Ohubwiihulirwa 2 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Emboosi yichiira Efeso

¹ “Eyiri malaika w'abafukiiriri bali mu Efeso yandiika oti: ‘Yino niyo emboosi yitula eyiri oyo odiirire eng'ining'ini chitaanu-na-chibiri mu muhono kwae muluungi, haandi okeenda mu biteeni by'amataara by'esaabbu bitaanu-na-bibiri.

² “‘Manyire ebiindu byoosi bi wahola. Manyire koti lu wahola emirimo cha amaani, haandi koti lu obeere omwesimiirisi. Manyire endi haba s'onyala ohulehera abaandu babi, haandi endi okeraania abo ababoola bati bali abatume nihane haba sibali batyo daawe, haandi endi waabona oti hane babacha.

³ Ewe oli omwesimiirisi muno, wamala ohusaanda muno hulwaange, nae haandi haba osisiiri ohwoola ohwekaana daawe.

⁴ Nae esiindu sino nisyo sy'ong'ene sa siindi ohuhwekanyiirisaho. Ewe haba sooli huheera koti olwaamberi.

⁵ Mani yichulisaho yi wachaakira ohudoondobana! Kaluuhana olehane neende ebyonoono byao byoosi, mani onyale ohuchaaka ohuhola bi waholaanga muhutaangira. Nae n'otakaluuhana walehana neende ebyonoono byao, njia ohwiicha yooli, mani male mbukule esiteeni sy'etaara syao situse abuundu wasyo.

⁶ Nae sino nisyo esilai syooli ohuhola. Wasyuula ebiindu bi baandu ba Nikoleeta bahola koti sa lu syesi ndasyuula.

⁷ Nimuli neende amatwi, mani wulire bi Mwooyo aboolera abafukiiriri! Abo boosi abayiingira njia ohubaba obunyala bw'ohulya esyaamo sy'omusaala kwobulamu okwamera mu Ndalo ya Nasaae.’

Emboosi yichiira Simirina

⁸ “Eyiri malaika w'abafukiiriri bali mu Simirina, yandiika oti, ‘chino nicho emboosi chitula eyiri oyo otaangira haandi omaliirihayo, owafwa haandi yaaba omulamu.

⁹ Ese manyire muno ebidinyu byao byoosi. Manyire endi oli omumanani nae mubwadyeeri bweene oli omuyiinda! Manyire ebiindu bibi biri ohulomwalomwaho, ohutula hu abo ababoola bati Bayudaaya nihane haba sibali batyo daawe. Abo bali omukaanda kwa Sitaani sa!

¹⁰ Otatya daawe, esiindu syoosi sy'ochia ohusaandisibwamo. Tekeeresa! Sitaani achia ohuhuteema, naaba nanyalire ohuta abaandi hweeng'we mu jeela, mani ebidinyu by'eng'we bibeeo hu siha sy'endaalo ehumi. Mube abeesikwa yi ndi, kata neende nibiri mbwe muchia ohwiitwa sa, mani mba njia ohubaberesa obulamu koti omusaara kw'ohuyiingira.

¹¹ Nimuli neende amatwi, wulire bi Mwooyo aboolera abafukiiriri! Abo abayiingira haba sibachia hunyala ohunyaalisibwa neende ohufwa hwa habiri.’

Emboosi yichiira Perigamumu

¹² “Eyiri malaika w'abafukiiriri bali mu Perigamumu yandiika oti, ‘Chino nicho emboosi chitula eyiri oyo oli neende olugaanga lwooki, olw'obwooki hu nyaande choombi.

¹³ “‘Ese manyire bulai bweene yi wamenya, eyo bweene yi Sitaani yehala hu sisaala sy'obutuki. Oli owadyeeri mweene yi ndi, haandi haba siwalehana neende efukiirira yao mweese kata niwali mu siha si Atipa, omuloli waange mweesikwa, niyeeterwa ebweene eyo yi Sitaani yamenya.

¹⁴ Nae aliwo ebiindu biindi ebidiidi bihwekanyiirisaho. Aliwo abaandu baandi mweeng'we abali ohuloonda enjekesa ya Bbalamu, oweekesa Bbalaki engeri y'ohuyira abaandu ba Yisiraeli mu syonoono n'abaserera ohulichaanga ebyohulya byalichiingi nibimalire ohuyaanirwa ebiloongaloongwe haandi neende ohuholaanga obuyirani bubi.

¹⁵ Mani mu ngira nasilala eyo, mwesi muli neende abaandu babalimo abaloondakana neende enjekesa y'Abanikoleeta eyo.

¹⁶ Nae bulaanu, mweyolobye mulehe ebyonoono byeeng'we! Nimutahola mutyo, ese njia ohwiicha yi muli bwaangu muno mani nwaane neende abaandu abo nindehoonyera olugaanga luno olutula mu munwa kwaange.

¹⁷ Nimuli neende amatwi, mani wulire bi Mwooyo aboolera abafukiiriri! “‘Abo abayiingira njia ohubaberesaho hu mana yakisibwa. Haandi njia ohuberesa buli mulala hu beene abo, ekina lya rachaari elyandiikwaho eliita yaaha li muundu yeesi ataamanyireho ohutusaho oyo olinyoola yeeng'ene.’

Emboosi yichiira Siyatiira

¹⁸ “Eyiri malaika w'abafukiiriri bali mu Siyatiira yandiika oti, ‘chino nicho emboosi chitula eyiri Omwaana wa Nasaae, yi moni chae chaaduha koti omuliro, yi makulu kae kamesamesana koti omugasa kusimuulirwe bulai muno.

¹⁹ Ese manyire ebiindu byoosi bi oholaanga. Manyire obuheeri bwao, obweesikwa bwao, obuhalaabani bwao, neende ohwesimiirisa hwao. Manyire endi esiha sino oli ohuholaanga muno ohuhiraho koti lu waholaanga muhutaangira.

²⁰ Nae sino nisyo esiindu si ndi ohuhwekanyiirisaho. Mufukiiriraanga omuhasi Yesebbeeli oyo, owelaanganga ati, niye wamwaanda wa Nasaae. Yehoonyeraanga enjekesa yae eyo ohukosa-kosania abahalaabani baange, boole ohwiingira mu huhola obuyirani bubi, haandi neende ohulichaanga ebyohulya bibi nibimalire ohuyaanirwa ebiloongaloongwe.

²¹ Ndamala ohumuberesa ebiha bimala endi yeyolobye ebyonoono byae, nae haba saadaha ohukaluuhana ohuleha obucheke bwae daawe.

²² Mani sakira njia ohumuubba hu sitaanda yi mweene neende abo boosi abayiranaanga nae bachia ohusaandira bubi muno. Njia ohuhola sino bulaanu buti, nibatefunaka mu biindu bibi bibaholaanga nae.

²³ Haandi njia ohwiita neende abaloondi bae, mani hu bafukiiriri boosi beemeo bamanye bati, ese niise oyo omanyire ebibaaso bya buli muundu neende ndahaba nimbaheeranga. Njia ohutuunga buli mulala hweeng'we ohweema hu byooba niwahola.

²⁴ Nae eng'we abadoong'ereo mweesi abali mu Siyatiira, haba simwaloondaho hu njekesa yino yiti. Haba simweekaho bi baandu baandi balaanga mbwe, ebyaama bya Sitaani byomuukati bweene. Ndi ohubaboolera endi, ese haba siinjia hubataaho esidinyu siindi syoosi daawe.

²⁵ Nae muhoyere ohwomiirira hweebyo bi muli nabyo ohwoola luundirikobola.

²⁶ Abo boosi abayiingira, haandi abemeeda ohuholaanga biindaha ohwoolera elalira hu njakamo, njia ohubaberesa obunyala buyiingira ebyaalo byoosi.

²⁷ Mani baba bachia ohunyala ohubitukaanga neende endawusi y'esichuma, haandi mu baate koti endamu ch'eloba, koti lu syesi omweene ndabeeresebwa amaani ohutula eyiri Laata yaange.

²⁸ Haandi mba njia ohubaberesa esulwe (eng'ining'ini y'echuli).

²⁹ Nimuli neende amatwi, mani wulire bi Mwooyo aboolera abafukiiriri!’