Ohutula 14 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ohwaambuha Enyaanja Njahanyu

¹ Omwaami yaboolera Musa ati,

² “Boolera Abaisiraeli bakaluuhane bakobole enyuma mani bate ekaambi mu moni wa Pi Hahiroti, akatikaati wa Migidooli neende Enyaanja Njahanyu, aambi neende Bbaali Sefooni.

³ Omutuki w'e Misiri achia ohubaasa ati, hane mbao Abaisiraeli bali ohwebodoohanianga sa mu syaalo muno, mani esiparara sibekalirisaanie sibahayire ohubitamo.

⁴ Njia haandi ohumuhola ahole esyeejo, abaloondeho, mani haandi ohumuyiingira alala neende amaye kae hwiiche huundeetere ohwiiswamo oluyaali muno. Ao haandi niwo yi Abamisiri bachia ohumanyira elalira bati ese niise Omwaami.” Abaisiraeli bahola koti lu bali nibababoolere.

⁵ Nae nibaboolera omutuki wa Misiri oyo bati, abaandu bano bali nibeeyibire nibaweereo, omweene alala neende abahoongo bae bakaluuhania ebibaaso byaabwe, baboola bati, “Huholere siina syeene sino? Hane hulehere Abaisiraeli beeyiba baawaao, mani humalire ohubafwiirwa ohuba abawaambe beefwe!”

⁶ Omutuki oyo yabukula ebigaari by'efaraasi ch'ebiita alala neende eye lyae n'abitekeha bulai ohuseeta.

⁷ Yasiimbuhira hulala neende ebigaari byae byoosi, alala neende abalwaani bae b'amaani bahiramo aboola emia chisaasaba (600) nibeemiriirwe neende abahoongo baandi.

⁸ Omwaami yahola omutuki wuno ohuba neende esyeejo, mani yaheengao ohuseeta Abaisiraeli, abali nibeweerao nibeehoya hulw'ohuyiingira.

⁹ Eye lya Misiri, alala neende efaraasi choosi, ebigaari, alala neende abeerusi babyo, lyaloonda hu Abaisiraeli lyaabakaana yi bali nibateere ekaambi hu ndulo w'Enyaanja Njahanyu haandi aambi neende Pi Hahiroti neende Bbaali Sefooni.

¹⁰ Abaisiraeli nibabona bati, hane omutuki oyo alala neende eye lyae yali n'abaseeta yi bali, baatya muno, mani baalirira Omwaami waabwe abahoonye.

¹¹ Baboolera Musa bati, “Ewe obaasa oti mu Misiri mwali nimubulamo eng'ani, hu weemeo otutuseyo otuleeta hufwiire erwaanyi eno mu siparara? Mani bona esiindu siwaholere, ohututusa mu Misiri!

¹² Efwe haba sihwahuboolera nihutachaaka olukeendo huti bino nibyo ebichia ohweholehana? Hwali nihuhuboolere huti tulehe hube, hwemeede ohuhalaabaniraanga Abamisiri koti abawaambe. Syahabeere esilai nihwahadoong'ere nihuli koti abawaambe nihuli eyo, ohuhira ohwiicha ohufwiira ano mu siparara.”

¹³ Musa nae yabakobolamo ati, “Eng'we mutatya! Mwomiirire sa yi muli, mani muchia ohubona bi Omwaami achia ohuhola ohubawonia enyaanga yino; haba simuchia hubonaho Abamisiri bano ehabi liindi.

¹⁴ Omwaami achia ohubalwaanira, sibulao simuhoyeere ohuhola.”

¹⁵ Omwaami yateeba Musa ati, “Lwasiina muli ohundirira mbahoonye? Ewe boolera abaandu abo bemeede ohuchia mu moni.

¹⁶ Siingisa endabuhi yao eyo aakulu mani oyidiiririre aakulu w'enyaanja eyo. Amaachi kachia ohukabuhanamo akeene, mani Abaisiraeli bakeende nibahalakaniamo hu loba lyoomu.

¹⁷ Njia ohuhola Abamisiri babe neende esyeejo mani babaloondeho mu nyaanja hu nyale ohunyoola oluyaali ninyiingira omutuki oyo, eye lyae, ebigaari byae, alala neende abeerusi bae.

¹⁸ Nimbayiingira, ao niwo yi Abamisiri bachia ohumanyira bati, ese niise Omwaami.”

¹⁹ Malaika wa Nasaae, owali naali mu moni w'omukaanda kwa Yisiraeli, yakaluuhana yaachia emukoongo waabwe. Esiiro y'esireesi yosi yachaaka ohusuda ohwoola lu yoola

²⁰ akatikaati w'Abamisiri neende Abaisiraeli. Esireesi esyo syaleetera Abamisiri esiirima, nae syaaleeta obulafu eyiri Abaisiraeli, mani byaakayira amaye koombi kaahaya ohusudanaho esiro syoosi.

²¹ Musa yasiingisira omuhono kwae hu nyaanja, mani Omwaami yasiindiha enyaanja yaasuda enyuma niyehoonyera omuyaka kw'amaani kw'ebukwe. Kwawuucha esiro syoosi, mani kwakaluuhania enyaanja yaaba eloba lyoomu. Amaachi kaadihanamo habiri,

²² mani Abaisiraeli banyala ohuhalakania enyaanja nibakeenda hu loba lyoomu, amaachi nikeeholere ebida biyiriihe embeka choombi.

²³ Abamisiri babaloondaho, beengira mu nyaanja boosi alala neende efaraasi choosi, ebigaari, neende abeerusi babyo.

²⁴ Nibwali hu buhya echuli-chuli, Omwaami yatingaala aasi naabitira mu siiro y'omuliro neende esireesi yaabona eye ly'Abamisiri mani nabataamo oluteengo.

²⁵ Yahola emipiira ch'ebigaari byaabwe chaanda, byaachihaya ohwehuyuungirisa bulai mani ebigaari byosi byaahaya ohwiiruha bwaangu. Abamisiri baboola bati, “Mbano Omwaami ali ohuhoonya Abaisiraeli ohutulwaania. Lehe hubatulireho ano bweene!”

²⁶ Omwaami nae yaboolera Musa ati, “Ewe kololera omuhono kwao hu nyaanja, mani amaachi kachia ohukobola enyuma kamire Abamisiri alala neende ebigaari byaabwe, neende abeerusi beene.”

²⁷ Musa yakololera omuhono kwae hu nyaanja, mani obwiire nibwali hu buhya sa buti, amaachi kakobola mu bwooloberefu bu kabeechaangamo hale. Abamisiri bateemaho ohwiiruha banyale ohutula mu maachi, nae Omwaami yabasukuna mu nyaanja.

²⁸ Amaachi ako kakobola enyuma mani kaamira ebigaari ebyo, abeerusi, neende eye ly'Abamisiri lyoosi elyali nililoondere Abaisiraeli ohwoolera elalira mu nyaanja; abulao omuundu kata mulala owawona hoomo.

²⁹ Nae Abaisiraeli bakeenda hu loba lyoomu nibahalakania enyaanja, amaachi nikeholere ebida biyiriihe hu mbeka choombi.

³⁰ Hu ludaalo olwo, nilwo hu Omwaami yawonisiraho abaandu ba Yisiraeli ohutula hu Abamisiri, mani Abaisiraeli baabona emilaambo kyaabwe nikyandakalaale hu lwaasi lw'enyaanja.

³¹ Abaisiraeli nibabona obuhunuufu bw'obunyala bu Omwaami yehoonyera ohuyiingira Abamisiri abo, beema baateng'eng'alira sa hu Omwaami; haandi bemeeda ohuba neende efukiirira hoongo mu Omwaami, neende mu Musa omuhalaabani wae.