Ohubwiihulirwa 1 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Esitabo sino sirimo ebiindu byaandiikwa ebidiira hu biindu bichia ohubaao bi Yesu Kristo yabwiihula. Nasaae niye owamuberesa ohubwiihulirwao huno, hu yemewo anyale ohweekesa abahalaabani bae ebiindu bichia ohubaao bwaangu muno. Kristo yatuma malaika wae ohuchia eyiri Yowaana omuhalaabani wae, amweekese abimanye.

² Yowaana yakaniaaya ebiindu byoosi bi yali nabweene. Mani yino niyo enomanoma yae yidiira hu mboosi chitula eyiri Nasaae, neende obwadyeeri bwabwiihulwa neende Yesu Kristo.

³ Ewe osoma esitabo sino wehoye, haandi eng'we abatekeeresa emboosi y'obunabbi yino mwesi mwehoye, mani mwafunihira esyo esiba nisyaandiikwa mu sitabo sino! Olwohuba esiha syasuda aambi, si biindu bino byoosi bichia ohuholehaniraho.

Amaheeso kachiira abafukiiriri bali mu biko bitaanu-na-bibiri

⁴ Ohutula eyiri Yowaana, ohuchiira abafukiiriri bali mu biko bitaanu-na-bibiri ebiri mu situundu sy'esyaalo sya Asia. Embabaasi neende omuleembe bitula eyiri Nasaae, oyo oliwo, oyo owaliwo, haandi oyo owahabeeo, neende ebitula eyiri mwooyo bataanu-na-babiri abali mu moni w'esisaala syae sy'obutuki bibe naang'we.

⁵ Haandi embabaasi neende omuleembe bitula eyiri Yesu Kristo, omuloli mweesikwa mweene, owataangira ohusyuuhiswa ohutula mu hufwa, haandi omutuki w'abatuki bohu syaalo, bibe naang'we. Yesu Kristo yatuheera, haandi ohweema hu hufwa hwae hw'ohweyaanayo, yatuboolola ohututusa hu bibi by'efwe.

⁶ Haandi Yesu Kristo yatuhola ohuba obutuki bw'abalaamisi, ohuhalaabanira Nasaae wae haandi Laatang'ene. Yesu Kristo anyoole oluyaali alala neende obunyala endaalo choosi! Amiina.

⁷ Boneho, mbao yechera hu maleesi! Buli muundu yeesi achia ohumubona, n'oteereho neende abamufumita beene. Abaandu boosi abali hu syaalo bachia ohulira. Mani nilwo lu sichia ohuba! Amiina.

⁸ Omwaami Nasaae w'Obunyala bwoosi, oliwo, owaliwo, haandi ochia ohubaao aboola ati, “Niise otaangira (alifa), haandi omaliirihayo (Omega)”

Ohuboneherwa hudiira hu Kristo

⁹ Niise Yowaana, mwaanamaao, haandi koti omuloondi wa Yesu, ndi owaasyeeng'we mu hweesimiirisa huteekanyiirisa ohweema hu husaanda hwiichiraanga ab'obwaami bwae. Ndayirwa ndateebwa hu sisiinga sya Patimo, olwohuba ndayaala Emboosi ya Nasaae neende obwadyeeri bu Yesu yabwiihula.

¹⁰ Mani hu ludaalo lw'Omwaami, Mwooyo yaniina, mani ndawulira ekono lyuubba koti ely'eturumbete nilyaayula muno, nililomalomera emukoongo waange.

¹¹ Lyaboola liti, “Yandiika ebiindu byoobona, mani otume esitabo esyo sichiire abafukiiriri bali mu biko bitaanu-na-bibiri bino: Buwefeeso, Simirina, Perigamumu, Siyatiira, Saradiisi, Filadelifia, neende Laodesia.”

¹² Ndakaluuhana ohubona owali naalomaloma naange, mani ndaabona ebiteeni by'amataara, eby'esaabbu bitaanu-na-bibiri.

¹³ Haandi mu byeene ebyo, mwalimo esyali nisifwaana koti omuundu, nafwaalire eganjuula lyereera lyoola hu makulu, neende olusibiro lw'esaabbu nilumwebodohaanie esirifu syae.

¹⁴ Efwiiri lyae lyali elya rachaari koti epaamba, oba koti enyaange, haandi emoni chae chali nichimyeesuha-myeesuha koti omuliro.

¹⁵ Amakulu kae kali nikamesa-mesana koti omugasa kwachuungwa haandi bakuubba, haandi ekono lyae niliduma koti amaachi kali ohwebbwomoola nikaakuha ohutula aakulu hu makina.

¹⁶ Yali n'adiirire eng'ining'ini chitaanu-na-chibiri mu muhono kwae muluungi, neende olugaanga lwooki, olw'obwooki hu nyaande choombi, olwatula mu munwa kwae. Obweeni bwae bwali obumesa-mesana koti elyuuba ly'esideete akati.

¹⁷ Nindamubona, ndakwa mu makulu kae koti omuundu ofwiire. Yandaaho omuhono kwae muluungi, mani yaboola ati, “Otatya daawe! Niise Alifa neende Omega.

¹⁸ Niise oli omulamu! Ndali ndafwa, nae bulaanu ndi omulamu w'endaalo choosi. Ndi neende obunyala hu hufwa neende mu syaalo sy'abafu.

¹⁹ Mani yandiika ebiindu bi obona, ebiindu biriwo bulaanu, neende ebiindu bichia ohuholehana luunyuma.

²⁰ Sino nisyo esyaama sy'eng'ining'ini chitaanu-na-chibiri ch'obona mu muhono kwaange muluungi, neende esy'ebiteeni by'esaabbu bitaanu-na-bibiri by'amataara: Eng'ining'ini chitaanu-na-chibiri chino, nibo bamalaika b'abafukiiriri bali mu biko bikabuhaane bitaanu-na-bibiri, haandi ebiteeni by'amataara bitaanu-na-bibiri, nibyo abafukiiriri bali mu biko bikabuhaane bitaanu-na-bibiri.