Ohuchaaka 44 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Esikoombe syakota

¹ Yosefu yalagira omubiihi w'enyuumba yae ati, “Yichusa ebyohulya mu sao ch'abasaacha abo, bi buli muundu anyala ohukiinga, mani ote eseende cha buli muundu mu sao yae.

² Ta esikoombe syaange sy'efeesa alala neende eseende ch'ebyohulya mu sao y'omwaana ohiramo obuyere.” Omubiihi mani n'ahola koti lu Yosefu yamuboolera.

³ Nibwahya buti, baseebula abasaacha abo bawaao neende esuhiri chaabwe.

⁴ Nae nibali bahakeendaho olukeendo ludiidi ohutula mu siko esyo, Yosefu yaboolera omubiihi wae ati, “Siingira, oloonde hu basaacha abo; nae noobanyoola, baboolere oti, ‘Lwasiina esilai musituungire neende esibi? Lwasiina mwiibire esikoombe syaange sy'efeesa?

⁵ Sino nisyo esikoombe si omwaami waange ang'weeraangamo, haandi alakuliramo. Esiindu simuholere sibi muno.’ ”

⁶ Omuhalaabani oyo niyaboolaho, yababoolera emboosi chino choosi.

⁷ Nabo bamuboolera bati, “Lwasiina omwaami weefwee alomaloma emboosi chifwaana chiti? Efwe abahalaabani bao sihunyala ohuhola esiindu sifwaana siti daawe!

⁸ Bone eseende chihwanyoola mu sao cheefwe, hwabakalusira ohutula mu syaalo sya Kanani; mani hunyala hutye ohwiiba efeesa oba esaabbu ohutula mu nyuumba?

⁹ Mani oyo yesi-yeesi hweefwe yibananyoole naali nabyo, leha bamwiite, haandi efwe fwesi huba huchia ohuba abawaambe b'omwaami.”

¹⁰ Yakobolamo ati, “Fukiriire, ohumalaho oyo yibananyoole naali nasyo yeeng'ene niye ochia ohuba omuwaambe waange, nae abadoong'ereo hweeng'we haba simuchia hubaaho omusaango.”

¹¹ Mani buli muundu nadwiihula bwaangu esao yae, naayita hu loba, haandi buli muundu niyeekulao esao yae.

¹² Omubiihi wa Yosefu yachaaka ohukoonya, naachaakira hu muhuluundu waabwe mani naamaliirisa neende oyo ohiramo obuyere. Esikoombe syanyoolwa mu sao ya Bbenjamini.

¹³ Engisa nyiingi yabadiira. Betaandulaanga sa engubo chaabwe, buli muundu nadwiiha esuhiri yae, mani nibakobolayo mu siko.

¹⁴ Yuda neende bamwanaang'ina niboola mu nyuumba ya Yosefu, banyoola Yosefu nasisiiriwo; mani baakwa aasi mu moni wae.

¹⁵ Yosefu yababoolera ati, “Siindu siina sino simuholere? Mubeere nimukoterwe muti omuundu waakiira ano koti ese siinyala ohulakula ndafuumbula?”

¹⁶ Yuda yaboola ati, “Nae efwe hunaaboolere siina omwaami waange? Hunaalomelome siina? Oba hunaayaale hutye? Nasaae afumbuule esibi sy'abawaambe bae; bonaho, hane mbao huli abawaambe b'omwaami waange, efwe alala neende oyo yeesi yibanyoolere neende esikoombe.”

¹⁷ Nae Yosefu yakobolamo ati, “Ese haba, siinyala huhola endyo daawe! Oyo yeeng'ene yibanyoolere neende esikoombe niye ochia ohuba omukulwa waange, nae abadoong'ereo eng'we, mukaluheyo emirembe, muchie eyiri laata yeeng'we.”

Yuda yekweeda balehe Bbenjamini

¹⁸ Yuda yaachia eyiri Yosefu mani yaamuboolera ati, “Ewe omwaami waange, hwekweeda, leha omuhalaabani wao alomalomeho naawe emboosi ndala yiti yoong'ene. Otanyoolerera omuhalaabani wao daawe, olwohuba ewe niiwe sa oloonderera hu mutuki wa Misiri mweene.

¹⁹ Omwaami waange, wateeba abahalaabani bao, noboola oti, ‘Muli neende laata yeeng'we, oba omwaana weeng'we wuundi?’

²⁰ Mani efwe hwaahuboolera sa ewe omwaami waange huti, ‘Huli neende laata yeefwe, bulaanu mukofu, neende mwaanama muyere, omwaana yi laata yeefwe yeebula mu myaaka kyae ky'obukofu, nae mwaanang'ina yafwa, niye yeeng'ene owadoong'ao mu nda ya ng'ina, mani laatang'ene amudaha muno.’

²¹ Waboolera abahalaabani bao bano oti, ‘Eng'we mumundeetere, muboneho sa.’

²² Mani hwaboolera ewe omwaami waange huti, ‘Omwaana haba s'anyala ohutula hu laatang'ene daawe, olwohuba naamutulaho, laatang'ene anyala ohufwa-bufwa.’

²³ Mani ewe noboolera abahalaabani bao oti, ‘Ohumalaho nimwiicha neende walaka weeng'we, haba simuchia ohuumbonaho haandi daawe.’

²⁴ Nae nihwakaluhao eyiri laata yaange omuhalaabani wao, hwamuboolera emboosi ch'omwaami waange.

²⁵ Nae laata yeefwe n'aboola ati, ‘Muchie haandi mutukulireho ebyohulya,’

²⁶ hwamuboolera huti, ‘Haba sihunyala ohuchia daawe. Nae laata yeefwe saanakanya humuboneho haandi daawe nihutachiire neende walaka yeefwe.’

²⁷ Mani laata yaange, omuhalaabani wao yatuboolera ati, ‘Mumanyire muti omuhasi waange yaanjibulira abaana basyaani babiri;

²⁸ mulala yaandulaho, mani ndaboola endi, mubwadyeeri bweene, esolo ndeende chamubosyoola-bosyoolamo; ohutula olwo sisiiri ohumubonaho daawe.

²⁹ Nae nimuyira wuno yesi mwamuundusaho, esidinyu syaamukwaho, ohwelalihirira hwahaanjoleho mu myaaka kyaange ky'obukofu, hunyala ohuunjita-bwiita.’

³⁰ Mani sakira nihukaluha eyiri laata yaange omuhalaabani wao, omwaana musyaani n'atali naafwe, ao, koti obulamu bwae buli alala neende obw'omwaana oyo,

³¹ achia ohubona ati, omwaana musyaani saali naafwe, achia ohufwa sa, mani omuhalaabani wao achia ohukera omuhalaabani wao mukofu, laata yeefwe yelalihire mani afwe.

³² Olwohuba ese omuhalaabani wao ndeeyama eyiri laata yaange endi, ese mweene njia ohuliinda omwaana musyaani oyo nimboola endi, ‘Nitamukobosa yooli, njia ohuba neende omusaango mu moni wa laata yaange obulamu bwaange bwoosi.’

³³ Mani sakira, husaba endi, leha ese omuhalaabani wao ndoong'e ano koti omuwaambe w'omwaami waange mu bweyaango bw'omwaana wuno; leha omwaana wuno akoboleyo neende bamwaanang'ina.

³⁴ Olwohuba, ndaakaluheyo endye eyiri laata yaange nitaali neende omwaana wuno? Haba siinyala huguma ndaabona esibi sichia ohukwa hu laata yaange.”