Ohutula 17 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Amaachi katula mu lwaanda

¹ Oluyia lw'Abaisiraeli lwoosi lwatula mu siparara sy'Esyonoono, nibayiikaana mu bituundu bikabuhaane, ohweema hu lako ly'Omwaami. Nae bahola ekaambi abuundu alaangwa ati Refidiimu, nae kata katyo amaachi kohung'wa haba sikaliyo.

² Haandi abaandu bekanyiirisira Musa nibaboola bati, “Ewe tuberese amaachi ak'ohung'wa.” Nae Musa yakobolamo ati, “Eng'we lwasiina muli ohwekanyiirisa? Lwasiina muli ohuteema Omwaami mutyo?”

³ Nae abaandu bali neende obuluwo bubitiirifu mani bemeeda sa ohwekanyiirisira Musa. Baboola bati, “Ewe lwasiina watutusa mu Misiri? Ohutwiita efwe alala neende abaana beefwe boosi, neende ebiindu bilamu byeefwe byoosi obuluwo?”

⁴ Musa yekweeda Omwaami neende obumaliirifu bweene n'aboola ati, “Ndaahole endye abaandu bano boosi? Bali aambi ohuuhuya amakina.”

⁵ Omwaami yaboolera Musa ati, “Chia obukule abeemirisi baandi ba Yisiraeli mani ochie nabo mu moni w'abaandu. Bukula ochie neende endabuhi yi wahuyira hu mwaalo kwa Naili.

⁶ Ese njia ohweema mu moni wao hu lwaanda oluli aambi neende Olugulu lwa Sinai. Ewe huya sa hu lwaanda, mani amaachi kachia ohulutulamo abaandu bang'we.” Musa yahola atyo mu moni w'abeemirisi ba Yisiraeli.

⁷ Abuundu ao yalaangwa ati Maasa neende Meribba, olwohuba ao niwo yi Abaisiraeli bekanyiirisira nibateema Omwaami nibeeteeba bati, “Omwaami wuno ali naafwe kose daawe?”

Ohulwaana ebiita neende Abamaleki

⁸ Abamaleki baseeta Abaisiraeli nibali Refidiimu.

⁹ Musa n'aboolera Yosua ati, “Ewe doolaho abasaacha baandi, abachia ohulwaana neende Abamaleki muchuli. Nae ese njia ohweema aakulu hu sigulu nindiirire endabuhi yi Nasaae yamboolera ohukiinga.”

¹⁰ Yosua yahola koti lu Musa yali yamulagiire yachia ohulwaania Abamaleki, nae Musa, Arooni, neende Huuri bachia baaniina aakulu hu lugulu.

¹¹ Koti lu Musa yalichiingi n'akiingire amahono kae aakulu, Abaisiraeli bayiingiraanga, nae niyesaanga amahono aasi, Abamaleki bachakaanga ohuhira.

¹² Mani amahono ka Musa nikajoong'a, Arooni neende Huuri bamuleetera ekina yehaleho, nabo badoong'a sa nibeemere muumbafu wae mani baadiiririra amahono kae kadoong'e nikali aakulu, nibakadiiririire bulai bweene aakulu ohwoola lu lyuuba lyakwa.

¹³ Mu ngeri yino, Yosua yayiingirira elalira Abamaleki.

¹⁴ Omwaami yaboolera Musa ati, “Ewe yandiika ebidiira hu huyiingira huno, hu binyale ohwiichuliswaanga. Boolera Yosua oti ese njia ohusihirisira elalira Abamaleki.”

¹⁵ Musa yoombaha alutaari abweene ao, mani yaayilaanga ati, “Omwaami niye ebbeendera yaange.”

¹⁶ Yemeeda n'aboola ati, “Kingeenge aakulu ebbeendera y'Omwaami! Omwaami aba achia ohwemeeda nayiingiraanga Abamaleki endaalo choosi.”