Ohuchaaka 4 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Kaini neende Abbeli

¹ Bulaanu Adamu yaba neende Efa omuhasi wae, omuhasi yanyoola amabaanga. Yeebula Kaini mani yaboola ati, “Njibuule omwaana musyaani hulw'amaani k'Omwaami.”

² Haandi yeebula omwaana wuundi yi yalaanga Abbeli. Bulaanu Abbeli yali omwaayi, nae Kaini yali omulimi.

³ Ebiha nibyabitao, Kaini yaleeta esiyaanwa esitula hu bilime byae eyiri Omwaami.

⁴ Abbeli yesi yaleeta esiyaanwa sy'ekoondi doto lyaamberi li yeeta yatusamo amasinya malai yaakayaanayo koti esiyaanwa sisaambe. Omwaami yasangaalira Abbeli neende esiyaanwa syae esyo,

⁵ nae Omwaami haba siyasangaalira Kaini neende esiyaanwa syae esyo daawe. Sino syanyoolesa muno Kaini.

⁶ Omwaami yateeba Kaini ati, “Lwasiina onyoleere? Lwasiina ohuluusire mu moni otyo?

⁷ Ooba nooholere esiindu silai, mba fukiriire esiyaanwa syao, nae olwohuba oholere esibi, esyonoono mbao siri hu mulyaango kwao. Esyonoono sidaha ohuhutuka, nae ewe ohoyere ohusiyiingira.”

⁸ Kaini yaboolera Abbeli mwaanang'ina ati, “Leha huchieho mu mukuunda.” Nae nibali mu mukuunda, Kaini yakwa hu Abbeli mwaanang'ina yamumika mani yamwiita.

⁹ Nae Omwaami yateeba Kaini ati, “Abbeli mwaanamao ali yeena?” Nae Kaini yakobolamo ati, “Siimanyire daawe; ese haba siniise omuliindi wa mwaanama.”

¹⁰ Nae Omwaami yamuteeba ati, “Siina syeene sino si oholere? Ekono ly'amabaanga ka mwaanamao liri ohuundirira nilitula mu loba, nilidaha ohwetuunga.

¹¹ Mani bulaanu obwaabirwe, haba si ochia ohwamyaanga ebirime ohutula mu loba daawe. Eloba lyeekotyombeere amabaanga ka mwaanamao kawidiise oti libeere nilikeetekeheere.

¹² Bulaanu noonalimaanga, haba sonanyolaanga ebyaamo bihoyera amaani kao daawe; ochia ohuba omuyikaani obula obwiihalo bwoosi hu syaalo huno.”

¹³ Kaini nae yaboolera Omwaami ati, “Esibonereso syaange sino nesihoongo muno, siihira amaani.

¹⁴ Bona, mbao wunjiruhaanie enyaanga yino ohuundusa mu loba lino; mani njia ohuhweekisaanga ohaye ohumbonaangaho daawe; haandi njia ohuba omuyiikaani obula obwiihalo bwoosi hu syaalo huno, oyo yeesi owunjakaana, achia ohunjiita bwiita.”

¹⁵ Omwaami yakobolamo ati, “Haba daawe! Nae omuundu yeesi nahwiita, mba njia ohumwetuunga amahabi kataanu-na-kabiri.” Mani Omwaami naata esilolero hu Kaini, hu muundu yeesi omubukaana ahaye ohumwiita.

¹⁶ Mani yawaao naatula mu moni w'Omwaami n'amenya mu syaalo sya Nodi esyali ebukwe wa Edeni.

Abeechuhulu ba Kaini

¹⁷ Kaini yaba neende omuhasi wae, mani yaanyoola amabaanga yeebula Enoka. Kaini yoombaha esiko, yasilaanga eliita ly'omwaana wae Enoka.

¹⁸ Enoka yeebula Yiradi; Yiradi yeebula Mehujaeli, Mehujaeli yeebula Metusaeli, Metusaeli yeebula Lameki.

¹⁹ Nae Lameki yadeehya abahasi babiri; mulala olaangwa Ada, nae owuundi olaangwa Siila.

²⁰ Ada yeebula Jabbali; Jabbali niye otulaho abaandu abamenya mu bikaali haandi abali neende ebyaayo.

²¹ Mwaanang'ina Jabbali yali alaangwa Jubbali; wuno niye otulaho aboobbi b'amalere neende enjika.

²² Omuhasi wa Lameki olaangwa Siila yeebula Tubbalikaini; wuno niye owali omwiitaanyi w'ebyuuma by'emigasa neende echuma. Mboochoong'ene Tubbalikaini yali alaangwa Naama.

²³ Lameki yaboolera abahasi bae ati, “Ada neende Siila, muwulire bi mboola; eng'we abahasi ba Lameki, mutekeerese bi mboola: Njitire omusyaani muraaga, olwohuba yaahuya.

²⁴ Nikali mbwe Kaini yetuungwa amahabi kataanu-na-kabiri, Lameki nae aba achia ohwetuungwa amahabi amahumi kataanu-na-kabiri-na-kataanu-na-kabiri omuundu yeesi n'anjita.”

Seeti neende Enosi

²⁵ Adamu haandi yaba neende omuhasi wae yanyoola amabaanga yeebula omwaana wuundi. Omuhasi wa Adamu yaboola ati, “Nasaae mbano yaambereese omwaana wuundi ohukobola mu makulu ka Abbeli, olwohuba Kaini yamwiita.” Mani yaamulaanga, Seeti

²⁶ Seeti yeebula omwaana musyaani mani yaamulaanga, Enosi. Esiha sino nisyo si baandu bachaaka ohwehoonyera eliita ly'Omwaami nibalaama.