Ohutula 10 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Esike

¹ Haandi Omwaami yaboolera Musa ati, “Chia haandi obone omutuki oyo. Mbao malire omweene ohumuhola alala neende abahoongo bae ohuba abaangalafu, huunyale ohubaholamo eby'amayia bino

² haandi hu eng'we munyale ohubooleraangaho abaana beeng'we neende abeechuhulu beeng'we koti lu ndanyala ohusiruwasa Abamisiri nimbaholamo eby'amayia bino. Ao niwo yi mweesi muchia ohumanyira muti hane ese niise Omwaami.”

³ Musa neende Arooni, bachia eyiri omutuki wa Misiri mani baamuboolera bati, “Omwaami, Nasaae w'Abaibburania, aboola ati, ‘Oliindire ohwoola liina, hw'oloongoyale? Leha abaandu baange bechiire, baanyinamire.

⁴ Nikali mbwe ochia ohwemeeda sa ohuhaya, Njia ohuleeta esike mu syaalo syao muno muchuli.

⁵ Chichia ohuba enyiingi muno ohunyala ohubwiiha hu loba lyomu syaalo lino lyoosi. Chichia ohulya buli siindu si makina k'efula katanyaasa, kata neende emisaala kiadoong'a.

⁶ Chichia ohwiichula mu madooho kao alala neende mu nyuumba ch'abahoongo boosi, haandi neende ech'abaandu bao boosi. Chichia ohuba embi chihira esiindu syoosi si bakuuka yeeng'we boosi babonaho.’ ” Mani Musa niyamala atyo, yakaluuhana yeweerao.

⁷ Nae abahoongo ba omutuki wa Misiri nabo bulaanu baaboola bati, “Omusaacha wuno nae achia ohwoola yeena ohutuleeteraanga ebidinyu bino? Leha abaandu Abaisiraeli bano bechiire, banyale ohwiinamira Omwaami, Nasaae waabwe. Simubonaho koti lu Misiri sinyaasiihe?”

⁸ Musa neende Arooni bakaluswa eyiri omutuki wa Misiri, yababoolera ati, “Bulaanu munyala mwaachia mwenamira Omwaami, Nasaae weeng'we. Nae wiina mweene ochia ohuchia?”

⁹ Musa yamukobolamo ati, “Fweesi huchia ohuchia, alala neende abaana beefwe neende abakofu beene. Huchia ohuchia neende abaana basyaani beefwe haandi neende abaana bahaana beefwe, amakoondi keefwe, embusi cheefwe, haandi neende eng'oombe cheefwe, olwohuba huhoyere ohuhola esidyaalo ohwiisa oluyaali mu Omwaami weefwe oyo.”

¹⁰ Omutuki wa Misiri nae yaboola ati, “Ao ese bulaanu ndeechuba Omwaami endi, ese siinja hubaleha mubukule muchie neende abahasi beeng'we kata neende abaana beeng'we! Mbano bulaanu siri ohubonehana mbwe, hane muli ohutekeha ohwehalaka.

¹¹ Haba! Abasaacha boong'ene nibo abachia ohuchia, beenamire Omwaami oyo nikali mbwe esyo nisyo si mudaha.” Nae ohweema hu munwa okwo, beerusa Musa neende Arooni ohutula mu moni wa omutuki wa Misiri.

¹² Omwaami yaboolera Musa ati, “Ewe siingisira omuhono kwao hu syaalo sy'e Misiri ohuleeta esike. Chichia ohwiicha mani chirye buli siindu syoosi esimera mani syaahula, buli siindu syoosi esyawona amakina k'efula.”

¹³ Musa yasiingisa aakulu endabuhi yae, mani Omwaami yaaleeta omuyaka kw'ebukwe nikuwuucha oludaalo olwo olulaamba haandi neende mu siro esyo syoosi. Mani nibwahya, omuyaka okwo hane kwali nikumalire ohuleeta esike.

¹⁴ Cheecheraanga mu bidiiyiha mani nichimala nichiichula esyaalo syoosi. Chali eyiicho lihiramo obuhoongo ely'esike elyali nilyabonehanaho, haandi awuundi elihira koosi akachia ohubonehanaho haandi.

¹⁵ Chafuumaalira eloba lyoosi mani chaalimaliyirisa lyafwaana koti echeene echio; chaalya buli siindu si makina k'efula kali nikadoong'ia, alala neende ebyaamo byoosi ebyohu misaala. Sibulao esiindu syoosi-syoosi esifwaana majaani esyadoong'a hu musaala kwoosi, oba esimera syoosi-syoosi mu syaalo sy'e Misiri syoosi.

¹⁶ Omutuki wa Misiri oyo yabbibbiirihana yaalaanga Musa neende Arooni mani yaaboola ati, “Ese niise okoseere Omwaami, Nasaae weeng'we haandi neende eyiri eng'we mwesi.

¹⁷ Bulaanu eng'we muundehere esyonoono syaange sino syoong'ene mani mwekweede Omwaami Nasaae weeng'we yaanduseho esibonereso sibi sino.”

¹⁸ Musa yalehana neende omutuki wa Misiri, yaachia yekweeda Omwaami.

¹⁹ Omwaami yakaluuhania omuyaka kw'ebukwe okwo kweeholamo omuyaka kw'amaani muno okw'emuumbo, okwanyala ohudoola esike echio choosi mani kwaachikiinga kwaachiyira mu Muhono kw'enyaanja kwa Suesi. Yibulao esike kata ndala eyadoong'aho abuundu woosi mu Misiri.

²⁰ Nae haandi Omwaami yahola omwooyo kwa omutuki wa Misiri kwaangalala, mani yaahaya ohukanya Abaisiraeli bechiire.

Esiirima

²¹ Omwaami haandi yaboolera Musa ati, “Siingisa omuhono kwao okulingaase aakulu muukulu, mani esiirima sya titititi sichia ohubwiiha hu syaalo sy'e Misiri.”

²² Musa yasiingisa omuhono kwae yaakuliingaasa aakulu muukulu, mani esiirima nisidiira esyaalo sy'e Misiri syoosi endaalo chidatu enaamba.

²³ Abamisiri haba sibanyala ohubonanaanga daawe, mani abulao oyo yeesi owanyalaanga ohutula mu nyuumba esiha esyo syoosi. Nae Abaisiraeli nabo bali neende obulafu yi bali nibamenya yoosi.

²⁴ Omutuki wa Misiri haandi yalaanga Musa n'aboola ati, “Bulaanu munyala mwaacha mweenamira Omwaami oyo; kata neende abahasi beeng'we neende abaana beene banyala baachia naang'we. Nae amakoondi keeng'we, embusi, neende eng'oombe bicha ohudoong'a ano.”

²⁵ Musa yakobolamo ati, “Ewe niiwe ochia ohutuberesa ebisolo bi huchia ohwehoonyera koti ebiyaanwa bisaambwa ohuyaanira Omwaami, Nasaae weefwe.

²⁶ Haba, efwe huchia ohuchia neende ebisolo byeefwe abeene; sibulao kata silala esichia ohulehwa enyuma. Efwe abeene niifwe abahoyere ohwedooleramo ebisolo bi huhoyeere ohwiinamira nabyo Omwaami, Nasaae weefwe. Nae nihutoola ebweene eyo haba sihunyala ohumanya bisolo siina bi hunyala ohuyaanayo yaali.”

²⁷ Omwaami yahola omutuki wa Misiri yoomerana omwooyo, mani yaahaya ohubaleha bechiira.

²⁸ Yaaboolera sa Musa ati, “Mbweere-eyi! Otakeraho haandi ndaahubonaho mu moni waange! Hu ludaalo lu ndahahubonereho sa endi, nilwo lu ochia ohufwiira!”

²⁹ Musa nae yamukobolamo ati, “Oboolere obwadyeeri bweene. Ewe haba soocha ohuhubbiahooho emoni chao ehabi liindi.”