Ohubwiihulirwa 5 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Olupapula lusiriingise neende ekoondi doto

¹ Ese ndabona esitabo sisiriingise mu muhono muluungi kw'oyo owihaale hu sisaala sy'obutuki. Olupapula olwo, lwali niluliho obwandiike hu nyaande choombi, haandi lwali niluli syaboywa neende ebifuundiho bitaanu-na-bibiri.

² Haandi ndalingaala ndaabona malaika muhunuufu mweene, oweecha yalaangirira mu kono hoongo ati, “Naanu mweene ohoyera ohufuunduhulula ebifuundiho bino, mani yatuumbulula olupapula luno?”

³ Nae yabulawo omuundu yeesi, kata Muukulu, oba hu syaalo, oba emakoombe, owali naanyala ohutuumbulula olupapula olwo yewuunja mukati waalwo.

⁴ Ndeecha ndaalira ng'ofwa, olwohuba abulao omuundu wali anyala ohunyoolehana owali n'ahoyera ohutuumbulula olupapula olwo, haandi kata neende ohulingaala mukati waalwo.

⁵ Mani mulala hu bahuluundu yeecha yamboolera ati, “Otalira daawe. Bona! Edalang'i ohutula mu nono ya Yuda, omwichuhulu muhunuufu mweene wa Daudi, amalire ohuyiingira, mani niye onyala ohufuunduhulula ebifuundiho bino bitaanu-na-bibiri, haandi yaamala yatumbulula neende olupapula luno.”

⁶ Mani ndalingaala ndaabona Ekoondi doto nilyeemere akati w'esisaala sy'obutuki, nilibodoohanisibwa neende ebiloonge bilamu bine bira, alala neende abahuluundu bala bosi. Ekoondi doto lira lyabonehana koti elyali nilimalire ohwiitwa. Lyaliho enjika chitaanu-na-chibiri, neende emoni chosi chitaanu-na-chibiri echiri nicho myooyo kitaanu-na-kibiri cha Nasaae, echatumwa ohusalaanira mu syaalo sino syoosi.

⁷ Ekoondi doto lyeecha lyasiingira lyaachia lyaabukula olupapula ohutula mu muhono muluungi kw'oyo owali niyehaale hu sisaala sy'obutuki.

⁸ Mani koti lu lyali n'ahola atyo, ebiloonge bilamu bira bine, alala neende abahuluundu amahumi kabiri neende bane bala, beecha haakwa aasi mu moni w'Ekoondi doto elyo. Buli otula yali neende obuhana neende ebbakuli ch'esaabbu nichiichuule obubbaani, echo nicho esaala ch'abaandu ba Nasaae.

⁹ Bachaaka ohweemba olweembo luyaaha bati, “Niiwe ohoyera ohubukula olupapula lusiriingise olwo haandi neende ohufuunduhulula waamalaho ebifuundiho byaalwo. Olwohuba weetwa, mani ohubitira hu hufwa hwao hw'ohweyaanayo, wanyala ohukulira Nasaae abaandu batula mu buli nono, lulimi, syaalo, haandi neende enjia.

¹⁰ Wabahola ohuba obwaami bw'abalaamisi ohuhalaabanira Nasaae weefwe, haandi nibo abachia ohutuka hu syaalo huno.”

¹¹ Haandi ndalingaala, haandi ndawulira bamalaika, nibali mu buduhunyi! Boosi bali nibeemere nibebodoohaanie esisaala sy'obutuki, neende ebiloonge bilamu bine bira alala neende abahuluundu bala bosi,

¹² mani beemba mu kono hoongo bati, “Ekoondi doto lyeetwa nilyo elihoyera ohunyoola obunyala, obunyali, amakesi, neende amaani, esitiibwa, oluyaali, neende ohufuma!”

¹³ Mani haandi ndeecha ndawulira buli siloonge siri Muukulu, hu syaalo, mu syaalo siri aasi, neende mu nyaanja ebiindu bilamu byoosi, mu buloonge bwoosi, mani bali nibeemba bati, “Eyiri oyo owihaale hu sisaala sy'obutuki, haandi neende eyiri Ekoondi doto, abe neende efuma neende esitiibwa, oluyaali neende obunyala bwoosi, endaalo choosi pe!”

¹⁴ Mani ebiloonge bilamu bine bira nibiicha nibikobolamo biti, “Amiina!” Mani abahuluundu nibeecha nibakwa aasi nibeenamira Nasaae.