Ohubwiihulirwa 7 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Abaandu elifu emia ndala neende amahumi kane neende chine (144,000) ba Yisiraeli

¹ Luunyuma lwa bino, ndeecha haandi ndaabona bamalaika bane nibeemere hu nyaande chine ch'esyaalo sino, nibeekaliire emiyaka kine, hu awuleo omuyaka kwoosi okunyala ohuwuucha hu syaalo, oba hu nyaanja, oba ohususuuchaho omusaala kwoosi.

² Haandi ndaabona malaika wuundi n'atulira ebukwe n'akiingire omuhuuri kwa Nasaae mulamu. Malaika oyo yemao yalaanga mu kono hoongo bamalaika bane bala, ba Nasaae yali n'amalire ohuberesa obunyala ohusihirisa esyaalo neende enyaanja.

³ Malaika wuno yemao yaboola ati, “Mutanyaalaho esyaalo, enyaanja, oba emisaala, ohwoola lu huba nihumalire ohuta ahalolero hu bweeni bw'abahalaabani ba Nasaae weefwe, neende omuhuuri kwa Nasaae.”

⁴ Mani ndeecha ndaboolerwa mbwe, obuungi bw'abaandu bateebwaho ahalolero neende omuhuuri kwa Nasaae hu bweeni bwaabwe, bali Elifu emia ndala neende amahumi kane neende chine (144,000.) Bali abaandu batula mu nono ehumi-na-chibiri cha Yisiraeli,

⁵ abaandu elifu ehumi neende chibiri (12,000) bali batula mu nono ya Yuda, abaandu elifu ehumi neende chibiri (12,000), mu nono ya Rubbeeni, abaandu elifu ehumi neende chibiri (12,000), mu nono ya Gaadi,

⁶ abaandu elifu ehumi neende chibiri (12,000), mu nono ya Aseri, abaandu elifu ehumi neende chibiri (12,000), mu nono ya Nafutaali, abaandu elifu ehumi neende chibiri (12,000), mu nono ya Manaase,

⁷ abaandu elifu ehumi neende chibiri (12,000), mu nono ya Simeoni, abaandu elifu ehumi neende chibiri (12,000), mu nono ya Leefi, abaandu elifu ehumi neende chibiri (12,000), mu nono ya Yisakari,

⁸ abaandu elifu ehumi neende chibiri (12,000), mu nono ya Sebbulooni, abaandu elifu ehumi neende chibiri (12,000), mu nono ya Yosefu, abaandu elifu ehumi neende chibiri (12,000), mu nono ya Bbenjamini.

Esidiiyiha sihoongo muno

⁹ Luunyuma lwa bino byoosi, mani yeecha yabaawo okudiiyiha kubitiirifu n'abulao omuundu yeesi onyala ohubala abaandu abo boosi daawe! Bali abaandu batula mu buli bwiibulanwa, nono, syaalo, neende lulimi, mani beecha beema mu moni w'esisaala sy'obutuki neende ow'Ekoondi doto, nibefwaalire amaganjuula ka rachaari, haandi nibadiirire amahiindu mu mahono kaabwe.

¹⁰ Behuuma mu kono hoongo nibaboola bati, “Obuwonia butula eyiri Nasaae, owihaale hu sisaala sy'obutuki, haandi neende hu Koondi doto!”

¹¹ Bamalaika boosi beecha beema beebodoohania esisaala sy'obutuki, kata neende abahuluundu boosi, haandi neende ebiloonge bilamu bine bira. Mani beecha boosi alala baakwiira obweeni aasi, mu moni w'esisaala sy'obutuki beenamira Nasaae,

¹² nibaboola bati, “Amiina, Ohufumia, oluyaali, amakesi, ohweebasa, esitiibwa, obunyala neende obuhunuufu, byoosi bya Nasaae weefwe, endaalo choosi! Amiina!”

¹³ Mulala hu baandu bahuluundu yeecha yandeeba ati, “Bano baandu siina nibo abefwaalire amaganjuula ka rachaari, haandi batula yeena bweene?”

¹⁴ Naange ndeecha ndamukobolamo endi, “Omuhuluundu, ese haba siimanyire daawe. Ngandi niiwe omanyire.” Nae yamboolera ati, “Bano nibo abaandu banyala ohubita bulai bweene mu husaandisibwa. Boosa amaganjuula kaabwe, mani baakahola kaaba rachaari nibehoonyera amabaanga k'Ekoondi doto.

¹⁵ Esyo nisyo esikera nibanyala ohwiicha beema mu moni w'esisaala sy'obutuki sya Nasaae, ohumuhalaabanira esideete neende esiro, mu nyuumba yae. Mani oyo owihaale hu sisaala sy'obutuki, niye ochia ohubechaanga nabo naabaliinda.

¹⁶ Haba siririwo ehabi liindi daawe, libacha haandi ohulumwaho enjala, kata neende obuluwo. Kata sa elyuuba, oba obubafu bwoosi busaamba, haba sibicha hunyala ohubasaambaho daawe,

¹⁷ olwohuba Ekoondi doto, oli akatikaati w'esisaala sy'obutuki, niye ochia ohuba omwaayi waabwe, mani achia ohubayiriraanga eyiri esulo ch'amaachi kaleeta obulamu. Haandi Nasaae mweene niye ochia ohubeeyaho amasika koosi, hu moni chaabwe.”