Ohuchaaka 25 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Abeechuhulu ba Abburahamu baandi

¹ Bulaanu Abburahamu yeemao yadeehya omuhasi wuundi olaangwa Ketura.

² Wuno yamwiibulira Simurani, Yokosani, Medani, Midia, Yisibbaku neende Suwa.

³ Yokosani yeebula Seebba neende Dedani. Abaana ba Dedani nibo bano: Asuriimu, Letusiimu, neende Leumiimu.

⁴ Abaana ba Midia nibo bano: Efa, Eferi, Hanoki, Abbida, neende Elida. Bano boosi bali abeechuhulu ba Ketura.

⁵ Abburahamu yalehera Yisaka ebiindu byae byoosi.

⁶ Nae Abburahamu n'asisiiri omulamu, yaberesa ebiyaanwa abaana b'abahasi b'erwaanyi bamwiibulira. Yabatuma bachiire mu syaalo sy'ebukwe, batule eyiri omwaana wae Yisaka.

Ohufwa neende ohusiihwa hwa Abburahamu

⁷ Abburahamu yayiindira ohumala emyaaka emia ndala neende amahumi kataanu-na-kabiri neende kitaanu (175).

⁸ Abburahamu yayiindira mani yaafwa n'akofuule muno. Mani nibamusiiha alala neende bakuukaang'ene.

⁹ Abaana bae, Yisaka neende Yisimaeli bamusiiha mu ng'uungu ya Makipela ebukwe wa Mamure, mu mukuunda kwa Efirooni omwaana wa Sohari Omuhiiti.

¹⁰ Kuno nikwo omukuunda ku Abburahamu yakula hu Bahiiti. Ao niwo yi basiiha Abburahamu alala neende Saara omuhasi wae.

¹¹ Abburahamu n'amalire ohufwa, Nasaae yaberesa omwaana wae Yisaka ehabi. Yisaka yali yamenya aambi neende Bberilahairoi.

Abeechuhulu ba Yisimaeli

¹² Yisimaeli yi Abburahamu yeebula mu Hagari, omuhasi Mumisiri omuhalaabani wa Saara,

¹³ yaba neende abaana bano, ohutekehwa koti lu baloondana mu hwiibulwa: Nebbayooti, Kedari, Adibbeeli, Mibbisamu,

¹⁴ Misima, Duma, Masa,

¹⁵ Hadadi, Tema, Yetura, Nafisi, neende Kedema.

¹⁶ Bano nibo bakuukaang'ene enono ehumi neende chibiri, mani ameeta kaabwe kakulihwa ebyaalo byaabwe neende ebituundu by'ohwoombahamo amayeema kaabwe.

¹⁷ Yisimaeli yafwa naali neende emyaaka emia ndala neende amahumi kadatu neende kitaanu-na-kibiri (137). Mani nibamusiiha alala neende bakuukaang'ene.

¹⁸ Abeechuhulu ba Yisimaeli bamenya mu bituundu biri akatikaati wa Hafila neende Suuri, esyali ebukwe wa Misiri nochiira hu lwaande lwa Asiria. Haba sibamenyaho alala neende abeechuhulu ba Abburahamu baandi daawe.

Ohwiibulwa hwa Esau neende Yakobbo

¹⁹ Bano nibo abeechuhulu ba Yisaka, omwaana wa Abburahamu. Abburahamu niye laatang'ene Yisaka.

²⁰ Yisaka yali neende emyaaka amahumi kane n'adeehya omuhasi wae Rebbeka, omwaana wa Bbesweeri Omuaramea ohutula Padani-Aramu. Rebbeka yali mboochoong'ene Labbani.

²¹ Rebbeka, omuhasi wa Yisaka yali omukuumba. Yisaka mani naamusabira eyiri Omwaami. Omwaami n'awulira esaala ya Yisaka, mani Rebbeka yanyoola amabaanga.

²² Enda yali ey'amahwaana, mani nibali nibasisiiri ohwiibulwa, bachaaka ohulwaanakana nibasisiiri mu nda. Rebbeka yaboola ati, “Bino nibinachiiririra biti, mani ese ndabeeo omulamu endye?” Mani naachia ohweteebaho eyiri Omwaami.

²³ Omwaami yamuboolera ati, “Ebyaalo bibiri biri mu nda yao. Ochia ohwiibula ebyaalo bibiri ebikabuhaane. Mulala achia ohuba ow'amaani ohuhiraho owaasye, omuhuluundu achia ohuhalaabaniraanga omuyere.”

²⁴ Endaalo cha Rebbeka ech'ohwiibula nichoola, bone, yoobbao amahwaana.

²⁵ Omwaana otaangira yatula niyaahaanye, omubiri nikweechulaho obwooya. Mani nibamukuliha Esau.

²⁶ Ebiha bidiidi nibyabitao, omwaana wohubiri yesi yatula, omuhono kwae nikudiirire hu sisisiro sya Esau. Mani nibamukuliha Yakobbo. Rebbeka yeebula abaana bano Yisaka naali neende emyaaka amahumi kasaasaba.

Esau akusa ehabi yae koti omwaana waamberi

²⁷ Abaana bano nibahula, Esau yali omuyiimi muchweenufu muno, haandi omwaana waheera muno obulamu bw'erwaanyi. Nae Yakobbo yali omwaana muwuleerefu muno, owamenyaanga sa mu ngo.

²⁸ Yisaka yali yaheera muno Esau, olwohuba yalichaanga hu nyama ch'ebisolo biyetaanga; nae Rebbeka yali niyaheera muno Yakobbo.

²⁹ Olwoola, Yakobbo niyali nadeehaanga ebyohulya, Esau yakobola naatula ohuyiima, enjala niyimuluma muno.

³⁰ Mani Esau yaboolera Yakobbo ati, “Enjala yiinjita-bwiita, leha ng'weho sa omuunyu ku oli ohudeeha okwo!”

³¹ Yakobbo nae yamukobolamo ati, “Taangira wuumberese eby'obusiha byao koti omwaana waamberi, hu male huberese.”

³² Nae Esau yaboola ati, “Ese ngaandi mbano ndi aambi ohufwa-bufwa. Obusiha bw'omwaana waamberi bwaange buno buchia ohuuhoonya butye nifwiire?”

³³ Yakobbo haandi yaboola ati, “Taangira mani wuundeechubire.” Mani Esau yamweechubira, n'akusa Yakobbo obusiha bw'omwaana waamberi bwae.

³⁴ Mani Yakobbo yaaberesa Esau omugaati neende omuunyu kw'eng'ooli ch'olaayo bidiidi biti byoong'ene. Esau yalya haandi yaang'wa mani yaasiingira yeweerao. Olwo nilwo lu Esau yafwiirwa eby'obusiha byae koti omwaana waamberi.