Ohutula 3 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Nasaae alaanga Musa

¹ Ludaalo luundi, Musa niyali naali ohwaaya amakoondi alala neende embusi chaYetero muhweeng'ene, owali omulaamisi wa Midia, yeemirira ebyaayo ebyo yaabyaambusa esiparara ohwoola lu yoola hu Sinai, olugulu lwoolerefu.

² Eyo niyo yi malaika w'Omwaami yamubonehera naali koti omuliro kutulira akatikaati w'esichaha. Musa yabona yakaala ati esichaha esyo syali nisiri ohwaaduha omuliro nae haandi sisiri ohuya nisiwa daawe.

³ Musa yabaasa mu mwooyo kwaye mani yaboola ati, “Eee, sino sikeni. Lwasiina esichaha sino haba sisiri ohuya nisiwa? Leha sude aambi nasyo mbone.”

⁴ Nae Omwaami niyabona ati Musa yali naasuda aambi bweene, yamulaangira akatikaati w'esichaha n'aboola ati, “Musa! Musa!” Nae Musa n'amukobolamo ati, “Mbano, nduwo.”

⁵ Nasaae nae yamuboola ati, “Otemeeda ohusuda muno aambi ano. Wefwaalulemo ebiraato byao ebyo, olwohuba mbao weemere Abuundu Woolerefu.

⁶ Ese niise Nasaae wa bakuukao, Nasaae wa Abburahamu, Yisaka, neende Yakobbo.” Mani Musa yabwiiha mu bweeni bwae, koti lu yali n'atiire ohutingaalana neende Nasaae.

⁷ Haandi Omwaami yaboola ati, “Mbweene koti lu baandu baange bali ohuyiribwa neende etima mu Misiri; Mbuliire ohulira hwaabwe nibadaha baonisiibwe ohutula hu banyaapara baabwe. Ese manyire ohusaanda hwaabwe koti lu hwaaka,

⁸ mani sakira njihire aasi ohubawonia ohubatusa hu Abamisiri haandi neende ohubatusira elalira mu Misiri, neende ohubayira mu syaalo sitabaafu, esiyiinda haandi esigimu si Abakanani, Abahiiti, Abaamoori, Abaperisi, Abahiifi, alala neende Abayebbusi bamenyamo bulaanu.

⁹ Mubwadyeeri bweene, mbuliire amaliro k'abaandu baange, haandi ndi ohubona koti lu Abamisiri bali ohubafwiinyiriraanga.

¹⁰ Mani bulaanu buti ndi ohuhutuma eyiri omutuki wa Misiri, ochie wiimirire abaandu baange batule mu syaalo syae.”

¹¹ Nae Musa yaboolera Nasaae ati, “Ese ndi omuundu sa obuliraho kata nelalira obunyala. Mani nyala endye ohwetika ndaachia hu omutuki haandi ndaatusa Abaisiraeli mu Misiri?”

¹² Nasaae nae yamukobolamo ati, “Ese njia ohuba alala naawe, mani nooliba noomalire ohutusa abaandu abomu Misiri, ochia ohunyinamira hu lugulu luno. Esyo nisyo esichia ohuba esyomiisa siti niise ohutumire.”

¹³ Nae Musa yamukobolamo ati, “Niinjia ndoola eyiri Abaisiraeli mani ndaababoolera endi, ‘Nasaae wa bakuuka yeeng'we niye owuundumire yi muli,’ baba bachia ohundeeba bati, ‘Eliita lyae nilyo naanu?’ Mani ese mba njia ohubaboolera endye?”

¹⁴ Nasaae nae Yaboola ati, “Ese ndi oyo yi ndi. Sino nisyo syoohoyere ohuchia ohubaboolera oti: ‘Oyo olaangwa ESE NDI OYO YI NDI yandumire yi muli.’ ”

¹⁵ “Chia oboolere Abaisiraeli oti ESE, Omwaami, Nasaae wa bakuuka yaabwe, Nasaae wa Abburahamu, Yisaka, neende Yakobbo, niye ohutumire yi bali. Lino nilyo eliita lyaange endaalo choosi pe; yino niyo engeri yi njibulo choosi echiicha mu moni chicha ohunaangaanga.”

¹⁶ Ewe mani chia obuuse alala abeemirisi ba Yisiraeli boosi, mani omale obaboolere oti ESE, Omwaami wa bakuuka yeeng'we, Nasaae wa Abburahamu, Yisaka, neende Yakobbo, niye ohuboneheere. Obaboolere oti, ESE yeechere yi bali, mani yaabona koti lu Abamisiri bali ohubayiraanga.

¹⁷ Heengereo endi paka njia ohubatusa mu Misiri, yi bali ohuyiribwa neende obwaalaba, mani mbayire mu syaalo siyiinda, haandi esigimu, esyaalo sy'Abakanani, Abahiiti, Abaamoori, Abaperisi, Abahiifi neende Abayebbusi.

¹⁸ “Abaandu baange beene bachia ohutekeeresa byoochia ohuba noobaboolera. Mani ao oba ochia ohubukula abeemirisi b'Abaisiraeli mani ochie nabo eyiri omutuki wa Misiri omuboolere oti, ‘Omwaami’, Nasaae w'Abaibburania, niye otuboneheere. Mani tukanye husamuleho mu siparara humale endaalo chidatu nihuchiire ohuyaana ebiyaanwa eyiri Omwaami, Nasaae weefwe wuno.

¹⁹ Ese manyire endi omutuki wa Misiri haba saanabaleha muweeo natayiikirwe ohuhola atyo.

²⁰ Nae ese njia ohwehoonyera obunyala bwaange, mani saandye Misiri niiholerayo ebiindu biingi eby'amayia. Mani niimba niimalire endyo, hu bulaanu omutuki oyo achia ohudeembuha abalehe muweeo.

²¹ “Njia ohuhola Abamisiri boole ohuhwiisamo oluyaali hu mani, abaandu baange niboola ohuwaao, haba sibacha huwaao mahono mahaya.

²² Buli muhasi Muisiraeli yeesi achia ohuchia eyiri Abamisiri bamenyaane nae haandi neende eyiri omuhasi Mumisiri yeesi owamenya mu nyuumba yae, mani asabe engubo, neende ebbaangili ch'esaabbu neende ech'efeesa. Mani Abaisiraeli bachia ohuta ebiindu bino byoosi hu baana baabwe basyaani neende abahaana, mani bakiinge baweeo neende obuyiinda bw'Abamisiri.”