Ohuchaaka 10 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Abeechuhulu b'abaana ba Nowa

¹ Bano nibo abeechuhulu b'abaana ba Nowa, Seemu, Haamu, neende Yafeesi. Abaana ba Nowa bano, beebula abaana amaachi k'ofwomboole nikaweere.

² Abaana ba Yafeesi nibo: Gomeri, Magoogi, Madai, Yafani, Tubbali, Meseki, neende Tirasi. Bano nibo bakuukaang'ene baandu balaangirwa hu meeta kano.

³ Abeechuhulu ba Gomeri nibo, Asikanaasi, Rifati, neende Togariima.

⁴ Abeechuhulu ba Yafani nibo, Elisa, Tarisiisi, Kitimu, neende Dodanimu.

⁵ Abo nibo bakuukaang'ene baandu bamenya hu ndulo w'enyaanja neende hu bisiinga. Bano nibo abeechuhulu ba Yafesi, abamenya mu nja chikabuhaane neende mu byaalo bikabuhaane. Buli baandu balomaloma olulimi lwaabwe.

⁶ Bano nibo abaana ba Haamu: Kuusi, Misiri, Libbya, neende Kanani. Bano nibo bakuukaang'ene baandu balaangirwa hu meeta kano.

⁷ Abeechuhulu ba Kuusi nibo abaandu ba Seebba, Hafila, Sabbuta, Raama, neende Sabbiteka. Abeechuhulu ba Raama nibo abaandu ba Sebba neende Dedani.

⁸ Kuusi niye laatang'ene Nimuroodi; oyo niye owataangira ohuba omuundu muhunuufu w'amaani hu syaalo.

⁹ Yali omuyiimi w'amaani muno hulw'obunyala bw'Omwaami; sakira siboolwa siti, “Leha Omwaami ahuhole obe omuyiimi muhunuufu koti Nimuroodi.”

¹⁰ Muhuchaaka, obwaami bwae bwali mu Bbabbilooni, Ereki, neende Akadi, bino byoosi byali mu syaalo sya Sinari.

¹¹ Niyatula mu Sinari, yachia mu Asiria, mani niyoombaha ebiko bya Ninefe neende Rehobboti-Yiiri, Kala, neende

¹² Reseni esiri akatikaati wa Ninefe neende esiko sihoongo muno sya Kala.

¹³ Abeechuhulu ba Misiri nibo abaandu ba Lidya, Anamu, Lehabbu, Nafitu,

¹⁴ Patirusimu, Kasiluuhi neende aba Kireeti (omwatulamo Abafilisiti).

¹⁵ Kanani niye owali laatang'ene Sidoni omwaana wae waamberi, neende Heti. Bano nibo bakuukaang'ene baandu balaangwa ameeta kano.

¹⁶ Kanani yesi niye kukaang'ene Abayebbusi, Abaamoori, neende Abagiriguuti,

¹⁷ Abahiifi, Abariiki, Abasiini,

¹⁸ Abarifaadi, Abasemari, neende Abahamati. Endaalo nyiingi nichabitao, amadaala k'Abakanani kawuuya kaasalaanira mu byaalo by'erwaanyi.

¹⁹ Mani obwaami bw'Abakanani bwaabaambaliya ohutula Sidoni, esiri olwaande lwa Gerari, ohwoolera elalira Gasa, neende hu lwaande lwa Sodomu, Gomora, Adima, neende Sebboyimu, ohwoolera elalira hu Lasa.

²⁰ Bano nibo abeechuhulu ba Haamu, abamenya mu nono chaabwe chikabuhaane, neende mu byaalo bikabuhaane. Buli baandu balomalomaanga olulimi lwaabwe boong'ene.

²¹ Seemu mwaanang'ina Yafeesi muhuluundu, niye kukaang'ene Abaibburania boosi.

²² Bano nibo abaana ba Seemu: Elamu, Asuri, Aripakusaadi, Ludi, neende Aramu. Bano nibo bakuukaang'ene baandu balaangwa ameeta kano.

²³ Abeechuhulu ba Aramu nibo: Wusi, Huli, Geteri neende Meseki.

²⁴ Aripakusaadi niye laatang'ene Sela; nae Sela niye laatang'ene Ebberi.

²⁵ Ebberi yeebula abaana basyaani babiri. Mulala yakulihwa Pelegi, olwohuba esyaalo syakabulwamo mu ndaalo chae. Omwaana wuundi yakulihwa Yokitaani.

²⁶ Yokitaani niye laatang'ene Alimodadi, Selefi, Hasarimafeeti, Yeera,

²⁷ Hadoramu, Wusali, Dikila,

²⁸ Obbali, Abbimaeli, Seebba,

²⁹ Ofiri, Hafila, neende Yobbabbu; bano boosi bali abaana ba Yokitaani.

³⁰ Obwaami bu bali bamenyamo bwali bwabaambaliya ohutula Mesa esiri olwaande lwa Sefari ohwoola mu syaalo sy'engulu esyali ebukwe.

³¹ Bano nibo abeechuhulu ba Seemu: Abamenya mu nono chaabwe chikabuhaane neende mu byaalo bikabuhaane. Buli baandu nibalomaloma olulimi lwaabwe.

³² Abaandu bano boosi beechuhulu ba Nowa, ohuloondakana neende enjibulo chaabwe, mu byaalo byaabwe. Amaachi k'ofwomboole nikaweere, abaandu bohu syaalo boosi batula mu baana ba Nowa bano.