Ohutula 2 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ohwiibulwa hwa Musa

¹ Mani mu siha syeene sino, omusaacha otula mu nono ya Leefi yadeehya omuhasi otula mu nono ya Leefi lweene eyo.

² Omuhasi oyo naamwiibulira omwaana musyaani. Niyabona obulai bw'omwaana oyo, yamukisa obutabonehana hulw'embaka y'emyoosi kidatu emilaamba.

³ Nae omwaana oyo niyoola yaaba nga sasiinyaliha ohukiswa, ng'ina yabukula esimweero syaholwa mu makada, mani yaasiwomaho neende ewula yikayire amaachi ohusiingiramo. Yabukula omwaana oyo, mani yaamuta mu simweero esyo, yasikiinga yasita mu seeme liri hu ndulo w'omwaalo okwo.

⁴ Mboochoong'ene omwaana oyo nae yeekisa eyale budiidi ohutula ao ohubona esinyala syeeholeha hu mwaana oyo.

⁵ Omuhaana w'omutuki oyo yeeha hu mwaalo okwo ohwedubulya, nae abahalaabani bae b'esihasi nibahola nibang'alaalaanga hu lukoongo. Abweene ao, omuhaana oyo yaasiingisa emoni yaabona esimweero esyo nisiri mu seeme, yaatuma omuhasi muwaambe wuundi ohuchia ohusikiinga amuleetere.

⁶ Omuhaana oyo yasibwiihula mani yaabona omwaana musyaani oyo. Omwaana oyo yali n'aliraanga, mani yamukwiira esisa n'aboola ati, “Ngaandi wuno ni mulala hu baana basyaani Baibburania.”

⁷ Mboochoong'ene mwaana oyo yateeba omuhaana oyo ati, “Njie hulaangire omuhasi Muibburania abe omulesi w'omwaana wuno?”

⁸ Omuhaana oyo nae yamukobolamo ati, “Eee, hola otyo.” Mani mboochoong'ene oyo yaachia yaleeta ng'ina mwaana mweene.

⁹ Mani omuhaana w'omutuki oyo naaboolera omuhasi oyo ati, “Ewe, bukula omwaana wuno ochie omuunderereenge, njia ohuhutuungaanga.” Mani omuhasi oyo n'abukula omwaana oyo n'achaaka ohumulera.

¹⁰ Luunyuma, omwaana oyo niyahula, yamukiinga yamuyiirira omuhaana w'omutuki oyo, mani n'amubukula koti omwaana wae mweene. Yaboola mu mwooyo kwae ati, “Ndamwiinulula ohutula mu maachi, mani sakira njia ohumukuliha endi Musa.”

Ohwiiruhira hwa Musa mu Midia

¹¹ Musa niyahula, yatula mu dooho yaachia ohukeniya abaandu bae, Abaibburania, mani yabona koti lu bali nibasaandisibwa nibabayiika ohuhola emirimo midinyu muno. Yabona Omumisiri niyeeta sa Omuibburania kalole-kaamoni, owali mulala hu baandu ba Musa beene.

¹² Musa yabodoohania emoni, yaabona ati abulao omuundu wali nababona, yenyiira yeeta omusaacha Mumisiri oyo mani yaakisa omubiri kwae mu musenye.

¹³ Oludaalo lwaloondaho Musa yakobolayo yaabona abasaacha Baibburania babiri nibalwaana. Musa yaboolera omusaacha wali naali niye omutaangani ati, “Lwasiina ewe oli ohuhuya Omuibburania waasyo?”

¹⁴ Omusaacha oyo nae yamukobolamo ati, “Wiina mweene ohuholere ohuba omutuki weefwe, haandi omukayi weefwe? Kose ewe odaha ohunjiita koti lu weetere Omumisiri wula?” Musa yatya muno, mani yeboolera mu mwooyo kwae ati, “Hane, abaandu baandi bamalire ohumanya esiholwa sindaholere esyo.”

¹⁵ Mani omutuki oyo niyawulira ebyali byeholeehe, yakiiya muno ohwiita Musa, nae Musa yeeyiba mani niyeeruhira yaachia Midia.

¹⁶ Mani ludaalo luundi, Musa niyali niyehaale hu sulo, abahaana bataanu-na-babiri aba Yetero, omulaamisi wa Midia, beecha hu sulo eyo ohudaya amaachi ohwiichusa emileemo ki makoondi alala neende embusi cha Yetero saabwe byang'weeraangamo.

¹⁷ Nae abaayi baandi beerusa abahaana ba Yetero boosi baawao. Nae Musa yachia ohubahoonyeraho mani yaabang'weesera ebisolo byaabwe byoosi.

¹⁸ Abahaana abo nibakobola eyiri Reweli saabwe, yabateeba ati, “Eng'we lwasiina leero mukoboole hale-hale muti?”

¹⁹ Nabo bamukobolamo bati, “Omumisiri wuundi niye otuwoniisye eyiri abaayi bala, haandi niye otudayiire amaachi, haandi yaatung'weesera ebisolo byeefwe.”

²⁰ Nae yaabateeba ati, “Ali yeena? Lwasiina eng'we mulehere eyo omusaacha oyo? Muchie mumulaange yeeche alye naafwe.”

²¹ Musa yakanya ohumenya ebweene eyo, Yetero yaamuberesa Sipoora omuhaana wae badeehisanie,

²² mani namwiibulira omwaana musyaani. Musa yeboolera mu mwooyo kwae omweene ati, “Ese ndi omukeni mu syaalo sino, sakira hamukulihe endi Gerisoni.”

²³ Emyaaka emiingi nikyabitao, omutuki wa Misiri wuno yafwa, nae Abaisiraeli nabo baadoong'a nibasaandira mu buwaambe, mani baalira nibadaha obuhoonyi. Amaliro kaabwe koola eyiri Nasaae,

²⁴ owawulira amaliro kaabwe, haandi yeechulisa endagaano yae neende Abburahamu, Yisaka, neende Yakobbo.

²⁵ Yabona obuwaambe bw'Abaisiraeli mani yachaaka ohubachuunirwa.