Ohutula 18 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Yetero akeniya Musa

¹ Yetero muhweeng'ene Musa, owali omulaamisi wa Midia, yawulira buli siindu si Nasaae yali naaholeere Musa neende abaandu ba Yisiraeli niyabeemirira ohubatusa mu Misiri.

² Yeecha eyiri Musa, n'aleeta Sipoora omuhasi wa Musa, owali niyalehwa enyuma,

³ neende Gerisoni neende Elieseeri, abaana basyaani bae boombi. (Musa yali n'aboolere ati, “Ese ndali ni ndi walukeenda mu syaalo sikeni sino”; sakira yali niyakuliha omwaana wae mulala musyaani ati, Gerisoni.

⁴ Haandi yali niyaboola ati, “Nasaae wa laata yaange niye owahoonya mani yaamonia ohwiitwa neende omutuki wa Misiri”; mani yali niyakuliha omwaana wuundi ati, Elieseeri)

⁵ Yetero yoola neende omuhasi wa Musa alala neende abaana basyaani babiri mu siparara abuundu yi Musa yali n'ateere ekaambi yae eyiri aambi neende Olugulu Lwoolerefu.

⁶ Kata katyo, Yetero yali niyewuunira hale ohweekesa Musa ati bali nibachia ohwiicha yaali,

⁷ Musa yatula yaachia ohumubukaanira, mani yasigama mu moni wae, yamukwa mu sirifu. Bateebana ebidiira hu bulamu bwaabwe boombi, mani beengira mu yeema lya Musa.

⁸ Musa yaboolera Yetero buli siindu si Omwaami yali niyaholera omutuki wa Misiri alala neende Abamisiri boosi hu anyale ohununula Abaisiraeli. Haandi yamuboolera ati ebidiira hu bulamu budinyu bu baandu bali nibabitiramo nibali hu ngira haandi koti lu Omwaami yabawonia.

⁹ Yetero niyawulira hu bino, yasaangaala muno

¹⁰ mani n'aboola ati, “Omwaami afumisibwe, oyo owabawonia ohutula hu omutuki wa Misiri alala neende abaandu ba Misiri! Omwaami afumisibwe, oyo owawonia abaandu bae yaabatusa mu buwaambe!

¹¹ Bulaanu mbano ndahamanyira elalira endi hane, Omwaami wuno muhunuufu ohuhira banasaae baandi boosi, olwohuba yahola bino biti Abamisiri bali nibayira Abaisiraeli neende okusinye kubi.”

¹² Bulaanu, Yetero yaleeta esiyaanwa sy'ohusaambwa syoosi haandi ebiyaanwa biindi biberesebwe Nasaae; mani Arooni alala neende abeemirisi boosi Abaisiraeli boosi baachia nae ohulya ebyohulya byoolerefu sibe koti esiholwa sy'ohwiinamira.

Ohulobolwa hw'abakayi

¹³ Hu ludaalo lwaloondaho, Musa yaoonga nakayaanga obusoolo obwali akatikaati w'abaandu, mani yaadidihaananga ohutula echuli ohwoola engoloobe.

¹⁴ Yetero niyabona buli siindu si Musa yali nahoyeere ohuholaanga, yateeba ati, “Siina syeene sino sy'oli ohuholeraanga abaandu bano? Lwasiina niiwe oli ohuholaanga emirimo weeng'ene, abaandu boosi nibeemere sa ano ohutula echuli ohwoola engoloobe ohuhweteebaangaho?”

¹⁵ Musa nae yakobolamo n'aboola ati, “Ese niise ohoyere ohuholaanga endyo olwohuba abaandu beechaanga yi ndi ohundeteebaho bi Nasaae aba naadaha.

¹⁶ Abaandu babiri nibaba neende amayiingi, beechaanga yi ndi, hu bulaanu ese heengao oyo oba naali owadyeeri, mani nyemao mbaboolera bi bilagiro alala neende amalako ka Nasaae biboola.”

¹⁷ Bulaanu Yetero yaboola ati, “Ao mbona endi ewe haba sooli ohusiholaanga mu ngira ndai.

¹⁸ Ochia ohuwa amaani omweene haandi ojoong'ie neende abaandu bano bosi. Bino biindu bi huhira ewe ohubihola weeng'ene sa.

¹⁹ Bulaanu ewe lehaho huberese amakesi malai, Nasaae achia ohuhusaangaalira haandi ohuba naawe. Ese syesi mbona endi silai nisyo ewe olomalomera abaandu eyiri Nasaae, haandi n'oyira amayiingani kaabwe eyiri Nasaae.

²⁰ Olwohuba ewe niiwe ohoyere ohubeekesaanga amalako ka Nasaae, haandi neende ohubakerakaanga koti lu bahoyere ohumenyana, haandi neende ohubaboolera ebiindi bi bahoyere ohuholaanga.

²¹ Nae ohumeeda ohwo, ewe wesi ohoyere ohulobola abaandu baandi abanyala, mani obahole babe abeemirisi baandi ab'abaandu: abaandi beemirireenge abaandu elifu (1,000), abaandi emia (100), abaandi amahumi kataanu, nae abaandi abaandu ehumi boong'ene. Abaandu bahoyere ohuba abafunihira Nasaae, haandi abanyala ohuba abeesikwa, haandi abatanyala ohukuliirirwa.

²² Leha abaandu bafwaana batyo nibo ababa babe abakayi b'abaandu ab'endaalo choosi abatatusibwayo daawe. Abo nibo ababa bachia ohuleetaanga yooli emisaango kiba nikiri emidinyu muno kyoong'ene, nae abo abeene baheengeenge emisaango myaangu. Esyo sichia ohuhwanguyisira emirimo, koti lu bo bosi bachia ohuhuhoonyanga ohukiinga obusito bwao obwo.

²³ Mani noohola otyo, koti lu Nasaae aboola, ewe haba sooba onejoong'iaanga, haandi abaandu bano boosi baba banakobolaanga mu madaala kaabwe emisaango kyaabwe nichimalire ohuheengwa bulai.”

²⁴ Musa yabukula engeraka ya Yetero eyo

²⁵ mani yaalobola abaandu banyala ohutula mu Abaisiraeli boosi. Yabahola ohuba abeemirisi b'abaandu amalifu, abaandi amamia, abaandi amahumi kataanu-kataanu, haandi neende abaandi ehumi-ehumi.

²⁶ Abaandu bano baholaanga koti abakayi eyiri abaandu abatakaluuhanisibwa daawe, nibaletaanga emisaango midinyu choong'ene eyiri Musa, nae nibaheenga-bu-heenga emisaango myaangu sa abeene-na-beene.

²⁷ Bulaanu Musa yaseebula Yetero, mani Yetero yaakobola engo wae.