Ohutula 25 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ebiyaanwa by'Eyeema lyoolerefu

¹ Omwaami haandi yaboolera Musa ati,

² “Boolera Abaisiraeli baamberese esiyaanwa. Ewe yakaanira buli ngeri y'esiyaanwa si buli muundu yeesi aba n'adahire ohutusa.

³ Ebiyaanwa bihoyere ohuba ebya: esaabbu, efeesa, neende Omugasa;

⁴ elaasi enyirifu; bbulu, papo neende obwooya bwa ranjaai; engubo yaholwa mu bwooya bw'embusi;

⁵ eseero ly'ekoondi emiiku elyabahwaho eraangi ya ranjaai; eseero echweenufu; embaao ch'emigasya;

⁶ amafuta k'amataara; ebiluunga amafuta k'ohwaula, neende obubbaani buwunya esing'aari silai muno;

⁷ eby'ohwesyaaya bilaangwa, ‘karinelia’, neende eby'embya chiindi bi bahoyere ohunabira hu ngubo yoohusirifu y'Omulaamisi Muhuluundu haandi neende hu esyefwaalo sy'obulaamisi syoohusirifu silaangwa siti efodi.

⁸ Abaandu bahoyere ohunyoombahira eyeema lyoolerefu, hu syesi nyale ohubamenyamo.

⁹ Mulyoombahe alala neende ebiindu byoosi eby'ohutaamo ohuloondakana neende endekeha yi mweene njia ohubeekesa”.

Esanduuku ly'Endagaano

¹⁰ “Hole esanduuku ohutula mu mbaao ch'omugaasia, esetimiita emia ndala neende ehumi (110) obuleeyi, esetimiita amahumi kasaasaba neende chisaasaba obubaambali, neende esetimiita amahumi kasaasaba neende chisaasaba aakulu.

¹¹ Bwiihe mukati neende erwaanyi bweene neende esaabbu ehaya, haandi mukohobe huundulo hwoosi neende esaabbu.

¹² Holereho emihono ky'ohukiingira kine, mani mukiyambaanie hu makulu kane kalyo, emihono kyehuyuungirisa ekyo nikiri buli lubeka.

¹³ Hole emisiruunga kikiinga eky'embaao ch'omugaasia, mukibwiiheho neende esaabbu

¹⁴ mani mumale mukichomehe mu mihono kyehuyuungirisa ekyo ekiri hu buli lubeka lwisanduuku.

¹⁵ “Emisiruunga ekyo kihoyere ohulehwa mu mihono kyehuyuungirisa, haandi sikihoyere ohutuswa hoomo.

¹⁶ Mani mute ebituundu bibiri by'amakina bi njia ohubaberesa, hu malako kaandiikwa.

¹⁷ “Hole esifuuniho esy'esaabbu ehaya, esetimiita emia ndala neende ehumi (110) obuleeyi, neende esetimiita amahumi kasaasaba neende chisaasaba obubaambali.

¹⁸ Hole abakerubbi babiri abali neende embaya chibiri eby'esaabbu hong'oonde,

¹⁹ buli silala nisiri hu ndulo y'esifuuniho. Mubihola bibe koti omubiri mulala neende esifuuniho.

²⁰ Abakerubbi babiri bano bahoyere ohutingaalana nibihalakania esifuuniho esyo, nae embaya chibaambuuhe chabo chihoyere ohuba nichisifuuniihe.

²¹ Mute ebituundu bibiri by'amakina bira mu sanduuku elyo mani mufuuniheho esifuuniho humukulu waalyo.

²² Ese njia ohubabukaaniraanga abweene ao, nae ohutulira aakulu w'esifuuniho, akatikaati w'abakerubbi babiri, ao niwo yiinjia ohubaberesera amalako kaange koosi ak'abaandu ba Yisiraeli.

Emeesa y'emigaati kiyaaniirwe Nasaae

²³ “Hole emeesa mu mbaao ch'omugaasia, esetimiita amahumi kataanu-na-kadatu-na-chitaanu-na-chidatu obuleeyi, esetimiita amahumi kane neende chine obubaambali, neende esetimiita amahumi kasaasaba neende chisaasaba aakulu.

²⁴ Muyifuunihe yoosi neende esaabbu haya haandi muyikohobe hu ndulo neende esaabbu ohwebodoohania.

²⁵ Hole olunikaanika lwa emilimiita amahumi kataanu-na-kabiri neende chitaanu obubaambali ohuyebodoohania, haandi neende oluholoboso lwebodoohania engata eyo.

²⁶ Holereho emihono chehuyungirisa chine ech'ohukiingira ech'esaabbu mani mukite hu soonda chine, eyiri amakulu.

²⁷ Emihono chehuyungirisa ekidiira emisuruunga ch'ohukiingira emeesa yino kihoyere ohuteebwa aambi neende engata yino.

²⁸ Hole emisiruunga ky'embaao ch'omugaasia, mani mumale mukibwiiheho neende esaabbu.

²⁹ Hole esaani, ebikoombe, enjaagi, neende ebbakuli ebihoyeere ohwehoonyerwaanga mu huyaanayo emituli.

³⁰ Emeesa yino yihoyeere ohuteebwa mu moni w'Esanduuku ly'Endagaano, nae haandi hu meesa ohwo huhoyere ohubechaangaho ebiha byoosi omugaati kwalabiswa okwaange.”

Esiteeni sy'etaara

³¹ “Hole esiteeni sy'etaara esy'esaabbu haya. Hole obweemero bwasyo neende omusiiro eby'esaabbu hong'oonde; ebimuli byuubbe byaahwo, neende ebimuli bisiiri ohubwiihuha neende emilokoyo kyeene, bihoyere ohuba nibihola omubiri kwasyo mulala.

³² Amasaga kasaasaba kachia ohuba nikakabuhira hu nyaande chasyo, nga buli kadatu kaba hu lwaande lulala.

³³ Buli lala hu masaga kasaasaba lihoyere ohubaaho ebimuli byuubbe bidatu nibyaholwa koti esimuli silaangwa ‘alimoondi’ esibaambula neende emitoombo haandi neende emilokoyo.

³⁴ Esiiro y'esiteeni sy'etaara, yihoyeere ohubaaho ebimuli byuubbe bine ebyaholwa koti alimoondi sibaambula neende emitoombo haandi neende emilokoyo.

³⁵ Yihoyere ohubaao omutoombo mulala aasi wa buli masaga kabiri-kabiri amahabi kadatu.

³⁶ Emitoombo, amasaga, alala neende esiteeni sy'etaara bihoyere ohuba omubiri mulala okw'esaabbu hong'oonde ehaya.

³⁷ Hole amataara kataanu-na-kabiri ak'ohuba hu siteeni sy'etaara esyo mani mukatekehe keeme kaaduhe nikatingaalire mu moni.

³⁸ Hole magalo kasyo alala neende otukae twaahwo eby'esaabbu haya.

³⁹ Mwehoonyere ekiloguraamu amahumi kadatu neende chitaanu ech'esaabbu haya ohuhola esiteeni sy'etaara, alala neende ebichiiraho byoosi.

⁴⁰ Mweliinde mani mubihole byoosi ohuloondakana neende endekeha yi hweekeseere hu lugulu luno.”