Ohubwiihulirwa 4 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ohwiinamira Nasaae Muukulu

¹ Abweene ano, haandi ndanyoola ohuboneherwa hundi mani ndaabona olwiiki lwikuuhe Muukulu. Haandi neende ekono elyali nilyuubba koti eturumbete, lindawulira niliimboolera hale liti, “Niina wiiche aakulu ano, mani huhweekese esichia ohubaao luunyuma lwasino.”

² Abweene ao, Mwooyo yeecha haandi yaniina. Ebweene eyo Muukulu, yaliyo esisaala sy'obutuki omuundu wuundi nasihaaleho.

³ Obweeni bwae bweecha bwamwemweenda koti amakina k'ebbeyi hoongo muno, koti yasipa neende karinelia, haandi ebiindu byoosi ebyali nibyebodoohaanie esisaala sy'obutuki esyo, yaliyo oluyiingi luli neende eraangi yifwaana koti ekina liindi lilaangwa mbwe emeraadi.

⁴ Nae ohwebodoohania esisaala sy'obutuki, yaliyo ebisaala by'obutuki biindi amahumi kabiri-na-bine, nibiihaalweho abahuluundu amahumi kabiri-na-bane, nibefwaalire engubo charachaari haandi nibefwaalire ekofia ch'obutuki ch'esaabbu.

⁵ Nae ohutulira mu sisaala sy'obutuki esyo, mwatuliramo enjeserye ch'olumesu, ohududuma, alala neende ohwaduluhana huloondana. Nae mu moni w'esisaala sy'obutuki, yaliwo emiriro chitaanu-na-chibiri nichaaduha, echali nicho myooyo kitaanu-na-kibiri echa Nasaae.

⁶ Haandi mu moni w'esisaala sy'obutuki, yaliyo esiindu sifwaana koti enyaanja y'egilaasi, niyimesamesana koti amakina k'efula. Ohwebodoohania esisaala sy'obutuki hu buli lwaande, yaliyo ebiloonge biindi nibyabwiihwa neende emoni, mu moni neende emukoongo bweene.

⁷ Esitaangira syeene syali esifwaana koti edalang'i. Esya habiri syali sifwaanana neende esurusi. Esya hadatu nasyo syali neende obweeni bufwaanana neende obw'omuundu. Nae haandi esya hane nasyo syali sifwaana neende eeswi yibburuuhe.

⁸ Buli silala hu biloonge bine bira, syali neende embaya chisaasaba, haandi nichabwiihwaho neende emoni, erwaanyi neende mukati wacho. Esideete neende esiro, haba sibyaleheraangaho ohweemba biti, “Omwoolerefu, omwoolerefu, omwoolerefu, niye Omwaami Nasaae w'Obunyala bwoosi, owaliwo, oliwo, haandi ow'ohubaao.”

⁹ Ebiloonge bilamu bine ebyo, byeemba enyembo ch'oluyaali, esitiibwa alala neende ohweebasaanga, nibyeembera oyo owihaale hu sisaala sy'obutuki, olibaao omulamu endaalo choosi. Nae nibiri ohuholaanga bityo,

¹⁰ abahuluundu amahumi kabiri-na-bane bala bakwa aasi mu moni w'oyo owihaale hu sisaala sy'obutuki, nibamwiinamira, oyo ochia ohubaao endaalo choosi. Basukuna ekofia chaabwe ch'obutuki aasi mu moni w'esisaala sy'obutuki esyo nibaboola bati,

¹¹ “Omwaami weefwe, haandi Nasaae weefwe! Ohoyera ohunyoola oluyaali, esitiibwa, neende obunyala. Olwohuba niiwe owaloonga ebiindu byoosi, nihaandi ohweema hu hudaha hwao, nilwo lubyeecha byabeereswa obunyala bw'ohubaao haandi neende ohuba abalamu.”