Ohuchaaka 9 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Endagaano ya Nasaae neende Nowa

¹ Nasaae yaberesa Nowa neende abaana bae ehabi n'aboola ati, “Mwiibulane mwiingiye, mube abaangi hu syaalo.

² Buli sisolo syoosi esiri hu syaalo neende buli yoni libburuha lyoosi, neende buli biindu byambaaka hu loba byoosi, neende buli ng'eeni yomu maachi yoosi bichia ohuhutiichanga; haandi niiwe ochia ohubitukaanga.

³ Bulaanu munyala ohubilya, alala neende ebimera byohu syaalo; mbabereese ebiindu byoosi bibecheenge ebyohulya byeeng'we.

⁴ Ohutusaho mutalichaanga enyama yirimo amabaanga.

⁵ Nae omuundu yeesi niyeeta omuundu, mubwadyeeri bweene achia ohusaandisibwaanga. Njia ohusaandya esisolo syoosi esiita omuundu.

⁶ Olwohuba abaandu baloongwa mu fwaani ya Nasaae, mani oyo yeesi owiita omuundu, yesi achia ohwiitwaangwa neende omuundu wuundi.

⁷ Nae eng'we, mwiibulane mwiingiye, abeechuhulu beeng'we bamenye mu syaalo syoosi.”

⁸ Nasaae yaboolera Nowa neende abaana bae ati,

⁹ “Bone, mbao holere endagaano naang'we, neende abeechuhulu beeng'we,

¹⁰ alala neende buli siloonge silamu esiri naang'we, amayoni koosi neende ebyaayo byoosi, neende buli siindu syoosi esyatula naang'we mu lyaato.

¹¹ Hola endagaano naang'we. Ndeechuba endi haba siinjia ohusihirisa haandi ebiindu bilamu byoosi neende amaachi ehabi liindi, haandi amaachi k'ofwomboole haba sikachia ohusihirisa esyaalo ehabi liindi.”

¹² Nasaae haandi yaboola ati, “Sino nisyo esilolero sy'endagaano yi hola naang'we, neende buli siloonge silamu syoosi.

¹³ Mbao ndaao oluyiingi lwaange mu maleesi, nilwo oluchia ohuba esilolero sy'endagaano akatikaati waange neende esyaalo.

¹⁴ Nindaleetaanga amaleesi hu syaalo mani oluyiingi lwabonehanaanga mu maleesi

¹⁵ njia ohwiichulisaanga endagaano yaange akatikaati waange naang'we, neende buli siloonge silamu siri hu syaalo. Haandi endi amaachi k'ofwomboole haba sikachia husihirisaanga ebiindu bilamu byoosi daawe.

¹⁶ Oluyiingi nilunabonehanaanga mu maleesi, njia ohulutingaalangaho mani njichuliseenge endagaano yitaakama akatikaati waange neende buli siloonge silamu syoosi esiri hu syaalo.”

¹⁷ Nasaae yaboolera Nowa ati, “Sino nisyo esilolero sy'endagaano yi ndeereo akatikaati waange neende buli siindu syoosi esiri hu syaalo.”

Nowa neende abaana bae

¹⁸ Abaana ba Nowa abatula mu lyaato nibo: Seemu, Haamu, neende Yafeesi. (Haamu niye laatang'ene Kanani.)

¹⁹ Abaana badatu ba Nowa bano nibo bakuukaang'ene baandu boosi abali hu syaalo huno.

²⁰ Nowa yali omulimi haandi niye omuundu wataangira ohutaaka emisabbiibbu.

²¹ Nae oludaalo luundi yaang'wa efiini yameera, yeeyalisa syeekenye mu yeema lyae.

²² Haamu laatang'ene Kanani niyabona laatang'ene naali syeekenye, yaboolera bamwaanang'ina babiri abali erwaanyi.

²³ Seemu neende Yafeesi babukula engubo baayita hu mabeka kaabwe, mani baakeenda nibakobolera emukoongo baachia babwiiha hu saabwe wali syeekenye. Bachia nibalanguule ebuleka bahaya ohubona saabwe naali syeekenye.

²⁴ Nowa niyeecha yaaba omwaaywe, yamanya esiindu si mwaana wae muyere yamuhola,

²⁵ mani yaboola ati, “Kanani abwaabirwe; achia ohuba omuwaambe wa bamwaanang'ina.”

²⁶ Haandi yaboola ati, “Lehe Omwaami Nasaae waange aberese Seemu ehabi haandi leha Kanani abe omuwaambe wae.

²⁷ Leha Nasaae yeengiye olwiibulo lwa Yafeesi, haandi leha amenyeenge mu mayeema ka Seemu; haandi leha Kanani abe omuwaambe wae.”

²⁸ Amaachi k'ofwomboole nikahama, Nowa yayiindira ohumala emyaaka emia chidatu neende amahumi kataanu (350)

²⁹ mani yaafwa naali neende emyaaka emia chitaanu-na-chine neende amahumi kataanu (950).