Ohubwiihulirwa 13 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Esolo chibiri

¹ Mani ndabona esolo niyisiingira niyitula mu nyaanja. Yali yiri neende enjika ehumi neende emitwe kitaanu-na-kibiri. Hu buli lwiika lwaalyo, hwaliho ekofia y'obutuki, nae hu buli mutwe kwaalyo, kwaliho eliita lyali nilinyeka Nasaae.

² Esolo yino yali niyifwaanana neende eengwe, neende amakulu kafwaana neende ak'enani, nae omunwa kuli koti okw'edalang'i. Syuuhira-banaabi oyo yeecha yaaberesa esolo eyo amaani kae, esisaala sy'obutuki syae, neende obunyala bubitiirifu bwae.

³ Omutwe mulala kw'esisolo esyo, kwali nikubonehana koti okwali nikunyaalirwe bubi muno, nae ekoonjo elyo lyali nilimalire ohuwona. Esyaalo syoosi syesiinduha muno, mani syaamala syaloonda esolo eyo.

⁴ Mani buli muundu yeesi yachaaka ohwiinamiraanga Syuuhira-banaabi oyo olwohuba yali n'abereese obunyala bwae bwoosi esisolo esyo. Haandi bachaaka neende ohwiinamiraanga esisolo esyo syosi, nibaboola bati, “Muundu siina ofwaanana neende esisolo sino? Wiina mweene onyala ohusilwaania?”

⁵ Esisolo esyo syafukiirirwa ohulomalomaanga nisyefumya muno, nisinyeka Nasaae, haandi syeecha syafukiirirwa ohuba neende obunyala obwo, hulw'embaka y'emyoosi amahumi kane amalaamba.

⁶ Syachaaka obwaaba Nasaae, eliita lyae, abuundu yi yamenya, alala neende abo boosi abamenya Muukulu.

⁷ Syafukiirirwa ohulwaania abaandu ba Nasaae, kata neende ohubayiingiraanga, haandi syabeeresebwa obunyala ohutuka buli luyia, syaalo, lulimi, neende obwiibulanwa.

⁸ Abaandu boosi abamenya hu syaalo huno bachia ohusiinamiraanga, ohutusaho abo ba meeta kaabwe kamala ohwandiikwa, kata neende ohuloongwa hw'esyaalo nihutabaao, mu sitabo sy'abaandu balamu, esy'Ekoondi doto lyeetwa.

⁹ “Wulire mani, nimuba nimuli neende amatwi!

¹⁰ Oyo yeesi ohoyera ohuwaambwa, mubwadyeeri bweene achia ohuwaambwa. Oyo yeesi ohoyera ohwiitwa neende olugaanga, mubwadyeeri bweene achia ohwiitwa neende olugaanga. Mani esiindu situbaanja abaandu ba Nasaae boosi ohuba neende ohwesimiirisa, neende efukiirira.”

¹¹ Haandi ndabona esisolo siindi, syasiingira syaatula mu syaalo. Syali siri neende enjika chibiri echifwaanana neende enjika ch'ekoondi doto, nae syalomalomaanga koti esisyuuhira-banaabi sira.

¹² Syali nisyehoonyera obunyala bubitiirifu bw'esisolo sitangiire sira mu huboneha. Syayiika esyaalo syoosi, alala neende abaandu bali nibasirimo boosi, ohuchaaka ohwiinamiraanga esisolo sitangiire sira, si koonjo lyaasyo lyali niliwonere.

¹³ Esisolo sy'habiri sino sya anyala ohuholaanga eby'amayia bihunuufu muno. Syaahola omuliro kweeha hu syaalo nikutula Muukulu, buli muundu yeesi n'abona.

¹⁴ Mani sya anyala ohubachirisa abaandu boosi bali nibamenya hu syaalo huno, nisyehoonyera eby'amayia biingi bi syali nisyafukiirirwa ohuholaanga mu moni w'esisolo syataangira sira. Esisolo esyo syaboolera abaandu abo siti, ohwiisa oluyaali mu sisolo syataangira sira, bahoyere ohuhola esifwaanani sifwaanana neende esisolo syanyaalwa neende olugaanga nae kata katyo syaanyala ohuwona syabaao esilamu.

¹⁵ Esisolo syohubiri sino syeecha syafukiirirwa ohuyeera omuuya kwobulamu kwiingire mu sifwaanani sy'esisolo syataangira sira, hu sifwaanani esyo sinyale ohulomaloma neende ohwiita abaandu boosi ababa nibatachia hunyala ohusiinamira.

¹⁶ Esisolo sino mani sya anyala ohuyiika buli muundu yeesi, omukali neende omuyeraanu, omunyali neende omumanani, omuhalaabani muwaambe neende omulehuule, ohukanya ohuteebwaho esilolero hu mihono chaabwe miluungi, oba hu bweeni bwaabwe.

¹⁷ Abulao omuundu yeesi owali n'anyala ohukula, oba ohukusa esiindu syoosi nataaliho esilolero sino, esilolero sy'eliita ly'esisolo, oba enaamba yemao hulw'eliita elyo.

¹⁸ Bulaanu esiindu sino sibaanja abaandu ohuba neende amakesi. Oyo yeesi oli neende amakesi, anyala ohukoonyeresa amahuluundu k'enaamba y'esisolo sino, olwohuba enaamba eyo yemao hulw'eliita ly'omuundu. Enaamba eyo niyo elifu chisaasaba neende amahumi kasaasaba na chisaasaba (666).