Ohutula 32 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Esurusi njere ey'esaabbu

¹ Nae bulaanu abaandu nibabona bati Musa yali nahiindire ohwiiha ohutula hu lugulu olwo, nibabona bati yali ahiindireyo muno, bebuusa bebodoohania Arooni mani baamala baboola bati, “Efwe haba sihumanyire esiindu siinyala ohuba nisikwiire hu omusaacha wuno Musa, omusaacha watutusa mu Misiri; mani ewe tuholere nasaae weefwe.”

² Arooni yababoolera ati, “Mufwaalule ebbaangili choomumatwi ech'esaabbu chi abahasi, abaana basyaani beeng'we, neende abaana bahaana beeng'we befwaalire, mani mu chiindeetere.”

³ Mani abaandu boosi befwaalula ebbaangili chaabwe ch'amatwi mani nibachileeta eyiri Arooni.

⁴ Arooni yabukula ebbaangili ch'amatwi echio, mani yaachisaangulusa, yaachuha esaabbu eyomu siloongero, mani yaahola esurusi njere ey'esaabbu. Abaandu nabo baboola bati, “Yisiraeli, wuno niye nasaae weefwe, owatwiimirira yaatutusa mu Misiri!”

⁵ Haandi Arooni yoombaha alutaari mu moni w'esurusi njere ey'esaabbu, mani naamala n'alaangirira ati, “Muchuli yicha ohubaao esidyaalo esy'ohwiisa oluyaali mu Omwaami.”

⁶ Mani echuli-chuli mu ludaalo lwaloondaho, abaandu baleeta ebisolo bati ba biite mani babisaambe koti ebiyaanwa, nae ebisolo biindi bibe eby'ohuliibwa sa koti esy'ohuwaayo sy'obusaangirani. Abaandu beehala aasi mani bachaaka ohulya neende ohung'wa, ebyatuliramo ohumeera neende ohuyirana.

⁷ Mani Omwaami yaboolera Musa ati, “Ewe yiha okoboleyo bwaangu, olwohuba abaandu bao, ba weemirira waatusa mu Misiri, boonoonere mani baamala baahayuhaho.

⁸ Bamalire hale ohutula hu ngira yi ndabalagira ohuloonda; baholere esurusi njere ohutula mu esaabbu yisaanguluuhe mani nibamala nibayiinamira haandi ni bayiyaanira ebiyaanwa. Bali ohuboola bati, yino niyo nasaae waabwe, owabeemirira yaabatusa mu Misiri.

⁹ Ese omweene manyire esyeejo si baandu bano bali nasyo.

¹⁰ Mani bulaanu, ewe otateemaho ohuungayirira daawe. Ese ndi omunyoolefu nabo, mani njia ohubasihirisa sa. Niimala endyo, hu njiche huhole ewe neende abeechuhulu bao mube esyaalo sihoongo muno.”

¹¹ Kata katyo Musa nae yachaaka sa ohwekweeda Omwaami Nasaae wae n'aboola ati, “Omwaami, lwasiina onyoolerera abaandu bao sa obwakiire ao, abaandu ba ewe omweene wanunula sa mu Misiri, niwehoonyera obunyala buungi butyo, haandi neende amaani kao kakiire ao katyo?

¹² Lwasiina oli ohukera Abamisiri bachaake ohuboola bati, ewe hane watusa sa abaandu bao mu Misiri, nootekehaanga ohubeetera muungulu, haandi noomala noobasihirisira elalira? Ewe leha sa ohunyoolera; kaluuhania ebibaaso byao, mani omale ohaye ohuleeta omusihiriro kuno eyiri abaandu bao.

¹³ Yichulisa abahalaabani bao bala koti Abburahamu, Yisaka, neende Yakobbo. Yichulisa esisuubise simaliirifu si wabaholera oti ochia ohubaberesa abeechuhulu abaangi abaaka koti eng'ining'ini chiri muukulu, haandi neende ohuberesa abeechuhulu baabwe eloba elyo lyoosi li wabasuubisa oti nilio elichia ohuba obusiha bwaabwe endaalo choosi pe.”

¹⁴ Mani Omwaami yakanya ohukaluuhania ebibaaso byae mani yaahaya ohuleeta hu baandu bae abo omusihiriro ku yali natiisa-tiisire ohubaleetaho.

¹⁵ Musa bulaanu yeeha aasi ohutula hu lugulu, n'akiingire ebituundu bibiri eby'amakina bira, ebyaandiikwaho amalako hu nyaande choombi.

¹⁶ Nasaae mweene niye owali naaholere ebituundu bibiri eby'makina ebyo, haandi niyali omweene n'abisaatireho amalako ako.

¹⁷ Yosua nae yawulira abaandu nibali ohuyokera mani yaboobera Musa ati, “Ese ndi koti oli ohuwuliraangaho esiyoka sy'eye nisiri mu kaambi.”

¹⁸ Musa nae n'aboola ati, “Kata katyo, esyo syooka haba sisiri ohuubba koti oluyoka lw'ohweehoya hw'ohuyiingira, oba ohulira hw'ohuhirwa; ni esiyoka sy'ohweemba.”

¹⁹ Musa niyasuda aambi muno neende ekaambi yoola ohubona esurusi njere neende abaandu bali nibali ohuhinaanga, yeechula yaabira etima. Mani niyali hwaali mu nandaalira y'olugu olwo, Musa yahubba aasi ebituundu by'amakina bi yali naakiingire ebyo, mani byaadiha.

²⁰ Yabukula esurusi njere eyo, yi bali nibaholere, yaayisaangulusa, yayisya niyehola obusye bunyuhe muno, mani n'abusaasaania neende amaachi. Yayiika abaandu ba Yisiraeli abo ohubung'wa bwoosi pe.

²¹ Niyamala atyo yaboolera Arooni ati, “Ewe, abaandu bano babeere bahuholere batye, hu weemao waakera baahola esyonoono sibi syakiire ano siti?”

²² Arooni nae yamukobolamo ati, “Ewe otaanyoolerera daawe; ewe wesi omweene omanyire koti lu baandu bano bali abamaliirifu ohuholaanga esyonoono.

²³ Abeene beechere yiindi mani baamboolera bati, ‘Efwe haba sihumanyire esyakwa hu musaacha wuno Musa, owatutusa mu Misiri; mani ewe maya akatuholera nasaae yeesi, onyala ohutwiimiriraanga.’

²⁴ Mani ese ndaabasabire ohundeetera ebyefwaalo byaabwe byesaabbu, mani buli oyo yeesi owabeere naaliho nasyo yefwaalulaho, mani nibabiimberesa byoosi. Ese mani ndaasukuune ebyefwaalo ebyo byoosi mu muliro, mani esyaatuliremo nisyo esurusi njere yino!”

²⁵ Ao Musa yaabona ati, hane Arooni niye owakera abaandu baamuhaya ohutuka, bachaaka ohweehola eby'obusiru mu moni w'abasuku baabwe.

²⁶ Yeema mu siruwa sy'ekaambi niyehuuma ati, “Oyo yeesi omanyire ati ali hu lubeka lw'Omwaami yeeche eno!” Abaleefi boosi basuda yaali mani bamweebodoohania,

²⁷ yababoolera ati, “Omwaami Nasaae wa Yisiraeli ali ohulagira buli mulala hweeng'we ohubukula olugaanga lwaae, mani achie abite mu kaambi ohuchaakira hu siruwa sino, ohwoola hu siindi sira, niyeeta bamwaanang'ina, abeecha bae, kata neende abamenyaane bae.”

²⁸ Abaleefi boosi bafuniha, mani beeta aambi abasaacha elifu chidatu (3,000) abalaamba hu ludaalo olwo lwoong'ene.

²⁹ Musa haandi yaboolera Abaleefi ati, “Nyaanga yino, mbao munyalire ohwelabya abeene koti abalaamisi mu buhalaabani bw'Omwaami, ni mwiitireenge abaana basyaani beeng'we, neende abasyaani beeng'we, mani Omwaami mweene amalire ohubaberesa ehabi chae.”

³⁰ Nibwahya oludaalo lwaloondaho, Musa yaboolera abaandu boosi ati, “Eng'we, mwaholere esyonoono sibi muno. Nae kata katyo, ese bulaanu haandi ndi ohuchia niine hu lugulu luno eyiri Omwaami; awuundi nyala ndanyoola ohuleherwa hw'esibi syeeng'we sino.”

³¹ Musa haandi yakobola eyiri Omwaami mani yaamala yaamuboolera ati, “Abaandu bano baholere esyonoono sibi muno. Baholere nasaae ohutula mu esaabbu, haandi baamwiinamira.

³² Nae ewe mala akalehera esyonoono syaabwe esyo; nae nikali mbwe soonakanya ohuhola otyo, mani ewe maya sa akasaangula eliita lyaange ohutula mu sitabo si wandiikamo ameeta k'abaandu bao.”

³³ Nae Omwaami yakobolamo ati, “Siri yiindi mbwe, ni abo abonoona mu moni waange, ba meeta kaabwe njia ohusaangula ohutula mu sitabo syaange.

³⁴ Bulaanu, ewe chia sa wiimirire abaandu abo obayire abuundu yi ndahubooleraho ao. Yichulisa oti, malaika waange achia ohuhwiimiriraanga, nae kata katyo, esiha sichia ohwoola si mweene njia ohubonereseramo abaandu bano hulw'esibi syaabwe.”

³⁵ Omwaami yatuma oluumbe lubi hu baandu abo, olwohuba bali nibo abakera Arooni yaahola esurusi njere ey'esaabbu.