindi echio choosi.

¹³ Kata katyo, omutuki oyo yadoong'a sa naali omwaangalafu, mani koti lu Omwaami yali naaboolere, omutuki oyo haba siyawuliraho ebya Musa neende Arooni.

Amasira kahuya Misiri Amabaanga

¹⁴ Omwaami haandi yaboolera Musa ati, “Omutuki wuno nguno abonehana ow'esyeejo muno mani asyomeraane sa haba s'adaha ohulehuula abaandu bano bechiire.

¹⁵ Ewe wuuna echuli ochie obukaanane nae na wuunire ohwiiha hu mwaalo kwa Naili. Kiinga ochie neende endabuhi yali niyikaluuhaanemo enjuha eyo, omuliindire hu genya ly'omwaalo.

¹⁶ Oboolere omutuki oyo oti, ‘Omwaami, Nasaae w'Abaibburania, yaandumire njiche huboolere olehe abaandu bae bechiire, hu banyale ohumwiinamira mu siparara. Nae ohwoola buti, ewe osisiiri ohuwulira.

¹⁷ Bulaanu, ow'Oluyaali, Omwaami ali ohuboola ati, ewe omweene ochia ohumumanya koti lu fwaana ohweema hu biindu by'achia ohuhola. Bona, njia ohuhuya hu maachi k'omwaalo kuno neende endabuhi yino, mani amaachi kachia ohukaluuhana kabe amabaanga.

¹⁸ Eng'eeni chichia ohufwa, omwaalo kwoosi kuwunye esifuundu sikayire Abamisiri ohung'wa amaachi komu mwaalo kuno.’ ”

¹⁹ Omwaami haandi yaboolera Musa ati, “Boolera Arooni abukule endabuhi yae eyo, mani ayisiingisire hu myaalo kyoosi, emitaro kyoosi, neende amadiba koosi ebiri mu Misiri. Amaachi ako koosi kachia ohweehola amabaanga, haandi hu loba hwoosi huchia ohubaaho amabaanga, kata neende mu maato k'embaao kosi, neende mu ejaa chi babaacha mu makina chosi.”

²⁰ Musa neende Arooni bahola sa koti lu Omwaami yali n'alagiire. Mu moni w'omutuki bweene alala neende abakali bae, nimwo mu Arooni yasiingisira endabuhi yae naayihuya hu maachi k'omwaalo okwo, mani amaachi koosi akali mu bweene omwo nikakaluuhana nikaba amabaanga mahaya.

²¹ Eng'eeni chali mu mwaalo omwo chafwa, omwaalo okwo kwaawunya esifuundu sibi syeene esyakayira Abamisiri ohukung'waahoomo amaachi koosi. Amabaanga kaba buli abuundu woosi mu Misiri.

²² Mani ab'amayia b'omutuki oyo bosi bahola esiholwa nasilala sityo nibeehoonyera amalesi kaabwe abeene, mani byaakera omutuki oyo haandi yaasiingisa esyeejo syae.

²³ Kata katyo, nae yekaluuhana sa yekobolera ena dooho lyae naatadeebere hooho hu sino kata nabudiidi.

²⁴ Abamisiri boosi bachaaka ohuyabaanga amaachi k'ohung'wa nibaloondakana neende egenya ly'omwaalo okwo, koti lu baba nibatanyala ohung'wa amaachi komu mwaalo okwo.

²⁵ Endaalo chitaanu-na-chibiri chabitao Omwaami n'amalire ohuhuya hu mwaalo okwo.