Ohutula 31 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Abahalaabani b'ohwoombaha Eyeema ly'Ohubaao hw'Omwaami

¹ Omwaami yaboolera Musa ati,

² “Ese ndadoola Bbesaleeli, omwaana wa Wuri haandi omwiichulu wa Huuri, ohutula mu nono ya Yuda,

³ mani mwichuusemo Mwooyo wa Nasaae. Mubeere obunyala bw'ohumanya, obumanyirifu, neende obunyala bw'ohuhola buli mulimo kudaha ohuyiiya

⁴ ohuhola endekeha y'ohuyiiya emera y'ebiindu neende ohubihola mu esaabbu, efeesa, neende mu mugasa;

⁵ mu huheenga ebbaangili chichia ohutekehwa; ohubaacha ebiindu mu mbaao; haandi neende aka buli mulimo kwoosi okudaha ohuyiiya.

⁶ Haandi ndooleremo Oholiabbu, omwaana w'Ahisamaki, ohutula mu nono ya Daani, oba ahole nae. Haandi mbereese obunyala buhunuufu abaandu baandi bahalaabani bamanyirifu boosi, hu banyale ohuhola buli siindu syoosi si ndagira endi siholwe:

⁷ Eyeema ly'Ohubaao hwaange, Esanduuku ly'Endagaano alala neende esifuuniho syahwo, neende ebiindu byoosi ebichiira hu Yeema elyo,

⁸ emeesa neende ebyehoonyerwaho byoosi, esiteeni sy'etaara esy'esaabbu haya alala neende ebyehoonyerwaho byoosi, alutaari y'ohuniooheseraho obubbaani,

⁹ alutaari y'ebiyaanwa bisaambe alala neende ebyehoonyerwaho byoosi, engaraaya y'ohweyoseraho neende obwiihaliro bwaachio,

¹⁰ ebyefwaalo by'obulaamisi by'esiroonyo bya Arooni neende abaana bae ohwehoonyeraanga nibahalaabana koti abalaamisi,

¹¹ amafuta kachuhwa nikaawula, neende obubbaani buwunya esing'aari silai muno ako Abuundu Woolerefu. Mu huhola ebiindu bino byoosi, bahoyere ohuba nga banyala ohubihola sa koti lu hulagiire.”

Sabbaato, oludaalo lw'ohuwuluuha

¹² Haandi Omwaami yalagira Musa

¹³ ohuboolera abaandu ba Yisiraeli ati, “Liindeenge Sabbaato, oludaalo lwaange lw'ohuwuluuha, olwohuba aho niho ahalolero hali akatikaati weeng'we neende naange endaalo choosi echiicha, aheekesa mbwe ese, Omwaami, mbaholere mube abaandu baange syeeng'ene.

¹⁴ Muhoyere ohuliinda Sabbaato, oludaalo luno olw'ohuwuuluha, olwohuba lwoolerefu nilwo. Oyo yeesi otaluliinda, mani yeholera emirimo hu ludaalo olwo, ahoyere ohwiitwa.

¹⁵ Eng'we muli neende endaalo chisaasaba chi muhoyere ohuholeraangamo emirimo kyeeng'we, nae olw'ohutaanu-na-habiri ludaalo lwoong'ene lw'ohuwuluuha olwandeherwa ese omweene. Oyo yeesi ohola omulimo kwoosi hu ludaalo olwo, ahoyere ohwiitwa.

¹⁶ Abaandu ba Yisiraeli bahoyere ohuliinda Sabbaato koti ahalolero h'Endagaano.

¹⁷ Hano halolero h'olubeerera akatikaati w'abaandu ba Yisiraeli naange, olwohuba ese Omwaami, ndahola Ekulu neende esyaalo mu ndaalo chisaasaba, mani hu ludaalo lw'ohutaanu-na-habiri ndaakama ohuhola emirimo mani ndaawuluuha.”

¹⁸ Bulaanu Nasaae niyamala ohulomaloma neende Musa hu Lugulu lwa Sinai, yamuberesa ebituundu bibiri eby'amakina hu Nasaae mweene yali niyaandiikireho amalako ako.