Ohutula 21 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Engeri y'ohubukuliramo abawaambe

¹ “Chia oberese Abaisiraeli amalako kano:

² Nooba nookula Omuibburania muwaambe, aba ahoyere ohuhuhalaabanira hulw'embaka y'emyaaka kisaasaba kyoong'ene. Omwaaka kwa hataanu-na-habiri, aba ahoyere ohulehuulwa naatatuungireho esiindu syoosi.

³ Naaba yali omusaacha otadeehya lu yeholera omuwaambe wao, haba saaba ahoyera ohuwaao neende omuhasi yeesi; nae naaba niyali niyadeehya, lu yeholera omuwaambe wao, anyala yawaao neende omuhasi wae oyo naadaha.

⁴ Nae nikali mbwe omukali wae niye owamuberesa omuhasi, mani omuhasi oyo yaamwiibulira abaana basyaani, oba abaana bahaana, mani omuhasi oyo alala neende abaana bae abo boosi baba bali ab'omukali wae oyo, mani omusaacha muwaambe oyo aba ahoyere ohuwaao yeeng'ene.

⁵ Nae nikali mbwe omusaacha muwaambe oyo aboola ati ye yaheera sa omuhasi wae oyo, alala neende abaana bae abo, mani yaaba mbwe haba saadaha alehuulwe,

⁶ mani omukali wae oyo aba anamubukula mani amuyire abuundu wohwiinamiraangamo Nasaae. Niboola ao, omukali oyo aba anamuhola yeeme yegeeng'e hu lwiiki, oba hu fureemu y'olwiiki, mani amale amudomole ohutwi hulala. Ao bulaanu oyo aba achia ohuba omuwaambe w'omukali oyo ohwoola lwaalifwa.

⁷ “Nae omusaacha naakusa omwaana wae muhaana koti omuwaambe, omuhaana oyo haba saaba n'alinyala ohulehuulwa daawe, nga lu abawaambe b'esisaacha baholwaanga.

⁸ Nae naaba naakuswa omuundu oba naadaha ohumuhola abe omuhasi wae, nae byoola yaamuhaya, omuhaana oyo achia ohukuswa laatang'ene haandi; omukali wae wuno haba safukiirirwa ohumukusa bawalukeenda baandi daawe, olwohuba ao aba amuyirire bubi muno.

⁹ Nae omusaacha naakula omuwaambe w'esihasi, mbwe achie amuberese omwaana wae ohumudeehya, ahoyere ohumuyira koti omwaana wae muhaana mweene.

¹⁰ Niwiichuhanaanga omusaacha yeesi n'adeehya omuhasi wohubiri, ahoyere yemeede sa ohuberesaanga omuhasi wae waamberi ebyohulya byaakanirira, neende engubo neende ebyo byoosi byahoyera ohunyoolaanga koti omuhasi wae ohutula hale.

¹¹ Nikali mbwe haba saadaha ohwooseresa obufunaanibwa buno buti yaali, ahoyere ohumulehuula aweeo naataabaanjireho eehwe yoosi.

Amalako kadiira hu biholwa by'egiili

¹² “Oyo yeesi ohuya owuundi yaamwiita, ahoyere yesi ohwiitwa.

¹³ Nae nibiba mbwe yeechuhanira sa, nae haba siyali n'achiririire ohumwiita, anyala yeeruhira abuundu yi njia ohubadoolera ese omweene, mani eyo niyo yaaba achia ohuwonera.

¹⁴ Nae nikali mbwe omuundu yeesi anyoolera, mani yachiiririra sa ohwiita owuundi, ahoyere ohwiitwa-bwiitwa, kata neende naaba niyeeruhiire hu alutaari yaange, ohweonia.

¹⁵ “Oyo yeesi ohuya laatang'ene, oba ng'ina aba ahoyere ohwiitwa sa.

¹⁶ “Oyo yeesi owaamba omuundu yeesi, ati amukuse, oba ati amubiihe sa koti omuwaambe, ahoyere ohwiitwa-bwiitwa.

¹⁷ “Oyo yeesi obwaaba laatang'ene oba ng'ina ahoyere ohuwiitwa-bwiitwa.

¹⁸ “Abasaacha nibanyekana, mani mulala yasiingira yaahuya owuundi neende ekina, oba neende esifuusi, mani owuundi oyo yaahaya ohufwa nae yaakwa sa hu buliri,

¹⁹ haandi mani omweene oyo niyoola yasiingira hu buliri bwae obwo mani yachaaka ohukeenda niyediirira hu mudiiro, oyo owamuhuya aba abulaho omusaango; omuhuyire oyo aba achia sa ohutuunga ebiha bi muhuye aba yanyaasa n'alwaala, haandi ahoyere ohumuhoonya ohwoola lwaonera elalira.

²⁰ “Omweene muwaambe niyeecha yaabukula olusaala mani yaahuya omuwaambe wae oyo, ow'sisaacha oba ow'esihasi, mani omuwaambe oyo yafwiira abweene ao, omukali oyo ahoyere ohubonereswa.

²¹ Nae omuwaambe oyo naamala oludaalo lulala oba chibiri naali omulamu, omukali oyo haba s'aba ahoyere ohubonereswa daawe. Ohufwiirwa emyaandu kyae ohwo byaakana sa neende esibonereso sihoyera.

²² “Abasaacha baandi nibaba nibalwaana mani mu hulwaana ohwo baanyaala omuhasi oli neende enda mani enda eyo yaatula, nae haba sanyaaliiheho kata budiidi, oyo oba niye omuumiise aba ahoyere ohutuungisibwa omutuungo kw'eseende chi wamwe muhasi oyo aba naasabire, nae abakayi bosi nibamalire ohwewuunjaho mu mboosi echio.

²³ Nae omuhasi mweene oyo n'anyaaliha, esibonereso siba sichia ohuba mbwe obulamu butuunga obulamu,

²⁴ emoni yituunga emoni, eliino lituunga eliino, omuhono kutuunga omuhono, ohukulu hutuunga ohukulu,

²⁵ ohuya hutuunga ohuya, ekoonjo lituunga ekoonjo, esinyubu situunga esinyubu.

²⁶ “Omuundu yeesi naahuya omuwaambe wae w'esisaacha oba ow'esihasi, mani yaamutusamo emoni, aba ahoyere ohulehuula omuwaambe oyo yawaao ebihaya, ohutuungana neende emoni eyo.

²⁷ Nae naamubbongolamo eliino ly'omuwaambe wae, aba ahoyere ohumuboolola ebihaya ohutuungana neende eliino elyo.

Obufunaanibwa bw'abeene biindu

²⁸ “Eng'oombe surusi niyitwooma omuundu wuundi yaafwa, yiba yihoyeere ohuhuywa amakina yifwe, mani enyama yaayo yihae ohuliibwa; nae omweeneyo haba saaba ahoyere ohubonereswa daawe.

²⁹ Nae kata katyo, esurusi eyo niyiba mbwe yali niyiri enjalaba mani niyanaliirira ohutwoomaanga abaandu yityo, mani omweeneyo naaba niyalabulwaho, nae yaaba yesi niyahaya ohuyihuungira hu sihoongo, mani yoola ohutwooma omuundu ohwoola ohumwiita, yiba yihoyeere ohuhuywa amakina ohwoola yifwe, haandi omweeneyo aba ahoyere ohwiitwa yesi.

³⁰ Kata katyo, omweeneyo niyoola yaafukiirirwa ohutuunga sa omutuungo aonie obulamu bwae, ahoyere ohutuungira elalira obuungi bw'eseende chiba nichidahibwa esiha esyo.

³¹ Nikali mbwe esurusi eyo yiita omwaana musyaani oba omuhaana, amalako keene ako niko akaba kachia ohuholerwaho.

³² Nikali mbwe esurusi eyo yiita omuwaambe w'esisaacha, oba ow'esihasi, omweeneyo aba achia ohutuunga omweene muwaambe oyo ebituundu by'efeesa amahumi kadatu (30), haandi esurusi eyo yosi yiba yihoyera ohuhuywa amakina yifwe.

³³ “Omuundu yeesi naabwiihula eliina lyoosi, oba naayaba eliina lyoosi mani yaahaya ohulifuunihaho, mani esurusi y'omuundu wuundi oba esuhiri y'omuundu wuundi yeeha yaaliyobohamo,

³⁴ oyo aba ahoyere ohutuunga esisolo esyo. Aba achia ohutuunga omweene sisolo esyo eseende, nae omweene adoong'e neende esisolo siba nisifwiire esyo.

³⁵ Esurusi y'omuundu wuundi niyiicha yeeta esurusi ey'omuundu wuundi yosi, abaandu abo boombi baba bachia ohukusa esurusi enamu eyo mani bamale bakabanemo eseende nibaakanirisa; haandi boombi baba bachia ohubaaka esurusi yifwiire yira, mani bamale bakabanemo enyama yayo.

³⁶ Nae nikali mbwe esurusi eyo yali niyiri enjalaba mani niyanaliirira ohuseetaanga echiindi, nae omweeneyo yahaya ohuyihuungira hu sihoongo, oyo aba achia ohufwiirwa, mani alehe omweene eyiitirwe abukule enamu eyo yoosi, nae anyala yeedoong'esera eyifwiire eyo.