Ohubwiihulirwa 22 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Haandi malaika wuno yanjekesa omwaalo kw'amaachi k'obulamu, akang'enang'ena koti amakina k'efula, haandi nikahulukusa nikatula mu sisaala sy'obutuki sya Nasaae haandi esy'Ekoondi doto

² haandi nikahulukusa nikeehera akatikaati w'engira yomu siko esyo. Haandi buli hu ndulo w'omwaalo okwo, hwaliho omusaala kwobulamu, okwaama ebyaamo amahabi ehumi-na-kabiri buli mwaaka, ehabi lala buli mwoosi mulala. Haandi amasaafu kakwo niyo amaoso kaonia ebyaalo.

³ Sibulao esiindu syoosi esyabwaabwa neende Nasaae esichia ohunyoolehana mu siko esyo. Esisaala sy'obutuki sya Nasaae, haandi esy'Ekoondi doto nisyo esichia ohubechaanga mu siko esyo, haandi abahalaabani bae nibo abachia ohumwiinamiraanga.

⁴ Abeene abo nibo abachia ohunyala ohubonaanga obweeni bwae, nihaandi eliita lyae lichia ohubechaanga nilyandiikibwa hu bweeni bwaabwe.

⁵ Siyichia hubaayo obulafu bwoosi daawe, haandi abaandu balibaayo, haba sibachia huba nibadaha ohuba neende amataara oba omubasu daawe, olwohuba Omwaami Nasaae niye ochia ohuba obulafu bwaabwe, mani haandi nibo abachia ohutuka endaalo choosi pe.

Ohwiicha hwa Yesu

⁶ Haandi malaika yamboolera ati, “Emboosi chino ch'obwadyeeri, haandi cheesikiha. Mani Omwaami Nasaae, oberesaanga abanabbi Mwooyo wae, niye otumire malaika wae ohweekesa abahalaabani bae esiindu sichia ohubaao mu siha simbikiti muno.”

⁷ Yesu aboola ati, “Tekeeresa!” “Njicha bwaangu! Mani beehoye abo abafunihira emboosi ch'abanabbi chiri mu sitabo sino!”

⁸ Ese, Yowaana, ndawulira haandi ndaabona ebiindu bino byoosi. Mani nindamala ohubiwulira, haandi neende ohubibona, ndeecha ndaakwa aasi mu makulu ka malaika owali niyanjekeese ebiindu bino, mani ndaaba aambi ohuchaaka ohumwiinamira.

⁹ Nae malaika oyo niyabona atyo, yamboolera ati, “Otahola otyo daawe! Ese ndi sa omuhalaabani waasyo, haandi neende abanabbi bosi baana beeng'we, alala neende abo boosi abafunihira emboosi chiri mu sitabo sino. Yinamiraanga Nasaae!”

¹⁰ Haandi malaika oyo yamboolera ati, “Otakisa emboosi ch'obunabbi ch'esitabo sino koti esyaama daawe, olwohuba ebiha biri aambi, bi biindu bino bichia ohweholehaniramo.

¹¹ Omuundu yeesi omuhola-mbi leha yemeede ohuholaanga ebyonoono, haandi oyo yeesi, omubi leha yemeede ohuba omubi. Nae omuundu yeesi oli omulai, leha yemeede ohuholaanga ebilai, haandi oyo yeesi oli omwoolerefu, leha yemeede ohubechaanga omwoolerefu.”

¹² Yesu aboola ati, “Tekeeresa!” “Njicha bwaangu muno! Njia ohwiicha neende ebisiimo byaange omweene, ohuberesa buli muundu ohweema hweebyo bi yaholaanga.

¹³ Niise otaangira haandi omaliirihayo, ohuchaaka neende ohwaakama.”

¹⁴ Beehoye abo aboosa ebyefwaalo byaabwe byaalaba, mani abali neende obunyala bw'ohulya ebyaamo bitula hu musaala kwobulamu, haandi neende ohwiingirira mu biruwa mu siko esyo.

¹⁵ Nae erwaanyi w'esiko esyo, yiriyo embwa, neende abalakusi, neende abacheke, neende abeeti, neende ab'emisaambwa, neende buli muundu yeesi owaheera obubacha haandi omwebachirisi.

¹⁶ “Ese, Yesu ndamala ohutuma malaika waange ohuchia ohubalaangirira ebiindu bino eyiri abafukiiriri. Ese ndi omwichuhulu wa Daudi. Ese ndi esulwe, eng'ining'ini y'echuli yaaduha muno.”

¹⁷ Mwooyo alala neende Omweeya musaacha baboola bati, “Mwiiche!” Haandi buli muundu yeesi owuliraho sino yeesi ahoyere ohuboola ati, “Mwiiche!” Oyo yeesi oli neende obuluwo, yeeche. Kanya ohung'wa amaachi k'obulamu akali koti esiyaanwa eyiri oyo yeesi osiidaha.

Emaliirisa

¹⁸ Ese, Yowaana, ndabula butoli-toli buli muundu owulira emboosi ch'obunabbi ch'esitabo sino endi; omuundu yeesi n'achimeedaho esiindu syoosi, Nasaae achia ohumeeda endwaae chilomaloomweho mu sitabo sino hu husaandisibwa hwae.

¹⁹ Nae omuundu yeesi n'atusaho esiindu syoosi hu mboosi ch'obunabbi ch'esitabo sino, Nasaae achia ohubamalaho omukabo kwaabwe okw'esyaamo sy'omusaala kwobulamu, neende esy'Esiko Syoolerefu, ebilomaloomweho mu sitabo sino.

²⁰ Oyo yeesi onyala ohutusira esiindu sino obuloli ahoyere ohuboola ati, “Eee, mubwadyeeri bweene, njicha bwaangu muno!” Amiina. Yicha Omwaami Yesu!

²¹ Embabaasi ch'Omwaami Yesu chibe neende abaandu ba Nasaae boosi.