Ohutula 24 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Endagaano yifuundihwa

¹ Omwaami yaboolera Musa ati, “Ewe yichia oniine hu lugulu yiindi, ewe alala neende Arooni, Nadabbu, Abbihu, neende abeemirisi ba Yisiraeli baandi amahumi kataanu-na-kabiri; mani noonaba nosisiiriho eyale, muchia ohuguunama aasi muunyinamire.

² Ewe weeng'ene sa, abulao yesi hu baandi abo, ohoyere ohusuda yiindi. Abaandu baandi bosi haba sibahoyeere kata ohusudaho hu lugulu luno.”

³ Musa yacha yaboolera abaandu abo amalako k'Omwaami koosi, haandi neende embaliiriro choosi, mani abaandu boosi baakoboleramo alala nibaboola bati, “Huchia ohuhola buli siindu si Omwaami aboolere.”

⁴ Musa yaandiika amalako k'Omwaami koosi. Mani nibwahya oludaalo luloondaho echuli-chuli, yoombaha alutaari mu nandaalira y'olugulu olwo, mani yaamala yeemesa amakina ehumi neende kabiri, buli litula nilihiihirira buli enono ya Yisiraeli.

⁵ Bulaanu Musa yatuma abasyaani baraaga, bachia basaambira Omwaami ebiyaanwa, mani bayaana ebyaayo ebya ebiyaanwa by'ohusaangirana.

⁶ Musa bulaanu yabukula esituundu sy'amabaanga k'ebisolo mani naakadaira mu bbakuli; mani esituundu siindi naasinyulaanyusa hu alutaari.

⁷ Haandi yabukula esitabo syalimo endagaano, mu malako k'Omwaami kali nikaandiikwa, mani nasisomera abaandu abo boosi mu kono ly'aakulu muno. Boosi baboolera alala bati, “Efwe huchia ohufunihira Omwaami oyo, mani huhole buli siindu si alagiire.”

⁸ Haandi Musa yabukula amabaanga kali mu bbakuli mani nakaanyulira hu baandu. Yaboola ati, “Kano niko amabaanga kafuundihira endagaano yi Omwaami aholere naang'we naatusire amalako kano koosi.”

⁹ Musa, Arooni, Nadabbu, Abbihu, alala neende abeemirisi ba Yisiraeli amahumi kataanu-na-kabiri baniina hu lugulu

¹⁰ baabona Nasaae wa Yisiraeli. Aasi w'amakulu kae mwalimo esiindu syali nisifwaana koti oluhingagi lw'amakina kafwaana bbulu koti ekulu akalaangwa mbwe safire.

¹¹ Nasaae haba siyaholaho esiindu sibi hu baandu bano abali abeemirisi mu Yisiraeli; baanyala ohubona Nasaae, baalya haandi baang'weera alala.

Musa naali hu Lugulu Sinai

¹² Omwaami yaboolera Musa ati, “Niina hu lugulu wiiche yiindi, mani nooba nooli ano, njia ohuhuberesa ebituundu bibiri eby'amakina ebiriho amalako koosi kaanyandiikire ohweekesa abaandu abo.”

¹³ Musa alala neende Yosua omuhoonyi wae, beetekeha, mani Musa yaachaaka ohuniina aakulu woolugulu lwoolerefu.

¹⁴ Bulaanu, Musa yaboolera abeemirisi abo ati, “Eng'we mutuliindire sa mu kaambi muno, ohwoola lu hunakobolera. Arooni alala neende Huuri mbano bali ano naang'we; mani oyo yeesi oli neende siyekanyiirisa syoosi siholebwe, ahoyere ohuchichaanga yi bali.”

¹⁵ Musa yaniina hu Lugulu lwa Sinai, mani esireesi nisiicha nisilufuuniha.

¹⁶ Oluyaali lw'Omwaami lwafuuniha Olugulu lwa Sinai, mani esireesi nisilufuuniha endaalo chisaasaba enaamba; mani hu ludaalo lwa chitaanu-na-chibiri, Omwaami yalaangira Musa omweene mu sireesi akati.

¹⁷ Bulaanu ohubonehana hw'oluyaali lw'Omwaami hwali nihufwaana koti omuliro kweereba aakulu bweene hu lugulu mu hubona hw'abaandu ba Yisiraeli.

¹⁸ Musa yeengira mu sireesi esyo, mani naaniina aakulu hu lugulu olwo. Mani Musa yaaba hu lugulu olwo endaalo amahumi kane amalaamba esiro n'esideete.