Ohubwiihulirwa 11 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Abaloli babiri

¹ Bulaanu, ndabeereswa olusaala lwali nilufwaanana neende ekada libakereraanga obuleeyi, mani ndaboolerwa endi, “Ewe chia okere Enyuumba ya Nasaae alala neende alutaari, mani haandi obale abaandu bali ohwiinamiraangamo Nasaae.

² Nae otakera ebiseenge biri erwaanyi daawe, olwohuba ebyo byamala ohubeereswa abakafiiri, abanaaseenakire Esiko Syoolerefu hu mbaka y'emyoosi amahumi kane-na-kibiri emilaamba.

³ Naange njia ohutuma abaloli baange babiri, nibafwaalire amagunia, mani bachie bayaale emboosi cha Nasaae mu ndaalo elifu ndala neende emia chibiri-na-mahumi kasaasaba (1,260) echo.”

⁴ Abaloli babiri abo, nibo emisaala miseituuni kibiri, neende amataara kabiri akeemere mu moni w'Omwaami w'esyaalo.

⁵ Mani omuundu yeesi n'ateemaho ohubaholaho esyonoono, omuliro kuchia ohutulaanga mu minwa chaabwe, nikusihirisa abasuku baabwe; mani mu ngira yino, oyo yeesi ochia ohuteemaanga ohubaholaho esyonoono achia ohwiitwaanga sa.

⁶ Bali neende obunyala ohwiikala ekulu, efula yihaye ohukwa ebiha byoosi bi bachia ohuba nibali ohuyaala emboosi cha Nasaae. Haandi bali neende obunyala bubuka esulo choosi, obunyala ohuchikaluuhania chaaba amabaanga. Haandi bali neende obunyala bw'ohukwiisa hu syaalo buli mbya y'oluumbe lusihirisa esiha syoosi si baba nibadahiramo ohusihola.

⁷ Mani nibaba nibamalire ohuyaala emboosi chaabwe chino, enani lichia ohusyuuha ohutula mu kotero, lichia ohuchaaka ohulwaanakana nabo. Achia ohubayiingira, mani amale abeete boosi,

⁸ mani emibiri chaabwe chimale chikone sa mu ngira huluundu chomu siko sihuluundu, yi Omwaami waabwe yabaambwa hu musalabba. Eliita ly'obuyiriyiri ly'esiko esyo nilyo Sodomu, oba Misiri.

⁹ Abaandu ohutula mu byaalo byoosi, enono, enimi, alala neende enjibulo, bachia ohwelolera emibiri chaabwe, hu mbaka y'endaalo chidatu neende esituundu, haandi sibachia ohukanya bati chisiihwe daawe.

¹⁰ Abaandu bohu syaalo huno nabo bachia ohusangaalira sa ohufwa hw'abaandu babiri bano. Bachia ohwesangaasa, mani bamale bagoobanire ebiyaanwa, olwohuba abanabbi babiri bano, bachia ohuba nibaleeta ohusaanda ohuungi muno hu syaalo huno.

¹¹ Luunyuma lw'endaalo chino chidatu neende esituundu ohuwa, omuuya kulimo obulamu kwatula eyiri Nasaae, kwabeengiramo, mani baasiingira beema haandi. Abo boosi abali nibababweeneho bateenga muno.

¹² Mani abanabbi babiri bala baawulira ekono hoongo nilitula Muukulu nilibaboolera liti, “Eng'we muniine mwiiche ano!” Mani abasuku baabwe nibali nibasiibalingaalire, baniina aakulu beengira Muukulu nibali mu sireesi.

¹³ Esiha syeene esyo, musisi njalaba yakwaawo. Esituundu silala hu bituundu ehumi eby'esiko esyo syasihiriswa, mani abaandu elifu sabba (7,000) baafwa. Abaandu badoong'ereyo bateenga muno, mani baafumia obuhunuufu bwa Nasaae wo Muukulu.

¹⁴ Ohunyaasibwa hw'ohubiri huweere, nae ohunyaasibwa hw'ohudatu huchia ohuloondaho bwaangu bweene!

Eturumbete ya hataanu-na-habiri

¹⁵ Bulaanu, malaika wa hataanu-na-habiri yesi yoobba eturumbete yae, mani amakono mahoongo muno kabaao Muukulu akaboola kati, “Obunyala bw'ohutuka esyaalo syoosi bulaanu buli neende Omwaami weefwe, alala neende Kristo wae, mani achia ohutuka endaalo choosi pe!”

¹⁶ Abahuluundu bala amahumi kabiri-na-bane abali nibeehala hu bisaala byaabwe by'obutuki mu moni wa Nasaae, boosi beehubba aasi neende obweeni, beenamira Nasaae,

¹⁷ nibaboola bati, “Omwaami Nasaae w'Obunyala bwoosi, oyo oliwo haandi owabaao! Huhweebasa muno ohubukula obunyala bwao buhunuufu muno haandi wachaaka ohutuka!

¹⁸ Nae abakafiiri bechula etima olwohuba esiha sy'etima lyao syosi syoolere, esiha si bafu bachia ohuheengerwa omusaango. Esiha syahoola, esyohubeereseramo esisiimo abahalaabani, abanabbi neende abaandu bao boosi, abo boosi obahuberesaanga oluyaali, abahunuufu neende abadiidi sidubaanie. Esiha syahoola esy'ohusihirisiramo abo abasihirisa esyaalo!”

¹⁹ Enyuumba ya Nasaae eyiri Muukulu yekulibwawo, mani Esanduuku ly'Endagaano lyabonehana nilirimo. Bulaanu, enjeserye ch'obulafu cheecha chakwaao, ohududuma, alala neende ohwaduluhana hw'ehubba, neende musisi, haandi neende amakina k'efula masito byeecha byosi byabaao.