Ohuchaaka 30 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Nae Rakeeli yali n'atebuliraho Yakobbo omwaana yeesi, mani n'abonera mwaanang'ina ehali-hali; yaboolera Yakobbo ati, “Leha nyooleho abaana naawe, ataali ao ese njia ohufwa-bufwa!”

² Yakobbo yadiirira Rakeeli etima mani yaboola ati, “Ese haba siindi Nasaae, owahwaakamia ohwiibula daawe.”

³ Rakeeli nae yaboola ati, “Omuwaambe waange Bbiliha nguno ali ano, ba nae ayere enda mani niyoola ohwiibula yeebulire hu mataango kaange, syesi nyale ohunyoolaho abaana ohumubitiramo.”

⁴ Rakeeli yaberesa Bbiliha omuhalaabani wae yaaba koti omuhasi wa Yakobbo; mani Yakobbo yaaba nae.

⁵ Mani Bbiliha yanyoola amabaanga yeebulira Yakobbo omwaana musyaani.

⁶ Rakeeli yaboola ati, “Nasaae nguyo akwiire hu lwaande lwaange, mani yawulira amaliro kaange syesi, yaamberesaho omwaana musyaani;” sakira yamukuliha ati “Daani.”

⁷ Bbiliha haandi yanyoola amabaanga kaandi mani yebulira Yakobbo omwaana wohubiri.

⁸ Rakeeli yaboola ati, “Nwaanire neende mwaanama ohulwaana hw'amaani, mani ndaamuyiingira;” Rakeeli n'alaanga omwaana oyo ati “Nafutaali.”

⁹ Leya niyabona ati yeemere ohwiibula, yabukula omuhalaabani wae Silipa mani naamuberesa Yakobbo yaaba koti omuhasi wae.

¹⁰ Silipa omuhalaabani wa Leya mani yeebulira Yakobbo omwaana musyaani.

¹¹ Mani Leya yaboola ati, “Ehabi ndai!” Mani yaakuliha omwaana oyo ati, “Gaadi.”

¹² Silipa omuwaambe wa Leya haandi yeebulira Yakobbo omwaana wohubiri.

¹³ Mani Leya yaboola ati, “Nga sangaalire! Olwohuba abahasi bachia ohunaanganga omusangaafu;” mani yaakuliha omwaana oyo ati, “Aseri.”

¹⁴ Mu ndaalo ch'ohukesa engaano, Rubbeeni yaachia mu ndalo mani yanyoolamo ebyaamo bilaangwa “amanduraki” yaabileteera Leya ng'ina. Rakeeli yaboolera Leya ati, “Husaba, mbereseho hu ‘amaanduraki’ k'omwaana wao.”

¹⁵ Leya yamukobolamo ati, “Ohunyuula omusaacha waange haba sihuhumala? Odaha ohuyira neende ‘amanduraki’ k'omwaana waange kosi?” Rakeeli yaboola ati, “N'omberesa amanduraki k'omwaana wao, onyala ohukona neende Yakobbo esiro sino.”

¹⁶ Mani engoloobe, Yakobbo niyakobola ohutula mu ndalo, Leya yachia ohumubukaanira mani yaamuboolera ati, “Oli neende ohweyalisa naange esiro sino, olwohuba hukulire neende ‘amanduraki’ k'omwaana waange.” Yakobbo yaba nae esiro esyo.

¹⁷ Nasaae yawulira ohulira hwa Leya, mani yanyoola amabaanga, niyeebulira Yakobbo omwaana wohutaanu.

¹⁸ Leya yaboola ati, “Nasaae yambereese omusaara kwaange, olwohuba ndaberesa omusaacha waange omuwaambe waange”; mani n'akulihaa omwaana oyo ati, “Yisakari.”

¹⁹ Leya haandi yanyoola amabaanga, mani yeebulira “Yakobbo” omwaana wohusaasaba.

²⁰ Mani Leya yaboola ati, “Nasaae mbao yambereese esiyaanwa sy'obweeya; haandi omusaacha waange ohunjisamo oluyaali, olwohuba mwiibuliire abaana basyaani basaasaba;” mani yaamukuliha ati “Sabbulooni.”

²¹ Ebyo nibyawa, Leya haandi yeebula omwaana muhaana mani yaamukuliha ati, “Dina.”

²² Nasaae mani niyechulisa Rakeeli, haandi yawulira ohwekongooya hwae mani yaamuba olwiibulo.

²³ Rakeeli yanyoola amabaanga mani yeebula omwaana musyaani, yaboola ati, “Nasaae mbao yaandusireho amanyeko;”

²⁴ mani yaakuliha omwaana oyo ati, Yosefu, n'aboola ati, “Leha Omwaami yameede omwaana wuundi!”

Yakobbo yoosana neende Labbani

²⁵ Bulaanu Rakeeli n'amalire ohwiibula Yosefu, Yakobbo yaboolera Labbani ati, “Seebule mbweo, ngobole weefwe haandi mu syaalo syeefwe.

²⁶ Mberese abahasi baange neende abaana baange boosi bandahuhalaabanira, mani wuundehe mbweo; olwohuba omanyire koti lu ndahuhalaabanira bulai.”

²⁷ Nae Labbani yamuboolera ati, “N'ofukiirira, leha mboole endyo, mbwihuliirwe mani ndaamanya endi Omwaami yamberesa ehabi ohubitira mweewe;

²⁸ mboolere omusaara kwao, njia ohukuhuberesa.”

²⁹ Yakobbo yamuboolera ati, “Ewe omweene omanyire koti lu huhalaabanire, haandi koti ebyaayo byao lu bibeere nimbeere nihuhalaabanira.

³⁰ Olwohuba wali neende ebyaayo bidiidi nisisiiri ohwiicha, nae buti byemeedere muno; haandi Omwaami ahuumberesereenge ehabi buli yi ndachichaanga. Nae bulaanu ndahanyoole liina emyaandu kyaange kyeene syesi?”

³¹ Labbani yamuteeba ati, “Huberese siina syeene?” Yakobbo yakobolamo ati, “Sibulao esiindi si ndaha wuumberese; olwohuba niwuumberesa esiindu syoosi, mba haandi njia ohwemeeda sa ohuhuhalaabanira ni njaya ebyaayo byao:

³² Leha enyaanga yino mbite mu byaayo byao, mani njawulemo buli koondi ly'amakoondo neende buli mwaana kw'ekoondi kwa rateeng'i, neende buli mbusi y'amakoondo, mani bino nibyo ebiba bichia ohuba omusaara kwaange.

³³ Mani ochia ohumanya obwadyeeri bwaange, ni huchaaka ohubaliirira naawe omusaara kwaange. N'onyoola buli mbusi yitaalimo amakoondo, kata sa amakoondi kataali akadichooli, ochia ohubiyira koti ebiibe.”

³⁴ Labbani yakobolamo ati, “Eee! Leha sibe koti lu wahaboola.”

³⁵ Nae hu ludaalo olwo, Labbani yaawulamo ehole choosi echalimo amakoondo, neende edwaasi choosi echalimo amakoondo, echo choosi echalimo obwa dibbo, neende buli koondi yere elya dichooli, mani yaaberesa abaana bae basyaani ohwaaya.

³⁶ Mani nibakabuhana ohumala embaka y'endaalo chidatu; Yakobbo yadoong'a n'aliinda ebyaayo bya Labbani.

³⁷ Yakobbo mani niyaakula amasaga mabisi k'emisaala mipopula, alimoondi neende emipulaane, mani niyoobulaho amoola kaandi yaleha nikaliho emihoosi kya rachaari.

³⁸ Yafumita esaala ch'emihoosi-hoosi kya rachaari echomu moni w'ebyaayo yi bing'weera. Nae koti lu byaayo byawoochanaanga nibiicha ohung'wa,

³⁹ byawoochana mu moni w'obusaala obwo, byeebula ebyaayo byamakondo-koondo.

⁴⁰ Yakobbo yaakabulamo amakoondi madoto, mani yayira akalimo amakoondo, nae akadichooli yaakaberesa Labbani; haba siyasasaania akae alala neende aka Labbani daawe.

⁴¹ Buli bisolo by'amaani muno ni byawoochanaanga, Yakobbo yachomehaanga esaala ch'obuhoosi-hoosi echo aambi neende abuundu w'ohung'weera, hu ebisolo biwoochanire ao.

⁴² Nae ebisolo bibulamo amaani nibyawoochanaanga, Yakobbo haba siyachomehaanga esaala, mani esolo engata choosi cheecha chaaba echa Labbani, nae ech'amaani choosi chaaba echa Yakobbo.

⁴³ Yakobbo yaba omuyiinda muno, mani yaaba neende ebyaayo biingi, neende abawaambe bahasi baangi neende abawaambe basaacha baangi, alala neende engamia nyiingi neende esuhiri nyiingi.