Ohutula 12 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Esidyaalo sya Paasaka

¹ Omwaami yalomaloma eyiri Musa neende Arooni nibali mu Misiri n'aboola ati:

² “Omwoosi kuno kuhoyere ohuba nikwo omwoosi kuchaaka okw'omwaaka kweeng'we.

³ Yekese oluyia lw'Abaisiraeli lwoosi amakerako kano: Oti, hu ludaalo lw'ehumi lw'omwoosi kuno buli muundu ahoyere ohudoolaanga ekoondi doto oba emeeme ohweema hu daala lyae.

⁴ Nae edaala lyae niliri ediidi muno, nilitanyala ohulya esyaayo esyo syoosi ehabi lala, oyo neende oba namusibiriraho mu bumenyo, banyala baahoonyana ohulya esyaayo esyo, ohukeraania neende obuungi bw'abaandu, haandi neende obuungi bw'omukabo ku buli muundu anyala ohulya yaamala.

⁵ Onyala ohudoola ekoondi oba embusi, nae yihoyeere ohuba eyimalire omwaaka mulala, esaacha, haandi eyitaaliho obulema bwoosi.

⁶ Mani engoloobe hu ludaalo lw'ehumi-na-chine olw'omwoosi kuno, oluyia lw'Abaisiraeli lwoosi luhoyeere ohwiita ebyaayo bino.

⁷ Abaandu boosi bahoyere ohubukula amabaanga madiidi kati, mani baakabaha hu makutu kali hu milyaango, haandi neende aakulu w'emilyaango ky'enyuumba chiriirwamo ebyaayo ebyo.

⁸ Enyama eyo yihoyeere ohusaambwa esiro syeene esyo, haandi yiriibwe alala neende elyaani lulu muno, alala neende emigaati ky'obusye butaali obubbaahe.

⁹ Mutalyaaho enyama yoosi eyiri embisi oba eyiri endeehe daawe, nae mulye niyiri esaambe, kata neende omutwe, ebireenge, alala neende amala keene.

¹⁰ Mutalehaho esituundu syayo syoosi-syoosi ohukona bwaahya; nae nabaao esihaya ohweelya bwaahya, esyo sihoyeere ohwesaamba syaakwa ekohe.

¹¹ Haandi muhoyere ohusilya nimuyuyuhana, nimweeboyere esibiro mu bibuno, nimwefwaalire ebiraato haandi nimuli neende emidiiro mu mahono. Sino nisyo Esidyaalo sya Paasaka sy'ohuunjisamo oluyaali, ese Omwaami.

¹² “Esiro syeene esyo, njia ohubita mu syaalo sy'e Misiri, ninjita buli syaamberi sisaacha, oba omuundu oba esisolo, haandi neende nisaandya banasaae ba Misiri boosi. Ese niise Omwaami.

¹³ Amabaanga kachia ohuba hu makutu niko akachia ohuba ahalolero heekesa enyuumba chimwamenyamo. Niimbona amabaanga ako, mba njia ohubabitaangaho hae ohubanyaala nae nisaandya Abamisiri.

¹⁴ Muhoyere ohwiisa oluyaali mu ludaalo luno koti oludaalo lw'esidyaalo sy'ediini ohubeechulisaanga ebiindu bi ese, Omwaami, holere. Lehe lubecheenge olw'Esidyaalo mu ndaalo chiicha choosi.”

Esidyaalo sy'emigaati kitaabbaahirwe

¹⁵ Omwaami yaboola ati, “Endaalo chitaanu-na-chibiri, mutaliichaangaho emigaati kibbaahirwe; muliicheenge emigaati ekitaabbaahirwe kyoong'ene. Hu ludaalo lutaangira muhoyere ohwemalaho amamera koosi mu madaala keeng'we, olwohuba mu ndaalo echio chitaanu-na-chibiri, omuundu yeesi naalya emigaati kibbaahirwe, aba haba saacha ohubukulwa koti mulala hu baandu baange.

¹⁶ Mani hu ludaalo lutaangira, haandi neende hu ludaalo lw'ohutaanu-na-habiri, muhoyere mubukaananeenge ohwiinamira Nasaae. Kubulao omulimo kwoosi okuhoyere ohuholwa hu ndaalo echio choombi, ohumalaho sa mbwe munyala mwaatekeha ebyohulya.

¹⁷ Huseenge Esidyaalo sino, olwohuba lwali hu ludaalo luti nilwo lundatusira enono cheeng'we choosi mu Misiri. Mani endaalo choosi, muhoyere ohuhusaanga oludaalo luno lube olwe'Esidyaalo.

¹⁸ Ohuchaakira engoloobe y'oludaalo lw'ehumi-na-chine olw'omwoosi kutaangira, ohwoolera elalira engoloobe y'oludaalo lw'amahumi kabiri-na-lulala lw'omwoosi kweene okwo, simuhoyeere ohulyaaho omugaati kwoosi okwabbaahwa.

¹⁹ Sino syeekesa mbwe, hulw'endaalo chitaanu-na-chibiri enaamba, esiindu sibbaahe syoosi-syoosi haba sisihoyeere ohunyoolehanaho mu nyuumba cheeng'we daawe; olwohuba omuundu yeesi niyeechuhana yalyaaho hu syohulya sibbaahirwe, oyo aba anatusibwa hu mukaanda kwa Yisiraeli, kata yaahaba naali walukeenda sa oba omwiibulanwa w'esyaalo esyo.

²⁰ Mutaliichaangaho esyohulya sibbaahirwe syoosi; mu bumenyo bweeng'we bwoosi, muliicheenge sa emigaati kitaabbaahirwe.”

Esidyaalo sya Paasaka sitaangira

²¹ Ao bulaanu Musa yalaanga abeemirisi boosi aba Yisiraeli mani yaboobera ati, “Buli muundu hweeng'we, ahoyere ohubukula ekoondi doto, oba emeeme mani amale yeete, amadaala keeng'we kanyale ohulya Esidyaalo sya Paasaka.

²² Muchia ohubukulaanga omukaanda kw'amasaafu maluluusa mani mwiinihe mu mabaanga k'ebyaayo akali mu bbakuli mani mubahe hu makutu neende hu miwaango ch'aakulu w'emilyaango ky'enyuumba cheeng'we. Yibulao kata omuundu yeesi hweeng'we ohoyere ohutulaho erwaanyi, ohwoola lu buhya.

²³ Mani Omwaami nanaba naali ohubita mu Misiri ohwiita Abamisiri, aba anaaboneenge amabaanga kali hu miwaango ch'emilyaango haandi neende akali hu makutu mani akayira malaika w'Ohufwa ohwiingira mu nyuumba cheeng'we ohubeeta.

²⁴ Eng'we alala neende abaana beeng'we boosi muhoyere ohufunihiraanga amalako kano endaalo choosi pe.

²⁵ Nimwahabe hu mwiingira mu syaalo si Omwaami yasuubisa ohubaberesa, muhoyere ohuholaanga mutyo.

²⁶ Abaana beeng'we nibahabateebenge bati, ‘Omuholo kuno kweekesa siina syeene?’

²⁷ Muba mwahabakaluseengemo muti, ‘Sino nisyo esiyaanwa sya Paasaka esiisa oluyaali mu Omwaami, olwohuba yabita hu enyuumba ch'Abaisiraeli mu Misiri. Yeeta Abamisiri, nae yaaleha ohutwiita.’ ” Ao bulaanu Abaisiraeli basigama aasi beenamira Nasaae waabwe.

²⁸ Mani batula ao, bachia bahola koti lu Omwaami yali n'alagiire Musa neende Arooni.

Ohufwa hw'ebiibulwa byaamberi

²⁹ Mani esiro akatikaati, Omwaami yeeta abaana baamberi basyaani abali mu Misiri, ohutulira elalira hu mwaana musyaani wa omutuki wa Misiri, owali niye ochia ohusihira obwaami obwo, ohwoolera elalira hu mwaana musyaani w'omuboye owali naali mu jeela; kata neende ebyaamberi byoosi eby'ebisolo byosi byeetwa.

³⁰ Esiro syeene esyo, omutuki wa Misiri, abahoongo bae, alala neende Abamisiri baandi boosi, basimuswa. Mu Misiri mwoosi mwawuliirihamo embuungu ch'aakulu muno, olwohuba lyabulao edaala kata lala elitaalimo omwaana musyaani ofwiire.

³¹ Esiro syeene esyo, omutuki wa Misiri yalaanga Musa neende Arooni yaababoolera ati, “Mutule muno, eng'we alala neende Abaisiraeli beeng'we! Mutule mu syaalo syaange muno; muchie mani mwiinamire Omwaami weeng'we oyo koti lu mwali nimusabire.

³² Mubukule muchie neende, amakoondi keeng'we, embusi cheeng'we, neende eng'oombe cheeng'we mani mumale muyaaneyo. Haandi syesi muusabireho ehabi.”

³³ Abamisiri bosi beekweeda Abaisiraeli baanguyirise baweeo batule mu syaalo esyo; olwohuba baboolaanga bati, “Ngaandi efwe fweesi hunafwa sa nimutawaao.”

³⁴ Mani Abaisiraeli beechusa ebifulya byaabwe bi badeeheraangamo emigaati neende obusye bukaande obutabbaahirwe, nibabuboyere mu ngubo, mani nibabukiingira hu mabeka.

³⁵ Abaisiraeli bano bali baholere koti lu Musa yali naababoolere, mani bali nibamalire ohusaba Abamisiri engila neende ebbaangili by'esaabbu neende efeesa haandi neende eby'ohwefwaala.

³⁶ Omwaami haandi yahola Abamisiri beesa oluyaali mu Abaisiraeli mani baababeechaanga buli siindu sibabasabaanga. Mu ngeri yino, Abaisiraeli bakiingaanga nibawaao neende emyaandu ky'Abamisiri.

Abaisiraeli batula mu Misiri

³⁷ Bulaanu Abaisiraeli batula nibakeenda naamakulu nibatula Ramesesi nibachia Sukoti. Bali abasaacha elifu emia chisaasaba (600,000), notaabaliireho abahasi neende abaana.

³⁸ Omukaanda muhoongo kw'abaandu baandi, neende amakoondi, embusi, alala neende eng'oombe byosi byachia nabo.

³⁹ Bahubba emigaati ohutula mu busye bw'engaano yali niyitabbaahirwe yi bali nibakiinga ohutula mu Misiri, olwohuba bali nibababbibbiirihaanie ohutula mu Misiri nibatanyala ohutekehaho ebyohulya oba ohubbaahaho engaano bulai.

⁴⁰ Abaisiraeli bano bali nibamala emyaaka emia chine neende amahumi kadatu (430) nibali mu Misiri.

⁴¹ Mani hu ludaalo lu myaaka emia chine neende amahumi kadatu (430) kyaweeraho, nilwo lu enono ch'abaandu b'Omwaami choosi chatulira mu Misiri.

⁴² Esiro esyo nisyo si Omwaami yali n'aliindire ohubatusa mu Misiri; esiro syeene sino, syayaanirwayo Omwaami ohumala endaalo choosi echichia ohubaao koti esiro si Abaisiraeli bosi bahoyere ohuhyeesaanga nibamoka.

Ebilagiro bidiira hu sidyaalo sya Paasaka

⁴³ Omwaami yaboolera Musa neende Arooni ati, “Kano niko amalako kadiira hu Sidyaalo sya Paasaka: yibulao walukeenda yeesi ofukiirirwa ohulya hu mideeho ky'Esidyaalo sya Paasaka,

⁴⁴ nae omuwaambe yeesi yi mwamala ohukula, anyala yaakiryaaho nimutaangira mberi mwaamuheba.

⁴⁵ Abulao omumenyi muwuuyi yeesi oba omuhalaabani mupakase onyala ohukiryaaho.

⁴⁶ Emideeho kino kyoosi kiihoyere ohuliibwa haandi ohumalirwa mu nyuumba yeene eyo kiibachideheeremo; sikihoyere ohutusibwa erwaanyi daawe. Haandi simuhoyeere ohufunakaho kata ekuumba lyoosi ly'esyaayo chana.

⁴⁷ Oluyia lwa Yisiraeli lwoosi luhoyeere ohwesaangaasiraanga mu sidyaalo sino,

⁴⁸ nae omusaacha otaali omuhebe yeesi haba saahoyera ohusilyaaho. Nae walukeenda yeesi owamala ohubamenyamo haandi yesi yekoomba ohulya Esidyaalo sya Paasaka sino, ohwiisa oluyaali mu Omwaami, muhoyere ohutaangira mberi ohuheba buli muundu w'esisaacha oli mu daala lyae. Ao bulaanu oyo aba achia ohuyirwa koti omwiibulanwa Muisiraeli mweene, mani yaanyala ohufukiirirwa ohubeyambaaniaho mu husilya.

⁴⁹ Amalako keene kano kahola neende hu beebulanwa Abaisiraeli beene, haandi neende hu walukeenda baba nibabamenyamo.”

⁵⁰ Abaisiraeli boosi bafukiirira mani nibahola batyo; koti lu Omwaami yali n'alagiire Musa neende Arooni.

⁵¹ Mani hu ludaalo lweene olwo, Omwaami yatusa mu Misiri enono ch'Abaisiraeli.