Ohutula 39 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ohuhola ebyefwaalo by'abalaamisi

¹ Ohutula mu bwooya bwa bbulu, papo, neende ranjaai, baholamo ebyefwaalo binyirifu bi balaamisi bali bahoyere ohwefwaala nibali ohuhalaabana Abuundu Woolerefu. Bahola ebyefwaalo by'obulaamisi ebya Arooni koti lu Omwaami yali n'alagiire Musa.

² Bahola esyefwaalo syaakama mu sibuno esy'elaasi nyirifu; ey'obwooya bwa bbulu, papo neende ranjaai; haandi neende obusye bw'esaabbu.

³ Beetaanya ebibbaati by'esaabbu, mani haandi nibamala ni babiheengamo ebipaande bileeyi bi bali nibachia ohubiholamo elaasi nyirifu, haandi neende mu bwooya bwa bbulu, papo, haandi neende ranjaai.

⁴ Bahola emifiriingi kibiri eky'ohudiira hu mabeka engubo yoomusibuno eyo mani nibamala ni bakyongaaniaho hu nyaande choombi, hu yinyale ohwediira hu mubiri.

⁵ Bulaanu, oluhoba lwali niluluhirwe bulai muno, ohutula mu biindu byeene ebyo aakulu, lwoosi balunabira hu ngubo eyo eyomusibuno byeehole omubiri mulala, koti lu Omwaami yali n'alagiire Musa.

⁶ Haandi batekeha karinelia mani nibachiingisa mu fureemu ch'esaabbu; basaataho nibeehaliirisa, ameeta k'abasyaani ehumi neende babiri aba Yakobbo.

⁷ Bachita hu mifiriingi chohumabeka, ech'engubo yomu sibuno ohuhiihirira enono ehumi neende chibiri echia Yisiraeli, koti sa lu Omwaami yali n'alagiire Musa.

Ohusona esituundu sy'engubo syoohusirifu

⁸ Haandi bahola esipaande syoohusirifu ohutula mu biindu bi baholamo engubo yoomu sibuno eyo, haandi neende ohusonwaho hufwaana hutyo.

⁹ Syali esyaakanirira embeka choosi, nae haandi nga bayifuumbiremo amahabi kabiri, esetimiita amahumi kabiri neende chibiri obuleeyi, haandi neende esetimiita amahumi kabiri neende chibiri obubaambali.

¹⁰ Banabiraho enyiriri chine ech'amakina malai muno: mu lunyiriri lutaangira banabiraho amakina kalaangwa mbwe, akiiki, topaasi, neende garineeti.

¹¹ Mu lunyiriri lwohubiri, banabiraho, emeraadi, safire, neende daimoondi;

¹² mu lunyiriri lwohudatu, banabiraho yasiito, agate, haandi neende ametisito;

¹³ haandi mu lunyiriri lwoohune, banabiraho, bberili, karinelia neende yasipa. Amakina kano koosi bakatechaanga mu fureemu ch'esaabbu.

¹⁴ Buli kina hu makina ako ehumi neende kabiri balichiingi nibasaataho eliita ly'omwaana mulala wa Yakobbo, hu kanyale ohuhihiirira enono ehumi neende chibiri echa Yisiraeli.

¹⁵ Baholeraho enyororo ch'esaabbu haya, echiluhwa koti emikoye.

¹⁶ Haandi bahola efureemu chibiri chiindi ech'esaabbu, haandi neende engata ch'esaabbu chibiri, mani nibamala niboongaho engata echio hu soonda ch'akulu ch'esipaande syoohusirifu.

¹⁷ Baboya emikoye ky'esaabbu kibiri ekyo hu ngata chibiri echio

¹⁸ haandi nibamala nibaboya enamitwe kibiri eky'emikoye ekyo hu fureemu chibiri, mani mu ngeri yino nibakita mu moni hu mifiriingi eky'engubo yoomu sibuno.

¹⁹ Haandi bahola engata chibiri ch'esaabbu, mani nibamala nibachita hu soonda cha aasi ech'esipaande syoohusirifu, hu ndulo w'olwaande lwomuukati aambi neende engubo yoomu sibuno eyo.

²⁰ Haandi bahola engata chiindi chibiri haandi, mani nibachita hu situundu sya aasi sy'emberi w'emifiriingi kibiri ekyohumabeka ekidiira engubo yoomu sibuno, aambi neende amapaala, nae aakulu w'olusibiro lwaluhwa bulai muno olwo.

²¹ Koti sa lu Omwaami yali n'alagiire Musa, mani baboya engata chohu sipaande syoohusirifu, hu ngata chohu ngubo yoomu sibuno neende omukoye kwa bbulu, hu bulaanu esipaande syoohusirifu sinyale ohukona aakulu w'olusibiro nga nae haba sisinyalire ohudeembuhana daawe.

Ohuhola ebyefwaalo biindi eby'obulaamisi

²² Engubo yi befwaaliraho engubo yoomu sibuno yalichiingi niyaholwa mu bwooya bwa bbulu buhaya.

²³ Eliina libiswamo omutwe lyali lyomiiswa neende ohunabwaho esaandago ohulikaira litataanduha bwaangu.

²⁴ Hu kemo ly'engubo eyo, banabiraho amapomoguranaate eky'elaasi nyirifu.

²⁵ Haandi neende obwooya bwa bbulu, papo, haandi neende ranjaai;

²⁶ nibatootobania amabere masuungu neende ekeengele ch'esaabbu ehaya, koti sa lu Omwaami yali n'alagiire Musa.

²⁷ Baholera Arooni alala neende abaana bae amasaati,

²⁸ haandi neende ebitarabuusi, neende enjuunga, esinyaasa sy'elaasi,

²⁹ neende olusibiro lw'elaasi nyirifu, neende obwooya bwa bbulu, papo, neende ranjaai, nilutaahwo amang'eniesi k'obujweenge, koti busa lu Omwaami yali n'alagiire Musa.

³⁰ Bahola esiloonge, ahalolero hoolerefu, ohutula mu saabbu, mani baasaataho bati, “Yayaanwa eyiri Omwaami”.

³¹ Basiboya mu moni w'esitarabbuusi neende omukoye kwa bbulu, koti sa lu Omwaami yali n'alagiire Musa.

Ohumaliirisa omulimo okwo

³² Omulimo kwoosi okudiira hu Yeema ly'Ohubaao hw'Omwaami kwoola ohuwa. Abaisiraeli bali baholere buli siindu koti sa lu Omwaami yali n'alagiire Musa.

³³ Baleeta eyiri Musa Eyeema elyo, alala neende ebiindu biindi byoosi ebichiiraho koti, amalobo kaahwo, efureemu chaahwo, emiguulo kihalakaniamo kyahwo, emisiiro kyaahwo, alala neende ebyeemwaho byalyo;

³⁴ esifuunihaho esy'eseero ly'ekoondi emiiku lyabahwa eraangi ya ranjaai; esifuunihaho sy'eseero nyirifu; neende epasya;

³⁵ Esanduuku ly'Endagaano elirimo ebituundu bibiri eby'amakina, emisiiro kyalyo, neende esifuuniho syalyo;

³⁶ emeesa alala neende ebiindu bichiiraho byoosi, alala neende emigaati ki bayaanayo eyiri Nasaae;

³⁷ esiteeni sy'etaara sy'esaabbu haya, mataara kasyo, ebiindu biindi bichiiraho, haandi neende amafuta k'amataara;

³⁸ alutaari y'esaabbu; amafuta kaawula; obubbaani buwunya esing'aari silai muno; epasya y'esiruwa sy'Eyeema;

³⁹ alutaari y'omugasa, alala neende ewaaya chisika ch'omugasa, emisiiro chayo, alala neende ebiindu bichiiraho byoosi; olukaraaya lw'ohweeyoseraho, haandi neende esyeemero syayo;

⁴⁰ epasya ch'olukaka neende amakutu kaahwo neende ebyeemero byaahwo; epasya y'esiruwa sy'olukaka neende emikoye kyahwo; ebihoongo by'Eyeema; haandi neende ebiindu byoosi ebihoyeere ohwehoonyerwa mu Yeema;

⁴¹ haandi neende ebyefwaalo binyirifu bi balaamisi bali nibahoyere ohwefwaalaanga nibali Abuundu Woolerefu, engubo ndafu chia Arooni omulaamisi, haandi neende echa abaana bae.

⁴² Abaisiraeli bali nibaholere omulimo okwo kwoosi koti sa lu Omwaami yali n'alagiire Musa.

⁴³ Musa yehaliirisa buli siindu mani n'abonera elalira ati bali nibaliholere lyoosi, koti sa lu Omwaami yali n'alagiire. Musa yababeresa ehabi.