Ohuchaaka 2 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Ao mani ekulu neende esyaalo nibimala ohuloongwa, neende ebiindu byoosi ebibirimo.

² Hu ludaalo lwa hataanu-na-habiri, Nasaae yamala omulimo kwae ku yali naaholere, mani n'awuluuha hu ludaalo lwa hataanu-na-habiri n'amalire omulimo kwae.

³ Nasaae yaberesa oludaalo lwa hataanu-na-habiri ehabi mani yaaluhusa, olwohuba oludaalo olwo, nilwo lu Nasaae yawuluuhiraho n'amalire omulimo kwae ku yali naaholere okw'ohuloonga.

⁴ Yino mani niyo engeri yii kulu neende esyaalo byaloongerwamo. Omwaami Nasaae niyaloonga ekulu neende esyaalo,

Endalo y'Edeni

⁵ emisaala kyoosi nikibula hu syaalo, haandi olumwo lwoosi nilusisiiri ohumera, olwohuba Nasaae yali n'asisiiri ohukwiisa efula hu syaalo, haandi naabulao omuundu olima eloba.

⁶ Nae amaachi kasoohaanga ohutula aasi mu loba nikanyisa esyaalo syoosi.

⁷ Ao Omwaami Nasaae yabukula olufu ohutula hu loba, naloongamo omuundu, naamuyeereramo omuuya kwobulamu mu moolu, mani omuundu n'achaaka ohuba omulamu.

⁸ Ao Omwaami Nasaae yahola endalo mu Edeni, eyali ebukwe; mani yaayitaamo omuundu yi yali naloongere.

⁹ Nasaae naakera emisaala kya buli ngeri nikimera mu ndalo eyo. Buli musaala kwali nikubonehana bilai, haandi kwali omulai kw'ohulya. Nae omusaala kwobulamu kwosi kwali nikuli akatikaati w'endalo eyo, neende omusaala kw'ohumanya esilai neende esibi.

¹⁰ Omwaalo kwaliwo okwahulukusaanga nikutula mu Edeni nikuchuhiirisa endalo eyo, kwakabuhanamo mani nikweehola emyaalo kine.

¹¹ Eliita ly'omwaalo kutaangira nilyo Pisoni; kuno nikwo omwaalo okuhulukusa nikwebodoohania esyaalo sya Hafila, esirimo efeesa;

¹² (efeesa eyomu syaalo omwo ndai niyo; haandi amafuta k'esing'aari neende amakina k'engaanga koosi kali mu syaalo omwo.)

¹³ Eliita ly'omwaalo kwohubiri nilyo Gihoni; kuno nikwo okuhulukusa nikwebodoohania esyaalo sya Kuusi syoosi.

¹⁴ Eliita ly'omwaalo kwohudatu nilyo Tigiriisi, kuno nikwo okuhulukusa nikuchia ebukwe wa Asiria. Nae omwaalo kwohune nikwo Ewufuraate.

¹⁵ Ao Omwaami Nasaae yabukula omuundu yi yaloonga mani yaamuta mu ndalo y'Edeni ohuyirimaanga neende ohuyiliindanga.

¹⁶ Nasaae yalagira omuundu n'aboola ati, “Oli omulehuule ohulya hu buli musaala okuli mu ndalo yino;

¹⁷ nae hu musaala kwohumanya esilai neende esibi haba sokulichaangaho, olwohuba hu ludaalo luwahakuliireho sa oti, ochia ohufwa.”

¹⁸ Ao Omwaami Nasaae yaboola ati, “Haba sisilai omuundu ohubechaanga yeeng'ene daawe; Njia ohumuholera omuhoonyi omuhoyera.”

¹⁹ Mani Nasaae yabukula eloba naaholamo buli sisolo esiri hu syaalo neende buli yoni elibburuha, mani n'abileeta eyiri omuundu abone koti lwaanabilaange. Buli liita li muundu yakulihaanga buli siindu, nilyo li basilaangaanga.

²⁰ Mani omuundu naakuliha buli syaayo eliita, neende buli mayoni kabburuha, haandi neende buli sisolo syomu siino. Nae omuundu chana nae haba siyaliho neende owaasye omuhoyera yeesi daawe.

²¹ Ao mani Omwaami Nasaae yaakera omusaacha yaakona endoolo ch'amaani, mani omusaacha niyali naakonere, Nasaae yamutusamo olubafu lulala yabwiihao neende enyama.

²² Nae olubafu lu Nasaae yali n'atusire mu musaacha, yaluholamo omuhasi yaamuleeta eyiri omusaacha.

²³ Mani omusaacha yaboola ati, “Wuno bulaanu niye ekuumba ohutula hu makuumba kaange haandi enyama ohutula hu nyama yaange; achia ohulaangwaanga ‘Omuhasi,’ olwohuba yatuswa mu ‘musaacha’.”

²⁴ Sino nisyo esikera omusaacha yalehaanga laatang'ene neende ng'ina mani yeyambania neende omuhasi wae, nibaba silala.

²⁵ Omusaacha neende omuhasi bali nibali syeekenye, nae esoni haba sichabadiiraangaho daawe.