Ohutula 19 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Abaisiraeli nibali aambi neende Olugulu Sinai

¹ Hu ludaalo lutaangira, mu mwoosi kw'ohudatu, abaandu ba Yisiraeli bano nibali nibamalire ohutula mu syaalo sy'e Misiri beengira mu siparara sya Sinai.

² Mani nibali nibamalire ohutula mu Refidiimu niboolere mu Sinai omwo, bata ekaambi mu nandaalira y'olugulu lwa Sinai,

³ mani Musa yaniina yaachia hu lugulu lweene olwo ohwakaanana neende Nasaae. Omwaami yamulaangira hu lugulu ohwo niyamuboolera ati achie aboolere Abaisiraeli, abali abeechuhulu ba Yakobbo ati:

⁴ “Eng'we mwabona esiindu si Ese, Omwaami, ndahola Abamisiri, haandi koti lu ndabakiinga koti eeswi ehasi yikiingaanga emwiinyu yao hu mbaya, ndabaleeta ano yi ndi.

⁵ Bulaanu, nimuba nimuchia ohuumbulira, mani mwooseresa endagaano yaange, muba munaba abaandu baange beene. Esyaalo sino syoosi n'esyaange, nae eng'we muba muchia ohuba abaandu baange badoolebwa,

⁶ abaandu bediisa ese syeeng'ene, mani muchia ohuuhalaabaniraanga koti abalaamisi.”

⁷ Musa yeeha aasi, yalaanga abeemirisi b'abaandu ba Yisiraeli beeche bebuuse alala mani n'ababoolera buli siindu si Omwaami yali n'amulagiire.

⁸ Abaandu boosi bakoboleramo alala bati, “Efwe hunahola buli siindu si Omwaami aboolere,” mani Musa yaakobosera Omwaami amakaluso ako.

⁹ Omwaami haandi yaboolera Musa ati, “Ese njia ohwiicha yooli ni ndi mu sireesi siboyu muno, mani abaandu abo banyale ohuumbulira ninomanoma naawe, mani hu banyale ohuhufukiiriramo ohutula enyaanga yino neende ohwemeeda mu moni.” Musa yaboolera Omwaami bi baandu bali nibakoboolemo,

¹⁰ Omwaami yamuboolera ati, “Ewe chia eyiri abaandu mani obaboolere ohumala oludaalo luno neende muchuli nibeelabya abeene-na-beene nibeetekehera ohwiinamira Nasaae. Bahoyere ohwoosa engubo chaabwe

¹¹ mani beetekehere oludaalo luloonda hu muchuli. Hu ludaalo olwo, ese njia ohwiicha njihe hu Lugulu lwa Sinai, yi baandu boosi banyala ohuumbona.

¹² Ewe chia oteeo olwaaho niwebodoohania olugulu olwo, lu baandu bataahoyere ohuduuma, mani oboolere abaandu bahaye ohuniinaho hu lugulu olwo, kata neende ohulusudahooho sa. Olwohuba omuundu yeesi naahaya yaaluseenaho sa ohukulu ati, aba ahoyere ohwiitwa-bwiitwa;

¹³ oyo aba ahoyere ohuhuywa sa amakina oba ohulaswa neende obuyiingo, ataali omuundu wuundi yeesi ohumudiiraho. Sino sidiira hu baandu boosi alala neende ebisolo byeene; abaandu bano boosi bahoyere, alala neende ebisolo byoosi bihoyere ohwiitwa. Nae kata katyo, eturumbete niyihubbwa yiti, abaandu boosi bahoyeere ohuchia baniina hu lugulu olwo.”

¹⁴ Musa yamala atyo, yeeha yaatula hu lugulu olwo, mani yaboolera abaandu abo ohwetekehera ohwiinamira Nasaae. Boosa engubo chaabwe bulai bweene,

¹⁵ Musa yababoolera ati, “Eng'we muhoya mwaaba nimumalire ohweetekeha bulai bweene hu ludaalo luloonda muchuli, mani muhaya ohuba alala neende omuhasi mu siha sino syoosi.”

¹⁶ Mani echuli-chuli hu ludaalo lwohudatu yabaao ohwaaduluhana alala neende ohumyeesuha-myeesuha, esireesi sy'amaani syaaba hu lugulu, ohwaayuha hw'amaani hw'eturumbete hwoobba hwawuliirihana. Abaandu boosi abali nibali mu kaambi batya baateengereha sa.

¹⁷ Nae Musa yabeemirira baatula mu kaambi bachia ohubukaanana neende Nasaae, mani niboola hu lugulu, beemaanga sa mu nandaalira y'olugulu olwo.

¹⁸ Olugulu lwa Sinai lwoosi lwali nilufuniihwe neende omwoosi, olwohuba Omwaami yali n'alwihiireho mu muliro. Omwoosi kwafudumuhaanga nikuniina aakulu nikulutulaho koti okutula mu tanuuru, mani abaandu baachaakaanga ohuteengereha nibeesusuucha.

¹⁹ Ekono ly'eturumbete nalyo lyemeedaanga sa ohweyongera aakulu. Musa yalomalomaanga, nae Nasaae n'amukobolamo neende ohwaaduluhana.

²⁰ Omwaami yeehera aakulu woolugulu lwa Sinai, mani n'alaanga Musa aniine aakulu bweene hu lugulu olwo. Musa yaniina hu Lugulu

²¹ mani Omwaami yamuboolera ati, “Ewe yiha aasi, mani ochie olabule abaandu abo bateecha baahalakania olwaaho olwo ohwiicha ohundewuunja; nibahola batyo, abaangi hu bo bachia ohufwa-bufwa.

²² Kata neende abalaamisi abasuda yiindi bosi bahoyere ohwelabya abeene-na-beene, ataali ao mba njia ohubaboneresa sa endyo.”

²³ Musa haandi yaboolera Omwaami ati, “Abaandu abo haba sibanyala ohuniina aakulu eno, olwohuba ewe omweene otulagiire oti huhoyere ohuyira olugulu luno koti oluli olwoolerefu neende ohuhola olwaaho lulwebodoohania.”

²⁴ Omwaami oyo yakobolamo ati, “Ewe yiha sa ochie aasi mani okobole ano neende Arooni. Nae abalaamisi, alala neende abaandu baandi boosi, haba sibahoyeere ohuduuma olwaaho olwo, ohuniina beeche yiindi, ataali ao, njia ohubaboneresa sa endyo.”

²⁵ Musa bulaanu yeeha aasi eyiri abaandu baandi, mani naababoolera bi Omwaami yali naaboolere.