Ohutula 20 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Amalako ehumi

¹ Nasaae yalomaloma amahuwa kano koosi n'aboola ati:

² “Ese niise Omwaami Nasaae Wao owahutusa mu Misiri, yi wali nooli omuwaambe.

³ “Oteenamiranga nasaae wuundi ohumalaho ese.

⁴ “Oteeholeraanga ebifwaanani by'esiindu syoosi esiri Muukulu oba hu syaalo, oba mu maachi akali aasi w'esyaalo.

⁵ Otasigamiraanga esiloongaloongwe syoosi oba ohusiinamira, olwohuba ese niise Omwaami Nasaae weeng'we, nae haba sindesimiirisiraanga oyo yeesi owunyiingania. Ese ndeeta ebibonereso eyiri abo boosi abasyuula, eyiri abeechuhulu baabwe, haandi neende ohwoolera elalira eyiri abeechuhulu baabwe aboohudatu kata neende abohune.

⁶ Nae njekesa obuheeri bwaange bwomiifu eyiri enjibulo amalifu-na-malifu, abaheera haandi abafunihira amalako kaange.

⁷ “Otehoonyeraanga eliita lyaange hu bichiiririrwa bibi, olwohuba ese, Omwaami Nasaae wao, njia ohusaandya oyo yeesi ochakiaa-chakia eliita lyaange.

⁸ Liindaanga Sabbaato mani oyihola yiba enjoolerefu.

⁹ Ewe oli neende endaalo chisaasaba chi ohoyere ohuholeraangamo emirimo kyao kyoosi,

¹⁰ nae oludaalo lwa hataanu-na-habiri, ludaalo lw'ohuwuluuha, olwandeherwa. Mani hu ludaalo olwo, abulao oyo yeesi ohoyere ohuholaho omulimo kwoosi, kata sa ewe, omwaana wao, omuwaambe wao, ebisolo byao, oba bawalukeenda baba nibamenya mu syaalo syao.

¹¹ Mu ndaalo chisaasaba, nimwo mweese Omwaami, ndaholeramo esyaalo, ekulu, enyaanja, neende ebyo byoosi ebibirimo, nae hu ludaalo lwa hataanu-na-habiri, ndawuluuha. Mani sakira ese, Omwaami, ndaberesa oludaalo lwa Sabbaato ehabi mani ndaamala ndaaluhola ohuba olwoolerefu.

¹² “Yisaanga oluyaali mu lataao neende maakoo, hu onyale ohumala endaalo nyiingi mu syaalo sii huberesa.

¹³ “Oteetanga.

¹⁴ “Otayiranaanga.

¹⁵ “Oteebaanga.

¹⁶ “Otabachiraanga owaasyo ebihaya.

¹⁷ “Otekoombaanga enyuumba y'owaasyo; otekombaanga omuhasi wae, omuwaambe wae, ebyaayo byae, esuhiri yae, oba esiindu syoosi syaali nasyo.”

Obuti bw'abaandu

¹⁸ Abaandu nibawulira ohwaaduluhana hw'ehubba, haandi neende oluyoka lw'eturumbete, haandi baabona neende ohumyeesuhana neende ohufuduumbuha hw'omwoosi nikutula mu lugulu omwo, badiirwa obuti baachaaka ohuteengereha, mani beeseenda beemera eyale neende olugulu olwo.

¹⁹ Baboolera Musa bati, “Ewe omweene n'onalomalomaanga naafwe, hunahutekeeresaanga; nae efwe hutiire huti nikali mbwe Nasaae mweene niye onemeeda ohutulomalomera, huba huchia ohufwa-bufwa.”

²⁰ Musa yakobolamo ati, “Eng'we mutatya haba; Nasaae omweene yeechere ohubahema sa, haandi neende ohubona ati mwemeeda ohumutichaanga, hu mweemeo muhaye ohwonoonaanga.”

²¹ Kata katyo abaandu nabo bemeedaanga sa ohweyaaba nibeema eyale, ohumalaho Musa yeeng'ene niye owanyala ohusudaanga aambi neende esireesi siboyu yi Nasaae mweene yali.

Amalako kadiira hu alutaari chikabuhaane

²² Omwaami yalagira Musa ohuboolera Abaisiraeli ati: “Mbaasa bulaanu omalire ohubona koti lu ese, Omwaami mweene hulomalomeere ohutula Muukulu.

²³ Muteeholeraanga abeene banasaae b'efeesa, oba ab'esaabbu mbwe mu beenamireenge ni mumeeda hw'ese.

²⁴ Eng'we muuholere alutaari yohu syaalo huno, mani ohwo nihwo humuba muchicheenge nimuyaaniraho amakoondi keeng'we, neende eng'oombe cheeng'we koti ebiyaanwa bihoyere ohusaambirwa elalira byaawa neende ebiyaanwayo by'obusaangirani. Mani, buli abuundu yimbakabulira endulo, abecheenge eweeng'we w'ohunyinamiramo, mba ndechaanga yi muli mani mbaberesa ehabi.

²⁵ Nimunabechaanga nimuli ohuunyoombahira alutaari y'ekina, mutayoombahiraanga amakina mabaache, olwohuba nimwehoonyera esichuma syooki ohubaacha amakina, muba mukanyaasa koole kahaye ohubaamo obuhoonyi yi ndi.

²⁶ Mutaanyoombahiraanga alutaari yiriho amadaara kaniina ohwoola yi yiri; nae nimuhola mutyo, muba muchia ohwefuunulaanga esyeekenye nimuniina amadaara ako.