Ohutula 11 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Musa alaangirira ohufwa hw'ebiibulwa byaamberi

¹ Omwaami haandi yaboolera Musa ati, “Njia ohuleeta esibonereso silala syoong'ene hu mutuki wa Misiri alala neende abaandu bae. Esyo nisiwa, achia ohubaleha mutuleyo. Mubwadyeeri bweene, omweene niye ochia sa ohubaseebula mweesi mutule ao.

² Bulaanu chia olomalome neende abaandu ba Yisiraeli, obaboolere boosi basabe abamenyaane nabo ebyefwaalo eby'esaabbu neende eby'efeesa.”

³ Omwaami mweene yakera Abamisiri beesa oluyaali mu Abaisiraeli. Abweene ao, abaandu bahoongo alala neende abaandu baandi bosi babukulaanga Musa koti omuundu muhunuufu muno.

⁴ Musa yaboolera omutuki wa Misiri ati, “Bulaanu Omwaami aboola ati, ‘Aambi esiro akati, njia ohubita mu Misiri,

⁵ buli mwaana musyaani waamberi oli mu Misiri achia ohufwa, ohutulira elalira hu musyaani wa omutuki wa Misiri, ohoyere ohusihira obwaami bwae, ohwoolera elalira hu musyaani w'omuhasi muwaambe, osyeechaanga emere hu lukina. Ebyaamberi by'ebyaayo byoosi bicha ohufwa byosi.

⁶ Yicha ohubaao esihoolo sihoongo muno mu Misiri yoosi, esihira esyali hoo, oba esyo syoosi esichia ohubaao.

⁷ Nae kata embwa siyicha ohusamiraho Abaisiraeli oba ebisolo byaabwe. Mani ao niwo y'ochia ohumanyira oti ese, Omwaami, niise otaao engabuhana akati w'Abamisiri neende Abaisiraeli.’ ”

⁸ Musa yamaliirisa n'aboola ati, “Abahoongo bao boosi bachia ohwiichia baangwe mu makulu, haandi bachia ohundekweeda mbukule abaandu baange boosi mani male mbweo nabo. Ao niwo yiinja ohuweerao.” Mani neende etima liingi Musa yatula eyiri omutuki wa Misiri.

⁹ Omwaami yaboolera Musa ati, “omutuki wa Misiri wuno achia sa ohwemeeda naahayire ohuhuwulira, hu syesi nyale ohwemeeda ohuhola eby'amayia byaange mu Misiri.”

¹⁰ Musa neende Arooni bahola eby'amayia bino byoosi mu moni wa omutuki wa Misiri, nae Omwaami nae yamuhola yaabeechaanga sa omwaangalafu, naatakanyaho Abaisiraeli ohutula mu syaalo syae.